Nkhêp geh nkah ndray 70 năm Nar rklaih luh Thủ đô (10/10/1954 – 10/10/2024) n’hanh 25 năm Hà Nội dơi UNESCO ntăm an săk ntơ “Nkual ƀon têh yor bah tâm lơh tâm su” (16/7/1999 – 16/7/2024), UBND Nkual ƀon têh Hà Nội ƀư bôk nău kan “Nar rgum Văn hóa yor bah tâm lơh tâm su” ta nkual n’glău Hoàn Kiếm – ndơ ntĭt văn hóa kăl e bah Thủ đô. Nar ƀư lah rnôk gay mpư rnê nău way ơm kăl e bah Hà Nội, nkre nkoch n’hơ rup gui  Thủ đô ŭch rŏng bah tâm lơh tâm su tât lam lĕ rngôch ƀon lan n’hanh băl mpôl dak bah dih.

 "Nar rgum Văn hóa yor bah tâm  lơh tâm su” dơi tâm pă ƀư pe gâl tơm, lah: Gâl bôk năp – Nău nkah kăl e Hà Nội, Gâl II – n’hong hoch drăp ndơ ơm yău ntlơi an tay, Gâl III – Hà Nội: Nkual ƀon têh yor bah tâm lơh tâm su, nkual ƀon têh blău mhe. Sân khấu tơm bah nar ƀư dơi rdâk têh kuâng ta nkual n’glău Hoàn Kiếm, dŏng nău rup geh ngăn gay mpơl tay ăp drăp ndơ ơm yău ntlơi an tay, ntŭk ntoh lư nkrêp đah Thủ đô kơt Cửa ô Hà Nội, Mpông Đoan Môn (Hoàng Thành Thăng Long), Ntung Long Biên, n’gâng cờ Hà Nội.

 Bah nê, nar ƀư gay njêng luh du ntŭk văn hóa kăl e uĕh êng, kơl nuĭh ƀon lan n’hanh năch rêh tay ăp ƀât rân dăng janh kăl e bah Hà Nội tâm du bông njăr trong jong 70 năm bah Nar rklaih luh Thủ đô. Lah ta nar ƀư, Kuanh UBND nkual ƀon têh Hà Nội Trần Sỹ Thanh an gĭt:

“Bôk nău kan mpơl tay ăp n’gâng ntơm chrat ang kăl e bah thủ đô ma  ăp rơh, mbơh nkoch nchreng an uănh drăp ndơ ơm yău văn hóa, mô mpơl săk n’hanh ăp ƀon hăr blău ti kan ntoh lư bah thủ đô. Lơn lah mpơl tay rup geh ngăn ƀât rân nău têh khlay kăl e bah thủ đô n’hanh neh dak nar 10 khay 10 năm 1954, rnôk mpôl tahen hăn sĭt dơn mât tay thủ đô tâm mprang gŭr êr cờ kao n’hanh nău rhơn  răm lơh dơi, dŭt jêh 9 năm ndrong rdâng lơh krit nji mô gĭt dah âk roh yot khĭt să rlă lŭ n’hanh nuih n’hâm dăng janh mô dơi plơ̆ rŭch bah ƀon lan he. Bah meng nê, nar rgum văn hóa yor bah tâm lơh tâm su hôm lah rnôk gay he mpư rnê jâng tơm văn hiến săk tơm văn hóa yor bah tâm lơh tâm su bah Thủ đô Hà Nội me neh huêng khlay, ntŭk rngân nuih n’hâm nsan hao Thăng Long, huêng khlay bri dak ntŭk luh rsang rnglăy n’hanh chrat ang bôk rngok gĭt blău Việt Nam, chrat ang đăng hăr n’hanh nău khlay nuih n’hâm kon nuĭh.”

Rlău 8.000 nuĭh, lĕ ma 5.000 nuĭh ƀon  lan n’hanh ntơh măt ăp mpôl tât bah ăp quận, nkuâl, thị xã râng tâm  ăp trong ntroh hăn, nchreng an uănh ăp ntil nău njroh mprơ way ơm ƀon lan, lĕ ma ăp drăp ndơ ơm yău văn hóa mô mpơl săk dơi UNESCO n’hanh neh dak kơp dơn, ndrel ăp rup uĕh văn hóa way ơm săk ntơr bah Thủ đô.

