Tĭng nău mbơh tơih bâh Uỷ ban săch kruanh n’gor Đăk Lăk, lam n’gor geh  bơi tât 2,3 rkeh ƀon lan tât râng săch kruanh. Kơp tât 19 mông lơ 15/3, rnoh ƀon lan hăn nklăch phiếu geh rlău 99,9%. Dŭt nkah ngăn, lĕ geh âk xã, phường, ƀư lôch lĕ rngôch rnoh ƀon lan tât râng nklăch phiếu. Nău geh aơ an saơ nău dơn kan, nău tâm ban n’hanh nău mĭn kan chính trị âk bâh ƀon lan ta n’gor.

Tĭng nău mbơh bâh Uỷ ban săch kruanh n’gor Đăk Lăk, bol ma rnoh ƀon lan tât râng nklăch phiêú âk, ăp ntŭk tâm n’gor hôm nha mô geh mât kan, an geh mbơh tơih tay an tâm ban ăp trong kan mât đăp mpăn rnă njrăng, đăp mpăn ta ăp nkual nklăch phiếu. Mpôl kan công an, tahen n’hanh ăp mpôl kan têh geh mât nău kan uănh nđôi, mât njrăng, gĭt na nê̆ nău ta ntŭk, mbra geh mât njrăng ăp nău ntoh luh, mât đăp mpăn rơh săch kruanh geh ƀư ueh lăng ngăn.

Wa Cao Thị Hoà An, Uỷ viên Trung ương Đảng, Groi Bí thư rnâng kan n’gor Uỷ, Kruanh HĐND n’gor, kruanh Uỷ ban săch kruanh n’gor Đăk Lăk an gĭt, tât rnôk aơ, mbra dơi lah na nê̆ rơh săch kruanh ta n’gor lĕ geh ƀư geh âk nău dơi ueh.

“Tât aƀaơ an geh mbơh lah nău rhơn bâh rơh săch đại biểu Quốc hội n’hanh Hội đồng nhân dân ăp gưl geh ƀư dŭt rhơn nđơr, di lah nar tâm mâp bâh lĕ ƀon lan. N’hanh nău aơ mpơl nău nsum săk soan  du nuih n’hâm n’hanh ƀon lan dŭt rhơn rnôk geh njôt n’ha phiếu n’hanh tât ntŭk gay ma săch nuĭh kan, săch ăp nuĭh ma nơm knơm n’hanh knơm tâm nău rêh let năp tay, knơm ta ăp nău kan tâm let năp tay. Bâh ăp nău knơm nĕ mpơl nău ueh lăng bâh nuĭh ƀon lan đah Đảng, đah n’gâng kan ngih dak ta ntŭk n’hanh đah lĕ trong kan chính trị. Ƀon lan tât đah du nău dơn kan têh khlăy lah du hê nuĭh ƀon lan, yơn njoăl ta nĕ ăp nău ŭch nău rŏng nău knơm bâh nơm đah ăp đaị biêủ.