Kêng măng (18/03) ta Nhih pah kan Trung ương Đảng, Tổng Bí thư Tô Lâm ƀư tơm rơh hop way nkô̆ mpeh công nghệ têh khlay bah Ban rđău đă Trung ương mpeh hun hao khoa học, công nghệ, rgâl blău mhe n’hanh rgâl mbrô. Lah n’glôch jêh tâm nchră, Tổng Bí thư n’gluh 6 trong rƀŏng têh gay Ban rđău đă n’hanh ăp n’gâng kan ăp n’gor tĭng ƀư tâm let năp tay, tâm nê ntrŏng kloh rnoh tât hun hao công nghệ têh khlay nkre đah trong nchrăp hun hao neh dak, nău geh jŏ jong bah neh dak.

Tổng Bí thư đă, rgâl mhe dăng trong ntĭt leo tĭng ƀư; ntrŏng kloh nău dơn kan nuĭh mât bôk; nkre, ntrŭt ntrôl dăng reh n’gu rgâl blău ƀư mhe, ntop kơl doanh nghiệp ntơm njêng nău kan rgâl blău ƀư mhe, doanh nghiệp khoa học n’hanh công nghệ; jêng ăp ntŭk rgum rgâl blău mhe tŏng dăng, tŏng ngăch rplăch gay buăt nthoi gŭ mĭn đah ntŭk tăch rgâl. Ndrel đah nău ŭch geh, ra uănh, rgâl di, rdâk njêng bôk nău kan ntĭm nti tơm nuĭh kan săk blău âk rhŏ dŏng hun hao công nghệ têh khlay, Tổng Bí thư lah rjăp, lam trong kan chính trị ân dâk kan dăng lơn, lĕ nuih n’hâm lơn, nsĭt geh nău tam lơn. Nău neh dak ŭch geh rnôk dja mô dơn lah nău nsrôih chính trị, ma lah lôch geh nău dơi ngăn ngăn, lah nău rvah kan ngăn bah lam trong kan chính trị, nsum mpôl doanh nghiệp, rmôt nuĭh gĭt blău, nuĭh khoa học n’hanh lam rêh jêng kon nuĭh./.