UBND n’gor Dak Lak mhe geh samƀŭt njuăl ăp n’gâng kan, ban, nău kan, UBND gưl nkuăl, nkual têh, nkual ƀon têh n’hanh ăp ntŭk kan sự nghiệp mpeh ngih dak, đă ƀư tĭng rjăp ăp nău kơl, trong ƀư geh tât nău dăp rmôt n’gâng kan ƀĭt joet tĭng ntĭm rđău bah Chính phủ n’hanh N’gâng kan Nội vụ. Tĭng nĕ, nău mbơh ƀư tĭng tâm ăp Nghị quyết mrô 178 n’hanh 67 bah Chính phủ, ndrel đah ăp samƀŭt ntĭm bah N’gâng kan Nội vụ n’hanh UBND n’gor. UBND n’gor Dak Lak đă ăp ngih pah kan, ntŭk kan ntrôl dăng nkoch trêng, mât uănh tŏng ăp lĕ nkô̆ nău tât rmôt cán bộ, công chức, viên chức n’hanh nuĭh pah kan, gay đăp mpăn ƀư tĭng di nău ntrŭnh.

Tâm rnôk dăp n’gâng kan, lah geh cán bộ ŭch êng dăn rlu mô lah ntlơi kan, ăp ngih pah kan an uănh na nê̆ gay năl di nuĭh, mô mkra an rlu đah ăp nuĭh blău ntoh lư, tâm di nău đă kan. Samƀŭt rhăch nău dăn đă mkra nău kơl tong ăp mbơh uănh lah tĭng rnoh ƀư na nê̆, di đah ăp trong nchrăp n’hanh samƀŭt ntĭm rđău bah n’gor. Tât aƀaơ hin, Dak Lak geh nklăp 1.086 cán bộ, công chức, viên chức n’hanh nuĭh pah kan dăn rlu kan ơm mô lah ntlơi kan. Tâm nĕ 806 nuĭh rlu ranh n’hanh 280 nuĭh rlu kan. Tâm rnoh aơ geh 28 cán bộ bah gưl nkuăl let lơ, 198 công chức, 131 viên chức, 714 cán bộ, công chức gưl xă n’hanh 22 nuĭh pah kan tĭng nău tâm ton pah kan.