“Học viện Kỹ thuật tahen an ntrôl dăng wăch rgum, ntĭm nti, dŏng nuĭh gĭt blău, ndâk njêng rmôt cán bộ tâm ban nău ŭch nău kan tâm nu nău mhe”. Aơ lah nău đă bah Tổng Bí thư Tô Lâm rnôk tât khâl n’hanh pah kan đah Học viện nar 17/3.

Nkoch bri đêp rmên đah âk cán bộ, nai, sinh viên, tahen lĕ Học viện, Tổng Bí thư Tô Lâm rnê rhơn ăp nău geh bah Học viện Kỹ thuật tahen tâm bơi 60 năm bah năp, ntoh lư lĕ ntĭm nti an Tahen n’hanh neh dak nuĭh kan uĕh blău ngăn tâm âk ntil nău, đah rlău 200 tiến sĩ, 1.500 thạc sĩ, 3.000 kỹ sư tahen n’hanh ƀon lan.

Aƀaơ ngih samƀŭt dôl ntĭm nti rlău 6.000 học viên, sinh viên. Jêh rnôk rblang nu nău tâm dak n’hanh dak bah dih, Tổng Bí thư nkoch kloh, Nghị quyết Đại hội 14 bah Đảng mĭn lah: Ndâk njêng Tahen ƀon lan cách mạng, chính quy, tinh nhuệ, mhe tâm năm kan 2025-2030, yor nê đah nău kan ntĭm nti nuĭh kan uĕh blău ngăn, Học viện an rgum ƀư tĭng 5 trong nchrŏng khlay tâm di nău đă kan tâm nu nău mhe. Tâm nĕ rgâl mhe âk nkô̆ nău, bôk nău ntĭm nti tĭng trong mhe, ngăn ngên n’hanh hao prêh, tĭng rjăp đah nău ngăn, ntrôl dăng rgum lăp lam ntŭr neh. Tổng Bí thư đă, Học viện ntrôl dăng rgâl mhe mrô; ndâk njêng jêng ngih samƀŭt đại học mĭn njêng têh ngih dak, ƀư tơm leo ăp ntil nău mĭn njêng khoa học kỹ thuật tahen, lah rgum rgâl mhe mĭn njêng bôk năp bah neh dak.