N’gâng kan Văn hóa Thể thao n’hanh pâl nđaih lĕ an nău ntrŭnh mpeh nău ndâk njêng Bôk nău rgop an tâm nchră mât ndrăy, rdâk ƀư tay n’hanh mât uĕh nău khlay mpât mprơ, chĭng gông bah ăp rnoi mpôl đêt, hăn ndrel đah hun hao pâl nđaih lvang 2021-2030. Đah du rnoi nuĭh, nău mprơ, nău njroh boăt nthoi nău uĕh bah ăp nău khlay văn hóa, lịch sử, nău uĕh ơm.

Tĭng N’gâng kan Văn hóa, Thể thao n’hanh Pâl nđaih, Bôk nău rgop an tâm nchră dơi ndâk ƀư gay uănh lah trong kan mât ndrăy rdâk ƀư tay n’hanh mât uĕh nău kan njroh mprơ, chĭng gông bah ăp rnoi mpôl đêt, hăn ndrel đah hun hao pâl nđaih. Bah nĕ dăn đă ăp trong mkra joi, mât uĕh nău khlay du trong săk rnglăy. Yơn lah, gay ƀư tĭng ăp nău aơ mbra mâp dŭt âk jêr jŏt. Wa Nguyễn Thị Hải Nhung, Vụ trưởng Vụ Văn hóa dân tộc, N’gâng kan Văn hóa, Thể thao n’hanh Pâl nđaih nkoch:

Nghệ nhân mprơ nău mprơ Pả Dung bah rnoi Dao đỏ.

“Yor Nău wât bah nuĭh ƀon lan mô tâm ban jêng nău rgŏ jă nuĭh, drăp ndơ bah n’gâng kan ƀon lan kơt ƀon lan nkual rnoi mpôl đêt tâm nău mât uănh ăp nău khlay văn hóa hôm mâp âk jêr jŏt. Ri nău uănh mĭn bah ăp n’gâng kan tâm trong kan mât ndrăy văn hóa, nău way ơm ăp rnoi mpôl đêt, geh rnôk, geh ntŭk mô hŏ jru n’hanh mô tâm ban n’hanh mô hŏ wât di n’hanh tŏng ăp uănh khlay tâm trong kan văn hóa rnoi nuĭh, ngăn lah trong kan nkoch trêng, rgŏ jă ƀon lan geh ƀa ƀơ n’hanh jru hvi”.

Ta n’gor Thái Nguyên, knơm nuih n’hâm bah ăp nuĭh njroh mprơ ta ntŭk ma ăp oh jêt nuĭh Dao ta xóm Suối Bốc, xă Yên Ninh, nkuăl Phú Lương dôl mbrơi mbrơi wât nău nti nău ngơi me dêh, nti nău mprơ Pả Dung lah du trong an wât lơn mpeh tu tơm rnoi nuĭh nơm. Ndrel đah ăp jrô nti ntĭm nău mprơ Pả Dung, ngoăy tâm âk trong ƀư mât ndrăy văn hóa văn nghệ ma nuĭh Dao ta Thái Nguyên lĕ mât săk rnglăy, nĕ lah ndâk njêng ăp câu lạc bộ. Aơ lah ăp ntŭk văn hóa bah ăp nuĭh Dao ŭch njroh mprơ, ŭch nău mprơ, nău njroh way ơm, rgop ƀư uĕh tay nău rêh nuih n’hâm, ndâk njêng nău rêh văn hóa ta ntŭk. Wa Phạm Thị Lam Anh, Kruanh jrô kan Văn hóa thông tin nkuăl Phú Lương, n’gor Thái Nguyên an gĭt.

“Tă bah ndâk njêng ăp câu lạc bộ mât ndrăy aơ mpôl hên kơl rdâk ƀư tay ăp nău mpât mprơ, ăp nău ƀư brah bah ăp rnoi Dao. Nkre lah du trong an mpôl hên mât tay pơk hvi ăp nghệ nhân dân gian”.

          Dơi geh bah dŭt jŏ, ntơm bah pah kan nkra njêng, dah rŏng chroh tĭng ƀư brah u che, nău mprơ Pả Dung nsĭt tay du nău khlay văn hóa, nuih n’hanh nkô̆ nău khlay đah nuĭh Dao. Nău uĕh êng bah Pả Dung geh tâm ăp ntil nău mprơ. Du ntil nău mprơ mbra dơi ntrŭnh tâm năm khay, nău ngơi êng, geh nău tâm rŏng êng êng. Wa Đặng Phúc Lương, Kruanh Hội Văn học nghệ thuật ăp rnoi mpôl đêt n’gor Thái Nguyên an gĭt:

          “Ăp nău mprơ Pả Dung bah ăp rmôt Dao êng êng da dê. Knŭng geh Dao Quý Lâm đah Dao Đỏ lah tâm êp dơm. Sŏk er, âm điệu n’glêh jong, tâm ban ri lah nsum lah êng êng. Yơn ma uĕh ngăn bah Pả Dung lah nău mprơ bah nuĭh Dao Đỏ”.

Tâm ăp năm bah năp, dơi geh uănh mĭn bah nău kan văn hóa, kônh wa nuĭh Dao ta Thái Nguyên lĕ geh tay dơi tâm nđŭr mpla nsơ ăp nău njroh mprơ bah nơm ta âk nău ƀư, nău khlay bah ƀon lan. Nău mprơ Pả Dung lĕ dơi kơp dơn lah drăp ndơ văn hóa mô mpơl săk gưl ngih dak. Nĕ lah nău ntô̆ n’hao, lah ngoăy tâm âk ntŭk mât ăp rơh nuĭh Dao gĭt wât mât ndrăy n’hanh mât uĕh tâm ntŭk gŭ rêh ăp nău khlay văn hóa, tâm nĕ geh nău njroh mprơ.

Dơi lah, mât ndrăy nău mprơ, nău njroh, chĭng gông đah trong hăn ndrel phun hao pâl nđaih dơi uănh lah trong ƀư uĕh. Yor nê, ăp nău mprơ aơ mbra dơi rêh tâm nău rêh mhe. Yơn lor lah an ndâk njêng trong ƀư, nău kan na nê̆. Tâm nĕ uănh mĭn tât nău trêng ntĭm, kơl an ăp nghệ nhân mât ndrăy văn hóa.

“Ntop kơl an ăp nghệ nhân, nuĭh nsing nơm tâm ntŭk gŭ rêh râng nău ƀư tơm hăn lor tâm ăp câu lạc bộ trêng ntĭm văn hóa, nghệ thuật rnoi nuĭh mô lah rklă ăp nău khlay văn hóa nghệ thuật mhe gay rhŏ an nuĭh ƀon lan n’hanh ăp rnoi mpôl đêt đah pâl nđaih n’hanh n’hao rnoh geh văn hóa an ƀon lan ăp rnoi mpôl đêt”.