Việt Nam geh rnoh hvi dak lêng rlău 1 rkeh km2, âk bơi 30% rnoh hvi dak lêng biển Đông, đah nklăp 3.000 gôl dak têh, jê̆ n’hanh 2 ndru gôl dak lah Hoàng Sa n’hanh Trường Sa. Tâm nuih n’hâm ăp nuĭh ƀon lan Việt Nam, lơn lah ăp nuĭh ƀon lan lơh joi ka hŏ krêp dêh đah dak lêng âk rơh aơ, nkual dak lêng Hoàng Sa, Trường Sa lah ntŭk lơh joi ka way ơm, lah ntŭk joi geh nău rêh, lah nting mham mô dơi tăch luh bah me neh Việt Nam.

14 năm deh lor bôk năp tĭng jâng bơ̆ hăn dak lêng, lơh joi ka ta Hoàng Sa, nuĭh lơh joi ka Nguyễn Lợi, nkuâl gôl dak Lý Sơn, n’gor Quảng Ngãi hŏ năl dơi têh hvi bah dak lêng, bah nău rhơn rnôk joi geh âk ka, bah tiăt  boh bah ăp dak rhal…rlău 40 năm nđơn tay nău kan bơ̆, nkrêp dêh đah buk mpan, đah dak lêng. Wa Lợi mĭn lah, đah lơn âk nar khay wăng sa ta dak lêng, ri hăn luh dak lêng mơ lah ƀon tơm he nơm”:

Gôl dak Hoàng Sa, Trường Sa lah bah Việt Nam jêng bol dah nău jêr jŏt ri gâp nha hôm hăn đŏng, rôih hăn nkre đah hun hao wăng sa, nkre mât njrăng ƀư tơm dak lêng gôl dak Gâp  hăn krêp dêh  đah dak lêng an kon său jêh aơ tay păng hăn tĭng he.

Ăp nuĭh ƀon lan lơh joi ka Lý Sơn, ntơm bah rnôk deh luh, gĭt lah Hoàng Sa lah nkual dak lêng ma ăp rơh kơn u che he hŏ mât njrăng hŭk âk nting  mham;  hŏ ntơ lah nuĭh ƀon  lan Lý Sơn ri ân geh  nău dơn kan mât ndray. Nuĭh ƀon lan lơh joi ka Nguyễn Ngọc Khánh ta Quảng Bình mĭn lah đŏng, hăn luh dak lêng mô dơn lah joi nău  rêh, ma nê  hôm lah nău dơn kan mât ndray du gâl nting mham ƀư tơm huêng khlay bah neh dak:

Mpôl  hên hăn kan ta dak lêng dŭt ơm jŏ, aƀaơ hôm lah nău  dơn kan, dŭt rhơn  n’hao êng săk rgop mât đăp mpăn, mât njrăng dak lêng gôl dak bah neh dak bah he.

Đah ăp nuĭh ƀon lan lơh joi ka tâm ban kơt ăp nuĭh ƀon lan neh Việt, Hoàng Sa, Trường Sa lah neh dak Việt Nam bah dŭt jŏ ơm; lah nkual neh ma u che he ntlơi an tay, lah ntŭk sĭt hăn way bên bah kônh wa hang rhiăng năm aơ.

Tiến sĩ Luật Trần Công Trục, Kruanh Ban n’har bri  ơm bah Chính phủ an gĭt: ndơ an saơ nău kăl e, nău tâm di mpeh ƀư tơm bah Việt Nam đah 2 ndru gôl dak dja hŏ n’hanh dôl dơi geh âk dak, nsum mpôl lam ntŭr neh n’hanh âk nuĭh khoa học lah rjăp: Việt Nam lah neh dak lor bôk năp tâm lịch sử hŏ dŏng n’hanh  tĭng ƀư tơm bah he mbro ma Ngih dak đah 2 ndru gôl dak Hoàng Sa n’hanh Trường Sa ntơm bah rnôk păng nha hôm bri  lĭng dak rngot, dŭt đêt ntơm bah rôk năm 17 rnôk păng mô hŏ geh du dak ƀư  tơm,  an  tât rnôk Hoàng Sa geh ăp mpôl tahen Trung Quốc pit in nar 19/1/1974. Nău mât dŏng n’hanh tĭng ƀư nău dơi bah Việt Nam ta 2 ndru gôl dak dja way ƀư mbro, đăp  mpăn, tâm di đah nău way mât dŏng neh dôl dŏng aƀaơ n’hanh nău way tơm nuĭh dŏng ngăn bah Công pháp quốc tế.