Ngoăy tâm ăp ntŭk rgum tơm khlay bah bôk nău kan lah mpơl saơ tay mpeh rup gui mpôl tahen rgum sĭt mpeh Hà Nội tâm ƀât rân kăl e nar 10/10/1954, rnôk tahen Việt Nam dơn mât tay Thủ đô, ntơm dŭt bah phŭng rlăng tŭn jot. Du ƀât du rân dăng janh dja dơi mpơl tay ma ăp nău an uănh saơ rup gui geh ngăn dŭt têh, đah nău tât râng bah 1.000 tahen ndrel 200 nghệ sĩ, diễn viên múa, nsĭt tay an nuĭh djăt uănh rngân jru lăp tâm nuih n’hâm. Wa Đinh Hồ Pha, mpeh ăp khối phường râng nar rgum nkoch:   

“Saơ tâm nuih n’hâm jêr nkoch ngăn, rdôl rdăl ngăn, tâm ban kơt he dôl rêh tâm năm 1954 n’hanh he  dôl dâk gay wơch ti ăp tahen lăp rklaih luh thủ đô. Bôk nău kan dŭt han dăng, mpơl tay lĕ rngôch ăp rup gui bah kăl e, ntơm bah rnôk ma wa Hồ kuăl jă lam dak dâk lơh năm 1946, mpơl lĕ ma rup gui ƀon  lan he rdâng lơh mpôl prăng tŭn jot lơh dong ta thủ đô mhâm jêng, mpơl tay rup ăp mpôl tahen lor bôk năp rduh lơh rklaih luh thủ đô, ƀon lan mhâm rhơn mƀak n’hanh cờ kao gŭr ntơr mprang lam trôk.”  

Dŭt njrăng uănh khlay, ăp ntil  nău njroh mprơ kơt ca trù, múa rối dak, mprơ xẩm, ăp drăp ndơ ơm yău ntlơi an tay kơt ôp mbah Tản Viên Sơn Thánh, Hai Bà Trưng, Thánh Gióng, tât gâl nkoch mbơh văn hóa ndơ sa n’hanh ăp ndơ geh ƀư ƀon hăr blău ti kan way ơm bah Thủ đô kơt ƀon mon uk Bát Tràng, ƀon bok sut Vạn Phúc, cheh tanh ndrang Quất Động, tanh tôk Phú Vinh dơi nchreng an uănh n’hanh nkoch n’hơ ta rnôk ƀư đŏng, nsĭt tay an nuĭh djăt uănh du trong gĭt jru mpeh ăp rnoh khlay văn hóa hôm nha geh mbro bah Thủ đô Hà Nội. oh Nguyễn Ngân, Thạch Thất, Hà Nội an gĭt:  

“He dŭt rhơn n’hao êng săk n’hanh dŭt rhơn yor dơi râng du nar têh khlay kơt aơ. He nkoch mbơh ƀon hăr blău ti kan way ơm Thạch Thất, chè kho Đại Đồng n’hanh chè lam kah khlay.”

Oh Ngô Trang Linh, Đại học Giao thông vận tải an gĭt: 

Gâp saơ dŭt ŭch rnôk geh ăp bôk nău kan mpơl tay nău kăl e n’hanh nău kăl e dja, mbra kơl  an băl mom, ăp kon se nti mbra tât dơi nău gĭt đah kăl e du trong dêh bên lơn đŏng. Ta gâl ntroh hăn trong, lĕ rngôch ăp ndơ kah khlay tâm ban  kơt ăp ƀon hăr blău ti kan way ơm bah Hà Nội dơi n’hao an saơ ta aơ đŏng, dŭt uĕh ngăn. Gâp saơ Hà Nội geh dŭt âk ndơ ơm yău ntlơi an tay, ƀon hăr blău ti kan way ơm dơi nđơn mât dŭt jŏ.”

 Ma nar ƀư dja, Hà Nội mô dơn an saơ di ntŭk gŭ têh khlay bah nău kăl e, văn hóa ma hôm lah ntŭk rgum pâl nđaih, wăng sa, chính trị khlay bah lam dak đŏng. Nău ƀư “Nar rgum Văn hóa yor bah tâm lơh tâm su" lah du gâl tâm trong nchrăp hun hao ăp ndơ geh ƀư công nghiệp văn hóa nkre đah ăp nar ƀư nkah ndray Nar rklaih luh Thủ đô ăp năm, rgop ntrŭt ntrôl pâl nđaih văn hóa n’hanh hun hao wăng sa jŏ jong an Thủ đô./.