Bôk nau kan nkra trong hăn ngăch Quy Nhơn-Pleiku hŏ ndâk bư bơi tât 2 khay. N’gor Gia Lai dôl rđau ăp ntŭk kan, rmôt kan tâm n’gor rgum ƀư ăp nau kan, ndal jao neh, ntŭk ntu gay kơl ƀư nkra trong.

Bôk nau kan trong hăn ngăch Quy Nhơn-Pleiku geh rnoh jong 125 km, hăn rlet 16 xã, phường; geh nkra hvi 4 ntrong ndeh hăn, ngăch 100km/h, đah rnoh ntuh kơl nklăp bơi tât 44 rbăn rmen. Aơ lah trong geh n’gâng kan ndrel nŭih ƀon lan tâm n’gor Gia Lai mpŏng mra geh nau nsôih rgâl nâp nthoi trong hăn, ntrŭt dăng nau kan tăch rgâl ndrel hun hao văng sa, rêh jêng bah n’gor.

Rnơm nau khlay, nau ntrŭnh ƀư ndơn geh nau tâm ban prêh bah nŭih ƀon lan tâm nkuăl geh khuch. Âk rnăk geh neh tâm rnoh geh bu sŏk ƀư kan hŏ nchrăp tâm rgop, ơm jao neh gay ntrŭnh ƀư nau kan ân nơih. N’gâng kan ăp xã, phường ntŭk geh nau kan hăn ro nkra trong Quy Nhơn-Pleiku kŏ dôl ntrŭnh ƀư nau ntrơn pă neh gay ơm jao ân rmôt ƀư kan. Gay ntrŭnh ƀư Bôk nau kan nkra trong hăn ngăch Quy Nhơn-Pleiku ân geh pă neh ƀư rlau 942 ha, đah rnoh prăk trok tâm, kơl an nchrăp tât rlau 4.700 rmen./.