Wa Trần Quang Bình, tơm ntŭk tăch ndơ ndâk nkra ngih tâm Dak Lak geh 5 ntŭk ngih dôl nkra ri lĕ 5 ntŭk kŏ dôl nsrŭng yor mô tŏng choih. Bol ma rgum ăp ntŭk mơng gay ma rvăt ma ê dơi geh ueh. Wa Bình rvê ngăn yor ntŭk păng kan dôl ma mbrơi, mra geh nau mhal tih bah ntŭk ndơn kan ƀư mbrơi:

            ‘Rmôt kan hên dôl ƀư du đê̆ ntŭk ngih tâm Dak Lak ndrel Dak Nông. Bah năp nơh, ăp rnôk rvăt choi nkra ri ntŭk bu tăch choih bu rdeng leo tâm nar nê, rnoh nklăp 300 rbăn/m3. Âk nar êp aơ, rvăt tâm ăp ntŭk bu tăch choih ri kŏ hao ntơm 70-80% ma mô geh choih rvăt ơm. Rnoh hao khlay êng nau khuch tât nau ngăch geh bah ntŭk nơm nkra ri hôm khuch đŏng tât nau ngăch jêh. Lah mbrơi ri tơm ntuh kơl bu mhal, ri ma đă ăp n’gâng kan, ntŭk kan kơl an nau kan aơ”.

            Ndrel ma nau bah wa Trần Quang Bình lah rnoh choih hao khlay tâm âk ntŭk. Uănh tâm nkuăl ƀon têh Buôn Ma Thuột, ăp nkual Cư M’gar, Krông Búk, Ea H’Leo, nkual têh Buôn Hồ...ân saơ, choih nkra ngih rnôk aơ hao ntơm 70-80%, mô lah geh ntŭk hao rlau 2 tŏ bah rnôk aơ du khay. Yuh Tạ Bích Trâm, tơm ntŭk tăch ndơ nkdâk ngih tâm Phường Tân Lợi, nkuăl ƀon têh Buôn Ma Thuột mbơh, nklăp du khay bah năp nê, rnoh choih tâm ban ma 300 rbăn/m3, ri rnôk aơ rlau 500 rbăn/m3. Bol ma rnoh choih hao khlay, yơn âk ntŭk hôm ndâk nkra kŏ mô tŏng choih, mô geh choih tăch:

            ‘Rnôk aơ rvăt choih nar lơi ma jêr n’ăp ma ntŭk hên tăch ri hên kŏ mô tŏng, ê nkoch ôh ma ƀon lan bu rvăt. Du khay bah năp nê ri gâp rvăt ntŭk bu sŏk choih, geh nklăp300 rbăn/m3, yơn rnôk aơ rlau 500 rbăn/m3. Rnoh choih hao khlay ri ma ntŭk tăch ndơ hên saơ ndrel ƀon lan nkra ngih ri mâp nau jêr ngăn. Bol ma rnoh khlay yơn lah rvăt kŏ mô geh choih ơm. Choih mô geh ri loih, xi măng...kŏ jêr ngăn nơm geh tăch, yor mô geh nŭm ndơ ndâk ƀư. Hên tăch ndoh ndơ rnôk aơ dâk n’gâng du ntŭk dơm”.

            Mpeh nau aơ, du rđau kan bah N’gâng kan tuch tăm ndrel ntŭk ntu n’gor Dak Lak mbơh, nkô̆ tơm bah nau choih hao khlay lah yor dak me jur soăt, âk dukmpan mô dơi hăn sŏk choih nâm ơm. Êp nê, âk ndơ dŏng sŏk choih lĕ rlau năm dơi dŏng, dôl kâp ntŭk kan ƀư săm ƀŭt uănh năl tŏng dơi nau kan tĭng nau ntrŭnh bah pháp kuật. Gay rklaih nau aơ, N’gâng kan đă ăp rmôt pă săm ƀŭt ân kan gay ntrŭt dăng nau sŏk, nkre đăp mpăn nau ntrŭnh bah pháp luật gay tŏng tăch. Yơn lah, nau ma dak me soăt jêr sŏk choih ri ta Dak Lak geh mro, ăp ndơ dŏng sŏk choih lĕ rlau khay dŏng, ri ma mô tŏng choih ndâk ngih, ƀư rnoh hao khlay.

            Trung tá Nguyễn Đức Duy-Groi Kruanh Jrâu kan Cảnh sát văng sa, công an n’gor Dak Lak mbơh, lơ 5/5, N’gâng kan công an geh nau rđau đă công an ăp n’gor uănh nâp nau sŏk, rdeng leo ndrel tăch choih tâm dak gay nkra ngih. Jrâu kan cảnh sát văng sa tâm rgop ma Jrâu kan Cảnh sát trong ndrel công an ăp nkuăl ƀư nau mêt uănh tâm 21 ntŭk sŏk choih tâm n’gor. Yơn lah, nkô̆ mêt uănh lah ƀư nâp ueh nau sŏk, leo ndrel tăch ndơ. Nau mbơh ân lah, nau mêt uănh bah công an ƀư âk ntŭk nsrŭng, ƀư mô tŏng ndrel rnoh hao khlay lah mô geh nau ngăn:

            ‘Nau kan mêt uănh aơ gay ƀư nâp nau kan sŏk choih, tăch rgâl. Ntŭk ƀư nau kan hôm geh dơi sŏk, tăch rgâl tĭng nau ntrŭnh bah pháp luật. Lah tâm nrôk mêt uănh, phung hên saơ ntŭk ƀư nau kan, nŭih lah geh nau têm prăp ndơ, njêng jêng nau mô tŏng rlăm tâm ntŭk tăch, geh nau tih pháp luật, hên mra mhal ân rjăp, der nau kan mô tŏng choih bah ntŭk tăch lah nau tih”.

            Nau mô tŏng choih ndâk ngih dôl ƀư khuch tât nau ngăch kan bah ăp ntŭk tâm Dak Lak, ƀư ntŭk kan tăch rgâl ndrel ƀon lan tât jêr. Rnoh choih hao khlat mô knŭng khuch tât prăk dŏng, ma hôm khuch nau ndâk nkra, ƀư âk ntŭk tăch mô hôm geh ndơ ma tăch. Bol ma n’gâng kan hŏ lăp ƀư nau kan sŏk, rdeng leo ndrel tăch choih, yơn ngăn lah, ân geh nau kan dĭng lĕ ndrel jŏ jong gay đăp mpăn nau geh tăch đăp mpăn, der nau mô tŏng choih jêng mro. Tâm rnôk nau ŭch ndâk ngih vâl lơn ma hô, nau rđau, nkân uănh ntŭk ƀư nau kan tăch rgâl ndoh ndơ ndâk nkra du trong kloh, tam lah nau ŭch ndal, gay tâm ban nau geh dơi đah Ngih dak, ntŭk kan ndrel nŭih ƀon lan./.