Kêng măng 20/3, Thủ tướng Phạm Minh Chính lĕ uănh nđôi, ntrŭt đă mbơh ƀư nău nchrăp ƀư Tach ndeh păr Quốc tế Long Thành. Nău nchrăp ƀư ntuh kơl Tach ndeh păr Quốc tế Long Thành (Đồng Nai) lvang 1 geh dĭng lĕ rnoh ntuh kơl rlău 109 rbăn rmen prăk, nchrăp jêh tâm năm 2026. Ƀư tĭng ntĭm rđău bah Thủ tướng, năm bah năp, N’gâng kan Xây dựng n’hanh ăp nuĭh  ntuh kơl lĕ mbơh ƀư ăp trong mkra gay rhoăt đêt ngăch ntuh kơl, tĭng nĕ mbra ntơm jêh nău nchrăp ƀư tâm năm aơ.

Pah kan đah ăp n’gâng kan, nău kan, n’gor, nuĭh tơm ntuh kơl, nuĭh ndranh, Thủ tướng Phạm Minh Chính lah rjăp, Nău nchrăp ƀư Tach ndeh păr Quốc tế Long Thành geh nkô̆ nău dŭt khlay. Jêh ăp nău nsrôih, dŭt n’hâm, tâm di uĕh tach ndeh păr mhe lĕ geh aƀaơ. Đă nsrôih tât lĕ lơ 31/12/2025 ntơm jêh nău nchrăp ƀư gay wơt rơh mpăr bôk năp, Thủ tướng Chính phủ ntĭm kloh ăp nău nchrăp ƀư ndơ ƀư mô geh rgâl nău rƀŏng; ăp n’gâng kan, nău kan, n’gor, nuĭh ndranh an nsrôih da dê, rgum ntrôl ngăch rdâk ƀư.