Nkhêp nkah ndray 49 năm Nar Rklaih luh miền Nam, dơn ngoăy neh dak (30/4/1975-30/4/2024), ôi 26/4, Mpôl đại biểu Ban Chấp hành Trung ương Đảng, Kruanh dak, Quốc hội, Chính phủ, Ủy ban Trung ương Mặt trận Tổ quốc Việt Nam hŏ an kao si, lăp Lăng weh chop Kruanh Hồ Chí Minh n’hanh mpoh nhang, nkah gĭt ăp Tahen ơm dăng janh khĭt tâm lơh tâm su ta Ndah nkah gĭt ăp tahen ơm dăng janh khĭt tâm lơh ta Bắc Sơn.

Bah năp huêng phan Kruanh Hồ Chí Minh, Mpôl ntơh măt hŏ mpơl nuih n’hâm  nkah gĭt dŭt n’hâm, chŭn mbah nkah gĭt ăp n’hâm suan têh kuâng bah Wa đah n’gâng kan cách mạng bah Đảng n’hanh rnoi nuĭh he. Wa hŏ n’groh an lĕ du nău  rêh an ƀon lan, an neh dak, leo Đảng he, ƀon lan  he ƀư jêng geh nău dơi n’gloh ang. Kao si bah Mpôl hăn  geh nău nchih: "Mbro mbrăng nkah gĭt Kruanh Hồ Chí Minh têh kuâng."Lịch sử neh dak mbro mbrăng nkah gĭt rnôk 1 mông 30 mnĭt nar 30/4/1975 rnôk lha cờ cách mạng mpăr kalơ chor Dinh Độc Lập – ntŭk gŭ n’glĕ dŭt bah n’gâng kan Sài Gòn. Bah aơ, miền Nam rklaih luh lam lĕ rngôch, bri dak Việt Nam dơn ngoăy du dor jong. 49 năm lôch nar rklaih luh, Việt Nam ntơm bah du dak ach o, hŏ rlău ăp krit jêr, ntul rlong, tĭng kơn nsĭt geh ăp nău dơi têh kuâng, jêng ngoăy tâm ăp dak mpeh rmôt ăp dak hun hao âk tâm nkual n’hanh lam ntŭr neh./.