Ntơm bah ntŭk choih meng dak lêng, ntŭk nkah tahen Gạc Ma rnôk aơ jêng ntŭk tât bah âk nŭih gay ntĭm nti nau ơm ndrle bun dăp nau rŏng neh dak ân âk rơh mom. Ăp năm, âk rbăn tŏ ƀon lan, cán bộ, tahen, đoàn viên, druh ndăm ndrel bu năch tă bah ăp ntŭk bah dak nơm hăn tât gay ma mpoh kthup, nkah tât ăp tahen ơm lĕ khĭt tâm rnôk tâm lơh Gạc Ma năm 1988, gay mât dak lêng huyêng khlay bah neh dak. Yuh Nguyễn Thị Thanh Hà, nŭih ƀư kah tâm ntŭk nkah Gạc Ma mbơh, ăp nar bôk khay 3, ndrel ma nau nkah ơm aơ, rmôt nŭih tât mpoh kthup nkah ăp tahen janh dăng lơn ma âk, ntoh nau nkah jru ngăn bah rơh mom nar aơ đah ăp tahen lĕ roh yor nau đăp mpăn bah gôl dak ƀon tơm: ‘Ntŭk aơ bah năp nơh lah yôk choih, tơm si kơt lah ê geh. Rơh rlau aơ, phung hên tăm âk ngăn tơm si gay ma geh n’hâm. Tât rnôk aơ tơm hao jêng ueh, ntŭk aơ n’ik lơn. Năch tât uănh lơn ma âk, yơn hôm geh dăp, tâm pă tâm pleh đŏng ri ma mô geh nau nkol”.

Ta aơ, ăp mâng kthup geh mpoh lah du nau nkah tât ăp kon nŭih neh Việt lŏ roh săk nơm tâm dak lêng. Bah rnôk aơ 38 năm, tâm lơ 14/3/1988, tâm ntŭk lŭ Gạc Ma, Cô Lin ndrel Len Đao tâm gôl dak Trường Sa, n’gor Khánh Hoà, cán bộ, tahen dak lêng ƀon lan Việt Nam hŏ tâm lơh dăng nâp gay mât nau ƀư tơm neh dak.

 Nar aơ, nuih n’hâm nê hôm gah nkah đŏng ndrel rêng lơn tâm ăp rnôk hăn chop khâl tât ntŭk nkah Gạc Ma. Nô Trần Đăng Đức, nŭih ƀon lan tâm gôl dak Cam Ranh, n’gor Khánh Hoà nkoch:‘Aơ lah du nau vay ơm ueh bah công ty. Ăp năm ri phung hên kŏ dăn tât ta aơ geh ma mpoh kthup nkah tât ăp nŭih kon bah neh dak lĕ roh. Bah nê ntoh nuih n’hâm nkah klâng ndrel ŭch neh dak mro đăp mpăn, hun hao, ngăn lah nkuăl dak lêng ndrel tach ndeh mpar”.

Nau nkah tât Gạc Ma hôm lah nau nkah khlay bah âk rnăk vâl geh nŭih băl mpôl nơm lĕ khĭt tâm ntŭk dak lêng gôl dak. Nau nê mô êng nkah tâm nau ơm, ma hôm lah nau nsôih gay ăp rơh nar aơ nhoat tay jâng tĭng drâu mbŏ, nô nơm gay mât neh, dak lêng bah dak nơm.

 Đah âk nŭih kon bah ăp tahen khĭt kăl e ta Gạc Ma, nau nkah tât mbŏ, nô nơm mô êng lah nau nkoch ơm, ma hôm nau nau ntô̆ n’hao ndrel nau geh nthoi tay nau ơm. Âk nŭih săch trong pah kan tâm tahen, nthoi tay năm mom ân nau mât nau ƀư tơm gôl dak, dak lêng. Yuh Trần Thị Thuỷ, dôl kan tâm Lữ đoàn 146-Trường Sa, kon bu ur tahen khĭt kăl e Trần Văn Phương, nkoch:

‘Năm mom bah mbŏ gâp ndrel ma ăp tahen nơm hŏ huk nting mham tâm nkuăl dak lêng gay mât dak lêng bah neh dak, mât ăp blah neh huyêng khlay bah Việt Nam. Săk gâp dôl tâm năm mom, hôm âk nau gơih n’or, ndri ma ŭch geh kơl an n’hâm soan bah nơm ân nau kan mât neh dak ndrel nau ƀư tơm bah dak lêng”.

Mô êng lah ntŭk nkah ăp tahen khĭt kăl e, ntŭk nkah tahen Gạc Ma hôm lah ntŭk gay ntĭm nti nau ơm âk ân rmôt tahen, ngăn lah cán bộ, tahen mom. Âk rmôt kan tâm Hải quân ƀon lan Việt Nam gay leo tahen tât mpoh kthup, uănh, joi gĭt ăp nau ơm gay ma bun dăp nau nsôih gay mât nkuăl neh dak lêng nơm. Bah ăp nau kan ta aơ, ăp cán bộ, tahen lơn ma rjăp tay nau khlay bah nau đăp mpăn, tă bah nê lŏ ƀư ueh nau vay janh dăng, nsôih nchiăr nti, mra tâm lơh prêh, nsôih mât nâp nau ƀư tơm dak lêng, gôl dak bah neh dak. Trung tá Dương Trọng Hà, Bí thư Đoàn Trung đoàn 196 mbơh:

 ‘Mpoh kthup, nkah gĭt, râng hăn uănh gay ntĭm nti tâm ntŭk nkah lah nau kan ƀa ƀơ bah Trung đoàn 196. Ngăn lah đah ăp cán bộ tahen mhe tât tâm ntŭk kan mra gĭt ăp nau vay ơm bah tahen, quân chủng ndrel ăp nŭih janh dăng, tahen lĕ khĭt hŏ janh tâm lơh, khĭt săk nơm. Đăp mpăn ân ăp cán bộ, tahen nâp nâl mpeh chính trị, nau mĭn, nau rnơm ndrel nau nsôih gay rklaih ăp nau jêr”.

38 năm hŏ rlet rlau, yơn nau ton rjăp mât nâp gôl dak bah kăl e hôm nkah mro tâm neh dak lêng. Ntơm bah ntŭk nkah ơm Gạc Ma nar aơ, nuih n’hâm nê lŏ geh nkoch trêng tay ân ăp kơn mom ndăm, gay ăp nŭih tahen tâm ntŭk bôk trong rlong sial mro mât nâp n’gâr phao, mât nâp nau ƀư tơm gôl dak huyêng khlay bah neh dak./.