Ta rơh tâm nchră, Tổng Bí thư Nguyễn Phú Trọng dŭt n’hâm mbah rhơn Tổng thống Putin dơi nuĭh ƀon lan nsing nơm săch tay ƀư Tổng thống Liên bang Nga năm kan 2024-2030 đah rnoh phiếu âk ngăn tâm bah ri aơ bah Liên bang Nga, nsing nơm n’hanh nău kơl bah nuĭh ƀon lan Nga đah Tổng thống Putin tâm nău rđău neh dak Nga hun hao tâm lvang mhe.

Tổng thống Putin mĭn lah Việt Nam lah băl, lah dak kan ndrel nsing nơm bah Liên bang Nga. Tổng thống Putin nkoch nău rhơn ta năp ăp njoat hun hao uĕh bah tâm boh ăp ding ta lĕ rngôch ăp ntil nău. 2 kruanh lĕ tâm nchră n’hanh tâm mpeh du đêt trong nchrŏng têh gay ntrôl kan ndrel ăp ding tâm năm tât ta âk ntil nău kơt rnă njrăng-mât njrăng bri dak, wăng sa-tăch rgâl, văn hóa, pâl nđaih.