Nô Phàn Diếu Hồ, nuĭh Dao, ta bản Nậm Lúng, xă Bản Lang, nkuăl Phong Thổ (n’gor Lai Châu) geh 6 nuĭh, yơn geh 2 nuĭh pah kan tơm, wăng sa bah rnăk wâl âk năm knŭng knơm tâm rlău 5.000 m3 ba lŏ du yan. Bah tơm prăk ntop kơl bôk nău kan hun hao wăng sa, rêh jêng nkual ƀon lan rnoi mpôl đêt n’hanh nkual yôk, ur sai nô lĕ rgâl an tăm chanh rse n’hanh mât sŭt sŏk dak, nău geh bah nĕ nar lơ hao âk. Bôl mô hŏ sâm geh ngăn, yơn ur sai nô ntrŭnh ƀư sam ƀŭt luh săk rnăk ach o bah bản, bah xă.

Bah năp đaơ rnăk wâl gâp mpeh tâm rnăk ach o tĭng săk bah xă 4 năm. Năm 2024 lah rnăk ŭch êng nchih sam ƀŭt rklaih luh ach o, gay ngih dak an tơm prăk an ăp rnăk jêr jŏt lơn.

Ndrel đah rnăk nô Phàn Diếu Hồ, ta n’gor Lai Châu lĕ geh âk rnăk nchih sam ƀŭt luh săk rnăk ach o. Aƀaơ, tâm yô̆ ƀon lan n’hanh nău nkoch tâm pă jêr jŏt lĕ rêng hvi ăp ƀon lan nkual rnoi mpôl đêt ta ntŭk aơ. Ăp rnăk aơ geh nău mĭn dŭt uĕh.

Rnăk wâl mô ŭch kâp tâm ngih dak, yor gâp lĕ uănh bah kơi hôm e dŭt âk rnăk jêr jŏt lơn rnăk wâl gâp âk lơn.

Gâp hôm e mom, hôm e soan, gâp an nsrôih n’hanh gâp ŭch êng nchih sam ƀŭt dăn luh rnăk ach o, gay kơl an nău ntop kơl bah ngih dak an ăp rnăk hôm e jêr jŏt lơn rnăk gâp.

Bôk năp knŭng du đêt rnăk ta xă Bản Lang, yơn ntrong leo nchih sam ƀŭt dăn luh rnăk ach o aƀaơ lĕ rêng hvi bah nkuăl. Kơt ta xă nkual prêh, n’har bri Sin Suối Hồ, ntŭk dŭt âk bah nuĭh Mông n’hanh Dao, lah nkual rđŭng ach o bah n’gor, yơn knơm nău nsrôih lăp bah n’gâng kan ƀon lan, tâm năm 2024 lĕ geh rlău 30 rnăk ŭch êng dăn rklaih luh ach o, ndơ̆ rnoh rnăk ach o ta xă hŭch aƀaơ hôm rlău 40%. Wa Sùng A Lùng, Groi Kruanh UBND xă Sin Suối Hồ an gĭt:

Nău nchih sam ƀŭt ŭch êng dăn rklaih luh ach o ta ntŭk lĕ rêng hvi tât ăp rnăk êng tâm bản, tâm xă. Bah aơ ngih dak mbra geh tay prăk ntop kơl ăp rnăk êng n’hanh lah n’hâm soan an ăp rnăk lĕ rklaih ach o nsrôih hao ƀư ndrŏng tâm di.

N’gor n’har bri Lai Châu dơi gĭt tât lah nkual rđŭng ach o lam dak, đah rnoh rnăk ach o hôm rlău 20%. Ta năp đaơ, âk rnăk hôm geh nău mĭn kâp tâm nău ntop kơl bah ngih dak. Knơm gưl ủy, n’gâng kan ƀon lan n’hanh ăp rmôt kan nsum mpôl ntrôl dăng nkoch trêng, rgŏ jă n’hanh ƀư tĭng uĕh ăp nău kơl n’hŭch ach o, jêng nuĭh ƀon lan lĕ ntơm n’hao nău wât, gĭt saơ, nsrôih hao rklaih luh ach o.

Joi kơp tâm năm 2024, lam n’gor geh rlău 4.000 rnăk ach o, tâm nĕ geh bơi 500 rnăk ŭch êng nchih sam ƀŭt dăn luh săk rnăk ach o. Nkuăl n’har bri Phong Thổ lah ntŭk hăn lor tay mpeh trong kan n’hŭch ach o n’hanh rnoh nuĭh ƀon lan ŭch êng dăn luh rnăk ach o.

Wa Mai Thị Hồng Sim, Groi Kruanh UBND nkuăl Phong Thổ an gĭt, năm 2025 aơ, nkuăl nsrôih hŭch bah 4-5% rnăk ach o, ndơ̆ rnoh rnăk ach o jŭr hôm nklăp 27%.

Gay đăp mpăn an nuĭh ƀon lan rklaih luh ach o nâp nâl, kônh wa đăp mpăn geh nău rêh ri nkuăl mbra dŏng kơt bôk nău kan rƀŏng tĭng lam dak, hun hao wăng sa rêh jêng nkual rnoi mpôl đêt n’hanh nkuăl yôk; bôk nău kan rƀŏng tĭng hun hao wăng sa rêh jêng n’hŭch ach o nâp nâl n’hanh ndâk njêng thôn ƀon mhe. Nkre, nkuăl mbra ntrôl ăp bôk nău kan ntop kơl mpeh ntrong ƀư joi nău rêh, hun hao wăng sa an kônh wa.

Nău âk nuĭh ƀon lan ŭch êng nchih sam ƀŭt dăn luh rklaih rnăk ach o mô knŭng lah săk rnglăy bah ăp trong ƀư ntop kơl bah ăp gưl n’gâng kan ƀon lan, ma hôm lah an saơnuih n’hâm nchrăp êng hao rklaih luh ach o bah ƀon lan nkual prêh. Nău aơ lĕ mĭn lah soan dăng tâm rnglăp, nău nsrôih, nsing nơm tâm du nău rêh rgŏ năp uĕh ang lơn ta play neh ƀon tơm.