Nkah tay ăp nar khay Pe ơm, wa Tô Tấn Tài (Ama H’Oanh) lah Bí thư Thị Uỷ Buôn Ma Thuột, nkah: păng geh N’gor uỷ Dak Lak jao nau kan rgŏ jă ƀon lan, ngăn lah tâm nkuăl têh, ntơm ndâk lơh. Ama H’Oanh mbơh, rnôk lơh tâm Buôn Ma Thuột, rmôt bah n’gor rhơn ngăn, hôm ƀon lan ri ŭch rklaih đăp mpăn:

            ‘Phung hên geh nau nơih lah ta Buôn Ma Thuột lôch tâm rnôk mprơh Mỹ lah ntŭk gay ma rêh tâm di pháp luật tâm nkuăl têh kŏ âk đŏng, rmôt ƀon lan ueh đŏng, yor Buôn Ma Thuột ngăn lah rgum ƀon lan ăp n’gor đồng bằng khu V ơm ri ma khân păng geh nau blau cách mạng hôm. Ri hên mbơh ma ƀon lan gĭt lah rnôk aơ ân geh rklaih, hôm du hê nŭih tâm ƀon lan ri kŏ geh rmôt chính trị hôm gŭ tâm aơ”.

            Lah nŭih ƀư ntŭk kan mpôl tâm nkuăl têh Buôn Ma Thuột rnôk nê, wa Nguyễn Thị Minh Trinh, Groi Rmôt kan chính trị, mbơh, rmôt rnôk nê geh nŭih tâm quân-dân-chính, đah ăp nŭih ƀon lan mra geh nau bonh đă êng tâm di. Ƀư rjăp nuih n’hâm njoăl kon jê̆ mhe 2 năm tâm ƀon, wa nơm lăp tâm nkuăl têh, tâm nthoi, ndâk ăp nau kơl an cách mạng, mra lơh phung rlăng:

            ‘Ăp ntŭk tâm nê ri bu nsôih nfăn, đah nau kan cách mạng eh rnôk lah bu râng ma nơm. Ri rnôk nê gâp gĭt nau bah phung rlăng, ndrel đă ăp nŭih ăp ntŭk tâm rgop nsum đah nơm: ngoai lah hăn bonh đă phung tahen luh, tal 2 lah nkhĭt phung rlăng, tal 3 lah leo ƀon lan ndâk lơh. Tâm rnôn nê ri hên săch du đê̆ phung rlăng geh nau lơ jêh ri nkhĭt khân păng, ntơm bah nê geh bu gĭt, ndrel njêng ân ƀon lan ndâk lơh rlăng”.

            Rhơn nkah tay ăp năm khay mô bĭch gay ma kchoh n’ha cờ rklaih đăp mpăn, wa Nguyễn Thị Ngọc Lan, nkah: âk nŭih khĭt hôm, hŏ geh rmanh đŏng gay mât neh ntu, n’ha cờ nơm. Tât rnôk saơ n’ha cờ mpar tâm nar rklaih đăp mpăn Buôn Ma Thuột ri rhơn ngăn ngên:

            ‘Lơ 10/3 ri gâp nkah lah rnôk nê oh nê rngeh âk măng mro ngăn, măng ri mpoh ŭnh kđn. Mô geh bu ntôn ôh lah dơi rklaih ngăn kơt nê ôh. Tât rnôk aơ nkah tay ri gâp hôm geh nau rhơn tâm săk jăn. Lah saơ ăp n’ha cơ nơm kchoh nê geh yông nê ri lah nar rklaih Buôn Ma Thuột”.

            Nkoch tât nau dơi kăl e, wa Lê Chí Quyết, Groi Bí thư n’gor uỷ nkre lah Groi Kruanh Uỷ ban quân quản nkuăl têh Buôn Ma Thuột kăl e nkoch, 2 nkô̆ nau ƀư \geh nau dơi nơih bah nau tam lơh nê lah, tal bôk năp lah tahen ndrel ƀon lan nơm ueh ngăn, tal bar lah kônh wa ăp rnoi Yoăn-rnoi mpôl đê̆ ta aơ tâm rnglăp. Nau nê njêng nau dăng ăp ntil ân 3 n’gâng tâm lơh tahen, chính trị, rmôt bonh đă. Nau dơi rklaih Buôn Ma Thuột geh nau khlay, ƀư huch nau dăng bah phung rlăng, ƀư khân păng nchuăt du luh bah Gia Lai, Kon Tum. Tal bar lah bonh đă ƀon lan Dak Lak dâk nsôih rklaih. Wa Lê Chí Quyết, mbơh, tât lơ 24/3/1975, n’gor Dak Lak geh rklaih dĭng lĕ:

            ‘Nau dơi rklaih nkuăl têh Buôn Ma Thuột jêh nê lah dĭng lĕ ƀon lan kŏ ndâk lơh đŏng. Rjơn ngăn lah lam ƀon lan êp nê kŏ kơl ndâk, ndâk đah 3 ntrong tâm lơh: Tahen, chính trị, nŭih bonh đă. Lah kuăl jă tahen hăn luh, jao lơi ndrak nsiu, ndrel ma ƀon lan lơh ăp pôih, nchrai lĕ ăp ntŭk gŭ nde, lah rklaih ân nau rêh nơm”.

            N’gul rach năm lĕ rlau, nau dơi rklaih Buôn Ma Thuột hôm ơm tâm nuih n’hâm bah ăp nŭih tâm ndrel du nau nkah tât nau tâm rnglăp. Tâm nrglăp njêng jêng n’hâm dăng rgum nsum bah ăp mrôt, pơk trong ân geh nau dơi Tây Nguyên, njêng nau ueh khlay, ntrŭt dăng nau kan bah nau tâm lơh ndrel ndâk dăng ngăn geh dơi năm 1975, rklaih đăp mpăn miền Nam, đăp mpăn neh dak./.