Rơh điện thoại ndal bah xă nkual jru ngai lĕ pơk trong an du rơh hăn dŭt khlay bah Rmôt rgum nting tahen K51, N’gâng kan ntĭm rđău Tahen n’gor Dak Lak. N’gul nar hô bah “Nău kan 500 nar măng rgum nting tahen”, ăp du nău mbơh bah nuĭh ƀon lan lah du nău ntrŭt ăp tahen hăn trong. Ntŭk tât rơh aơ lah du mir jru ngai gŭ ta trong njônh nkual bah kơi ntŭk cách mạng Dinh Điền-xă Khuê Ngọc Điền ơm, aƀaơ lah xă Krông Bông-nkual neh tâm lơh kăl e âk nău jêr njê.

Jêh 3km trong rbông lŏ n’hanh bơi 1 km trong hăn jâng hao yôk, ăp tahen tât mir cà phê bah dâng jâng yôk Chư Yang Sin. Rlăp kuih tĭng plơk neh tĭng têl bah nuĭh ƀon lan, ăp nô rhơn rnôk tĭng păng ƀaih, tĭng gâl rse dù kăt tahen roh ôm lêk tĭng năm khay ntoh luh. Đại úy Nguyễn Duy Thuận, đội viên K51 nkoch: “Mpôl oh ƀư na nê̆ ngăn, sŏk ty jêh nĕ sŏk bay ƀư neh an rbân, geh rnôk sêk jêh nĕ mbang ao jŏ nar pơ̆ng lêk, an roh yô̆ ăp wa ngăn. Oh nô joi saơ kơt aơ lah rhơn saơ he răm ngăn”.

Tâm lơh tâm su lĕ rŭch, yơn nău rngot n’hanh lĕ đah nău kan đah ăp nuĭh gŭ tâm neh ri mô hŏ bah rngot. Đah Đại úy Y Nhai Drao, nuĭh lĕ geh bơi 20 năm tĭng đah trong kan rgum nting tahen, ăp rơh pah tâm nting bah ăp tahen lah du tơ̆ uănh đah ăp nău rngot mô dơi kuăl jêng săk.

“Di nting tahen, rmôt oh dŭt rhơn răm, mô êng nuĭh rnăk wâl nơm. He lah kon sau ƀư nău kan, lah du gâl yor nău đă bah play nuih he... Săk oh pah tât nting bah ăp wa dŭt rngot mô dơi ngơi luh nău, geh nhĭm mô luh nău, knŭng gĭt hoch dak măt dơm”.

Nău rgum jêh rnôk măt nar lĕ nhâp ta neh bri. Dơi geh rmôt pah kan lĕ rgum geh 2 nting tahen, ndrel ăp ndơ kơt tăng, bạt, du đêt ndoh ndơ bah măy tâm ôp tâm lup ndrel ndơ dŏng êng nơm lĕ geh lêk ôm tĭng năm khay.

Dŭng tahen khĭt dơi ăp tahen djôt ryơk ngăn. Wa Nguyễn Hoàng Quang, Groi Kruanh UBND xă Krông Bông, mĭn lah dŭt n’hâm:

“Aơ lah nar khay hô ngăn ƀư tĭng nău kan 500 nar măng. Krông Bông lah nkual ntŭk tâm lơh ơm, tâm lơh kăql e geh dŭt hô. Tĭng nkô̆ nău mbơh bah nuĭh ƀon lan n’hanh nău tâm rgop bah rmôt K51, mpôl hên mbra ntrôl dăng tay nkoch trêng, m’hâm geh săk rnglăy âk ngăn gay nsĭt tay săk, ndơ̆ ăp che, ăp wa sĭt đah ƀon tơm, sĭt đah băl mpôl”.

Gay rhŏ trong kan năl săk, rmôt kan dơi kan lĕ rgum joi sêk, nting rhŏ an năl ADN. Jêh nrôk jêh trong kan kuih joi, 2 nting tahen ndrel ăp ndơ dơi ndơ̆ sĭt Môch tahen khĭt Krông Bông. Nău rgum joi jêh 2 nting tahen lah săk rnglăy bah nău tâm rgop rjăp đah rmôt tahen đah gưl uỷ, n’gâng kan ƀon lan ta ntŭk, lơn lah ăp nău mbơh bah yor nuĭh ƀon lan mbơh. Ăp nău mbơh, bôl jêt, lah jêng nkô̆ nău khlay kơl năl ntŭk tâp brôi tahen, rgop ndơ̆ ăp nô sĭt đah băl mpôl n’hanh ƀon tơm.

Aƀaơ Rmôt K51 pơk hvi tay ntŭk hăn uănh joi ta nkual yôk Đá Đen tĭng ăp nău mbơh bah nuĭh ƀon lan, đah nsrôih joi, rgum tŏng ăp nting tahen hôm e gŭ ta ntŭk tâm lơh kăl e, rgop ƀư uĕh nău kơl bah kơi tahen n’hanh nău way rêh “Ngêt dak nkah gĭt tu dak”, “Rsơl plơng” bah rnoi nuĭh.

Trong hăn bah Nău kan 500 nar măng joi nting tahen hôm e dôl ƀư. Jêh nĕ mbra hôm e âk rơh kuăl tay nteh n’gul bri krŏng. N’hanh ta ntŭk kuăl đah ri, ăp nuĭh tahen K51-n’gor Dak Lak, anh tay ba lô, hăn trong. Yor đah khân pơng, nĕ mô knŭng lah nău kan, ma lah nău đă bah play nuih./.