Leo mpôl hên khâl tay ăp ntŭk tâm lơh 50 năm bah năp, tahen ơm Đinh Nhiêu ta xă Ia Yeng, nkuăl Phú Thiện, hôm e nkah gĭt nâm ơm rơh tâm lơh nchăng ta trong 7. Rnôk nĕ, wa lah Trung đội trưởng Trung đôi 2, C1, H11 ta n’gor Gia Lai-Kon Tum. Wa Đinh Nhiêu nkoch: jêh rnôk tahen he rklaih đăp mpăn Buôn Ma Thuột, rlău 15 rbăn tahen rlăng rhoăt sĭt bah Kon Tum n’hanh Pleiku jŭr dâng rđŭng rlău trong 7. Mpôl tahen nĕ băm tâm nău phit klach rnôk he rdôl lơh, grot joi.

Rnôk nĕ rlăng lĕ du quân đoàn yơn mô geh uĕh lăng, rnôk nĕ ndeh sar, phao blêu hăn nchoăt mô geh trong, mô geh nuĭh ntĭm rđău, rnôk nĕ ndrăk nsiu, phao blêu jăng bêng trong. Rnôk nĕ tahen tơm, tahen ta ntŭk lah đă kăt bok nglang ta ty kiău, lah mô geh bok nglang ri mô di tahen he.

Njok ta trong 7, ăp ntŭk kơt ntung Sông Bờ, ntung Cây Sung, yôk Tô Na... lĕ jêng phit klach bah mpôl tahen chuh chun. Tahen ơm Ksor Chư, rnôk nĕ tâm Trung đoàn 48, sư đoàn 320, Quân đoàn 3, rngot nkah gĭt tay lơh dăng năm nĕ:

Rnôk tăng mbơh ngăch lah Quân đoàn 2 ngụy rhoăt nchuă tdu ta trong 7, ndrĭ lah đơn vị nchoeng n’gang, pháo rtoh tĭng grăp. Rnôk nĕ tâm đơn vị nô Tạ Tấn, Chính ủy đă đồng chí Chư sŏk ndeh hăn kơl ƀon lan, gâp djăt tĭng. Rngot rơh lơh nar nĕ njê jêr nkoch, gâp dŭt ntô̆ n’hao yor gâp lĕ dơi ƀư du nău lôch uĕh bah nău rêh gâp.

Rnôk tahen e nchăng lơh dŭt hô, chrai tahen rlăng hăn ăp yôk bri. Âk ntŭk, tahen rlăng đê̆ đŏng nhŭp kăt ty, tâm têk hăn trong 7 yôk cờ nglang chuh chun. Tâm bôk rngok bah Đại tá Nguyễn Vi Hợi, Anh hùng Lực lượng vũ trang nhân dân, tă ƀư tahen Trung đoàn 64, Sư đoàn 320, Quân đoàn 3, ăp nar khay 3 năm 1975 đah âk rơh tâm lơh hô yơn ntô̆ n’hao.

Rơh tâm lơh hô ngăn ma gâp râng lah nar 17 n’hanh 18 khay 3, 2 nar nĕ lah nking n’gang rmôt Quân đoàn 2 bah Việt Nam Cộng hòa ta njok trong mrô 7. Rnôk nĕ mĭn lah rklaih đăp mpăn miền Nam kơp dơn neh dak. Rnôk nĕ tâm lơh mpôl hên mô mĭn tât nău khĭt, rnôk khĭt ri khĭt, rnôk sôt rmanh ri sôt rmanh, tâm rnglăp mro gay hăn tâm lơh.

Lơh dăng Trong 7 lĕ rgop khlay tâm rơh lơh dăng Tây Nguyên, pơk trong hăn an tahen n’hanh ƀon lan he ntrôl ngăch rơh rdôl lơh têh n’hanh ndâk lơh Yan wai 1975, rklaih đăp mpăn miền nam, kơp dơn neh dak. Lĕ 50 năm rlău, trong 7-trong tă saơ âk nău dơi têh dăng, aƀaơ lĕ jêng Quốc lộ 25, du trong meh têh nthoi Gia Lai đah n’gor duyên hải miền Trung. Wa Rah Lan Chung, Kruanh UBND n’gor Gia Lai, lah mpeh nău hun hao bah n’gor ta rwăch trong aơ.

Trong Quốc lộ 25-trong 7 mhe rlău dơi nkra, aƀaơ trong aơ nthoi tât n’gor Phú Yên hăn luh lăp. Aƀaơ tâm dăp rgum n’hanh nchrŏng trong hun hao bah nkuăl ta n’gor hăn rlău trong aơ geh Phú Thiện, Ayun Pa, Krông Pa, ri trong hun hao bah ăp ntŭk aơ tĭng njok trong me aơ. Nkual aơ aƀaơ lĕ jêng ăp nkual têh. Nău rêh âk mpưm n’hanh hun hao nkôp đah âk năm bah năp dŭt âk, kônh wa dŭt rhơn, hăn ndrel đah Đảng, Ngih dak gay ƀư tĭng ăp nău ntrŭnh mpeh hun hao wăng sa, n’hao prêh nău rêh.

Nkual rđŭng Cheo Reo aƀaơ lĕ n’gut ta săk muh măt mhe, Pŭt nđĭr bah tơm sa play đah âk jay têh nâp jay mhe lĕ jŭt jăng nău têl bah du rơh ŭnh phao blêu, dôl ntơm rgâl săk nơm jêng nkual khlay wăng sa mpeh bah dâng luh nar n’gor Gia Lai.