Mpôl pah kan bah UBND n’gor Lâm Đồng n’hanh n’gor Dak Nông mhe hăn uănh n’hanh geh nar pah kan gay tâm ban ŭch nău ntuh kơl ăp trong hăn nthoi 2 n’gor n’hanh trong têh hăng ngăch nthoi 3 n’gor Dak Nông-Lâm Đồng-Bình Thuận. Kruanh 2 n’gor Dak Nông, Lâm Đồng tâm ban ŭch kơl lor ntuh kơl nkra trong Quốc lộ 28 lvang Gia Nghĩa-Dak Som-Di Linh đah jong nklăp 104 km. Trong hăn aơ mât nău khlay tâm boăt nthoi Quốc lộ 14 đah Quốc lộ 20, joi ƀư săk rnglăy nău geh hun hao wăng sa bah nkual.

2 n’gor tâm ban ŭch đŏng ƀư tĭng nău nchrăp ƀư trong mhe bah Gia Nghĩa (Dak Nông) tât Bảo Lâm (Lâm Đồng), rgop rhoăt đêt trong tât Bảo Lộc nklăp 25km, n’hŭch âk ndeh an Quốc lộ 28, nkre nthoi nklang công nghiệp bô xít Tân Rai n’hanh Nhân Cơ-2 nău nchrăp ƀư khlay bah nkual. Ăp n’gor ntrŭt ngăch uănh trong têh hăn ngăch nthoi nkual ƀon têh Phan Thiết (Bình Thuận)-Nkual ƀon têh Đà Lạt (Lâm Đồng)-Nkual ƀon têh Gia Nghĩa (Dak Nông) gay săch trong ntuh kơl m’hâm an dăch ngăn, ntêm nkrem ngăn.