Đah nkô̆ “Măng Chĭng gong n’gloh tu tơm-Tâm rnglăp ăp rnoi mpôl đê̆ n’gor Kon Tum”, ta Jay rot Kon Klor, phường Thắng Lợi, nkual ƀon têh Kon Tum, n’gor Kon Tum, hŏ ƀư “Măng tŭr chĭng goh gong, xoang tu tơm-Tâm rnglăp ăp rnoi mpôl đê̆ n’gor Kon Tum”. Aơ lah ngoăy tâm ăp nău kan mbah rhơn Đại hội đại biểu ăp rnoi mpôl đê̆ n’gor Kon Tum tâl IV năm 2024.  

Wa Đinh Quốc Tuấn, Kruanh Ban Dân tộc n’gor Kon Tum nkoch, ndrel đah nău hun hao wăng sa- rêh jêng kon nuĭh tâm nkual ƀon lan rnoi mpôl đê̆, pah kan mât ndray n’hanh ntik n’hao rnoh khlay văn hóa way ơm ta n’gor, tâm nê geh ntŭk tŭr chĭng goh gong way dơi n’gor mât uănh khlay, an ƀư âk nău kan ngăn ngăn. Tât aƀaơ, hŏ geh 2.500 bor chĭng gong dơi ăp rnoi mpôl đê̆ ta n’gor mât ndray n’hanh ntik n’hao rnoh khlay; lơn lah nău ntoh bah chĭng gong tâm âk nău kan văn hóa- chính trị bah n’gor.  Aơ lah rnôk gay ăp nuĭh gĭt blău chĭng gong mpơl tay ntŭk tŭr chĭng goh gong, kơl an rơh mom ndăm aƀaơ gĭt dơi rnoh khlay êng bah chĭng gong, xoang n’hanh geh nău dơn kan lơn tâm mât ndray, nđơn trêng tay ăp rnoh khlay văn hóa nê.

Râng “Măng tŭr chĭng goh gong, xoang tu tơm-Tâm rnglăp ăp rnoi mpôl đê̆ n’gor Kon Tum” geh 170 geh nuĭh bah 8 mpôl. Tâm nê geh 7 mpôl ntơh măt an 7 rnoi nuĭh ƀon tơm ta ntŭk bah n’gor, lah: Xơ Đăng, Bahnar, Giẻ -Triêng, Jarai, Brâu, Rơ Măm n’hanh Hrê. Tâm măng ƀư, ăp nuĭh rong âk mông tâm ôp ăp rup  uĕh văn hóa mha êng, săk ntơr bah rnoi nuĭh he đah 245 nuĭh ntơh măt ngăn tât râng Đại hội đại biểu ăp  rnoi mpôl đê̆ n’go rr Kon Tum tâl IV. Wa Ri Ang, rnoi Xơ Đăng, ƀon Kon Vơng Kia, thị trấn Măng Đen, nkuâl Kon Plông, an gĭt:

“Rmôt chĭng gong mpôl hên lah 17 nuĭh hăn ta aơ tŭr goh an măng rgum chĭng gong gay mbah rhơn Đại hội ăp rnoi mpôl đê̆. Nău chĭng bah mpôl hên nsĭt an ăp nuĭh lah chĭng gong, xoang Rhơn ƀon tơm rgâl mhe. Gâp dŭt rhơn dơi tâm mâp tâm nđŭr, nchreng an djăt uănh chĭng gong, mâp ăp rnoi mpôl đê̆ tâm n’gor Kon Tum. Gâp dŭt n’hao êng săk”.

Ăp nău chĭng gong nchreng an djăt uănh ta măng rgum pâl, kơt: chĭng gong, xoang “Rhơn măng rgum pâl” bah ăp rnoi nuĭh Bahnar, nkuâl Đăk Hà; Uh goh nău mprơ “Nkah gĭt Đảng, Wa Hồ”, rnoi Giẻ-Triêng, nkuâl Đăk Glei; Uh Đinh Pú “Chăm mir”, rnoi Brâu, nkuâl Ngọc Hồi; “Rhơn ngêt sa têh ƀon lan”, rnoi Bahnar, nkual ƀon têh Kon Tum... hŏ ƀư ntoh lư nkô̆ hôr “Măng Chĭng gong n’gloh tu tơm-Tâm rnglăp ăp rnoi mpôl đê̆ n’gor Kon Tum”. Nghệ sỹ ưu tú Phạm Văn Hân, Giám đốc Trung tâm Văn hóa-Nghệ thuật n’gor Kon Tum, an gĭt, aơ lah ăp nău chĭng gong rup uĕh êng, lah tơm khlay ma nuĭh gĭt blău chĭng gong 7 rnoi nuĭh ƀon tơm ta ntŭk bah n’gor hôm dơi mât ndray:

“Ăp nău chĭng gong dja lah ăp nău tŭr goh rup uĕh êng, ntơh măt an rsang rnglăy văn hoá bah tĭng rnoi nuĭh. Kơt nău mprơ n’hir oh, nău chĭng gong- xoang, wơt năch mô lah ăp nău mpât mprơ ntĭt an nău way ngêt sa têh bah tĭng rnoi nuĭh. Măng chĭng gong mpơl nău tâm rnglăp ăp rnoi nuĭh n’gor Kon Tum”.

Nghệ nhân ưu tú A Thút ta xã Mường Hoong, nkuâl Sa Thầy mpơl nău rhơn rnôk dơi uănh saơ ăp nău chĭng gong rup uĕh êng bah măng rgum pâl. Păng êng nkah uĕh rnôk tâm ăp rmôt chĭng gong, geh dŭt âk druh ndăm tŭr goh hăr blău  ăp nău chĭng gong ndơ uh goh. Nău nê mbra mpơl tay nău nđơn trêng tay, kơt nti bah rơh kơn druh ndăm đah ăp ntil nău njroh mprơ way ơm bah ăp rnoi nuĭh ƀon tơm ta ntŭk; rgop mât ndray, ntik n’hao rnoh khlay văn hóa bah ăp rnoi mpôl đê̆ ta Kon Tum.

Măng rgum tŭr goh chĭng gong lah rnôk gay ăp bu mprơ tâm mâp, tâm nđŭr, êt lhăt tâm rnglăp nsum mpôl ƀon lan, nkre rgop n’hao nuih n’hâm rnoi nuĭh n’hanh nău  gĭt êng mât ndray, ntik n’hao rnoh khlay văn hóa way ơm.