Kêng măng 17/3, đồng chí Tô Lâm, Tổng Bí thư Ban Chấp hành Trung ương Đảng Cộng sản Việt Nam lĕ pah kan đah N’gâng kan Công thương n’hanh du đêt n’gâng kan, nău kan geh tât mpeh tâm boh tăch rgâl lam ntŭr neh n’hanh boăt nthoi tăch rgâl đah dak khlay tâm rnôk ntŭk-chính trị, ntŭk-wăng sa lam ntŭr neh aƀaơ.

Jêh rnôk djăt nău mbơh bah N’gâng kan Công thương n’hanh ăp nău rgop ntoh ngơi rgop bah ăp đại biểu râng rƀŭn, đồng chí Tổng Bí thư đă N’gâng kan Công thương mĭn njêng tay, djăt tŏng ăp nău rgop ta rơh rƀŭn, ndăn kơp uănh n’hanh mbơh Bộ Chính trị, Ban Chấp hành Trung ương Đảng ăp nău hôm e nkân ta tâm boh wăng sa-tăch rgâl đah he n’hanh dak khlay n’hanh dăn đă trong mkra. Mpeh nchrŏng trong hun hao tâm boh wăng sa-tăch rgâl đah he n’hanh dak kan ndrel tâm năm tât, đồng chí Tổng Bí thư lah rjăp, nău ntrŭnh bah Đảng, Ngih dak Việt Nam lah nâp nâl trong hăn tâm rnglăp bah dih đăp mpăn, ƀư tơm yor đăp mpăn, dăch dêh, kan ndrel n’hanh hun hao, rgop ăp ntil, tâm rgop ăp trong tâm boh lam ntŭr neh, đăp mpăn tĭng nău geh ngih dak, rnoi nuĭh hao ntŭk gŭ prêh ngăn.