Tĭng Nghị quyết hŏ dơi Hội đồng Nhân dân n’gor Gia Lai uănh an dŏng, lam n’gor geh 218 nhih pah kan gưl xã, lôch rnôk n’glăp dơn hôm 77 nhih pah kan gưl xa. Nău dăp rgum dja nsing tâm ăp ntil kơt ntŭk tâm ntêng lêng, tâm ban mpeh nău way, dơh ngăch ntung trong hăn, đăp mpăn njrăng n’gang neh dak- rnă njrăng n’hanh hun hao wăng sa- rêh jêng kon nuĭh.

Ta nkuâl Chư Prông, geh 18 nhih  pah kan, lôch n’glăp nsum dơn hôm 6 xã; tâm nê xã Ia Pia dơi njêng nsing ta nău dăp rgum kơt ơm 3 xã Ia Pia, xã Ia Ga n’hanh xã Ia Vê. Wa Siu Khlo, Bí thư Đảng ủy xã Ia Vê, nkuâl Chư Prông an gĭt, nơm geh ƀư jăp pah kan nkoch trêng jêng nuĭh ƀon lan rƀah gĭt ăp tŏng nău lư mpeh trong nchrăp n’glăp nsum gưl n’gor gưl xã n’hanh rgâl jêng trong leo ƀư n’gâng kan 2 gưl.

“Rnôk he hăn lăp tâm ăp ƀon lan, mâp nuĭh ƀon  lan dơi gĭt nău ŭch rŏng bah khân păng mpeh nău n’glăp nsum ăp nhih pah kan ngih dak, kônh wa dŭt di nuih n’hâm đah trong nchrăp dja. Lơn lah trong nchrăp rdâk njêng trong leo n’gâng kan 2 gưl (ntlơi nhih pah kan gưl nkuâl). Saơ nău n’glăp nsum dja yor ma nău geh nsum ri nuĭh ƀon lan dŭt tâm ban ŭch; mô geh nău mpơl rlăch tay trong nchrăp n’glăp nsum ăp nhih pah kan. Kônh wa dŭt ŭch n’grŏ tĭng, tâm ban ŭch n’hanh hăn ndrel Đảng n’hanh Ngih dak he”.