Nău way Việt Nam nsing tâm nê lah nău way geh tơm nuĭh dŏng ngăn, he hŏ an saơ ngăn đah lam ntŭr neh lah ngih dak Việt Nam lah dak lor bôk  năp geh tơm dŏng, tĭng ƀư Việt Nam geh ăp tŏng ndơ an saơ kăl e, ntŭk nsing tâm di geh rnoh khlay gay an saơ di. He sŏk ntơm mông nar lah ta n’gul rôk năm tâl 16, bôk rôk năm tâl 17.

Đah ăp nuĭh ƀon lan Việt Nam, ƀư tơm n’hanh lam lĕ rngôch neh dak lah huêng khlay n’hanh mô dơi lơh in. Yor kơt nê̆, rnôk ƀư tơm neh dak geh lăp pit in, tahen  n’hanh ƀon lan he mbra dâk rlăch ndăng, mô dơi chuh chŭn, mô kă  rnam roh yot gay mât nău đăp mpăn an dak lêng gôl dak, mât njrăng n’har bri neh dak. Tĭng Trung tướng Nguyễn Ngọc Tương, Groi Chính ủy ơm Học viện Quốc phòng: Rlăch ndăng mât njrăng ƀư tơm dak lêng, gôl  dak lah nkô̆ nău khlay, duh ndal, jŏ jong, jêng, nău mĭn nsum  lah “Rôih nŏng, mô plơ̆ rŭch”, “sŏk nău mô dơi rgâl, rdâng lơh đah ăp ntil nău rgâl”, “Rôih tĭng nău way têh jong, ngăch ngăr mpeh trong rlăch ndăng”; ăp ntil  mpeh nău way rôih mât ndray, ăp ntil mpeh đăp  mpăn, ƀư tơm, lam lĕ rngôch neh dak mô dơn rong an dơm, yơn ân geh trong rgâl lơh tâm di, mât nâp ƀư tơm dak lêng, gôl dak yơn ân đăp  mpăn chính trị, mât nâp ntŭk gŭ rêh đăp  mpăn gay hun hao neh dak.

Đảng he way mpư  n’hao nău dơn kan mât njrăng nâp đăp mpăn, ƀư tơm  lam lĕ rngôch neh dak yơn ân nkre mât  nâp ntŭk gŭ rêh bah tâm lơh tâm su, đăp mpăn gay hun hao neh dak.  Nău dja mpơl dŭt kloh tâm siƀŭt nchrăp lor dăn đă ta Đại hội Đảng XIII mhe aơ. Du nkô̆ nău đŏng ma Đảng he lah rjăp lah n’gâng kan mât njrăng ƀư tơm dak lêng gôl dak, lah n’gâng kan bah lam Đảng, lam ƀon  lan, lam tahen n’hanh ân ntik n’hao suan dăng rgum, tâm nê sŏk mpôl tahen ƀon lan ƀư n’gâng tơm v.v… Lĕ rngôch ăp nkô̆ nău nê lah dŭt n’hâm tơm khlay  n’hanh dŭt khlay đah du dak geh dak  lêng kơt he; nkre păng tâm di đah trong rƀŏng hun hao nsum bah lam ntŭr neh aƀaơ.

Đảng, Ngih dak n’hanh ƀon lan he way tĭng du trong nchrăp: “Việt Nam rôih nŏng, mô  plơ̆ rŭch mât njrăng ƀư tơm, neh dak, gôl dak lêng tĭng luật pháp dak bah dih”. Rgum suan dăng, rdâk njêng ntŭk nsing ndăl njrăng n’gang neh dak lam ƀon lan, rnă njrăng ƀon lan, “nsing ndăl nuih n’hâm ƀon lan” ta dak lêng, gôl dak tâm bah ri aơ hŏ njêng păng khêl loih nking nchăng gay mât njrăng nâp tĭng mbal neh, laih dak lêng ntŭk bôk trong rlong sial neh dak./.