Kêng măng 17/3, Kruanh Quốc hội Trần Thanh Mẫn ƀư tơm Rƀŭn nchră n’glôch jêh trong kan tâm rgop đah Ủy ban Thường vụ Quốc hội n’hanh Mpôl Kruanh Ủy ban Trung ương Măt Trận Tổ quốc Việt Nam.

Ta rƀŭn nchră, Kruanh Quốc hội Trần Thanh Mẫn uănh lah prêh, năm bah năp 2 ding lĕ ndrel tâm rgop nkra rgâl, an âk nău nchrăp ƀư luật khlay; nchrăp an rơh săch đại biểu Quốc hội n’hanh đại biểu Hội đồng nhân dân ăp gưl.

Kruanh Quốc hội đă, tâm năm tât, 2 ngih pah kan an n’hao tay tâm rgop ndâk njêng pháp luật n’hanh groi nđôi, mât uĕh ƀư tơm bah Hội đồng mbơh ntĭm, ăp nuĭh way kan, nŭih khoa học tâm mât uănh uĕh nău kơl; nkre, an n’hao uĕh mâp nuĭh ƀon lan bah đại biểu Quốc hội n’hanh đại biểu Hội đồng nhân dân ăp gưl, đăp mpăn ăp tâm ton, nău ton bah năp nŭih ƀon lan dơi ƀư uĕh.

Lah rjăp nău rƀŏng bah năm 2026 an hao ngăch gay geh hao jêng 2 rnoh mrô, tĭng Kruanh Quốc hội, 2 ding tâm rgop gay an âk nău kơl, trong ƀư ƀĭt joet gay wăng sa-rêh jêng hun hao, mât njrăng bri dak-rnă njrăng đăp mpăn, ndâk njêng trong chính trị kloh uĕh nâp dăng, n’hao kan ndrel bah dih, trong kan njrăng n’gang sa khâm, rklâm, mpŭng lir.