Ta ƀon H’Măng, xă Ea Kar, n’gor Dak Lak, nghệ nhân Y Dhok Du lĕ jêng “nuĭh mpoh ŭnh” an âk rơh druh ndăm n’hanh ŭch nti tŭr chĭng. Ăp nău chĭng wa dơi gĭt nti bah u che, jêh nĕ ntĭm tay an kon sau đah nău blău nơm ntêm tâm nău rêh. Âk năm tĭng đah trong kan ntĭm wa Y Dhok Du saơ kloh ăp nău nking n’gang rnôk mât ŭnh văn hóa chĭng gông ta ƀon lan.

Jêr jŏt mpeh rnoh ăp ntil drăp ndơ he mô hŏ dơi gĭt lĕ. Tal 2 tay lah ngih wâl ndoh ndơ, ntŭk nti, ndơ dŏng tiăr nti, jêh nĕ lah nău nuĭh nti jêr jŏt, jêng lah mpŏng ŭch gưl bah lơ ƀa ƀơ uănh tât kơl gay an ntŭk ƀư dơh âk lơn.

Nău wa Y Dhok Du rvê mô di nău êng bah du ƀon. Ta âk ntŭk, nău ntĭm văn hóa way ơm knŭng tĭng tâm nău blău ơm bah nghệ nhân. Ŭch mât drăp ndơ yău jŏ jong, âk nuĭh an lah geh tay nău wât n’hanh trong ntĭm tâm di. Nghệ nhân Tô Thị Mèn, rnoi nuĭh Tày, ta xă Krông Pắc nkoch:

Bah jŏ gâp lĕ ŭch geh ăp jrô ntĭm gay geh nău blău, nău wât gay ntĭm an ăp rơh druh ndăm. Âk năm bah năp mô geh jrô ntĭm yơn ma gâp hôm e mĭn joi, nău blău he ndâng geh, geh kơt nĕ lah he nsrôih gay ntĭm an ăp rơh druh ndăm.

Bah rnôk ntŭk ntô văn hóa chĭng gông Tây Nguyên UNESCO lap, Dak Lak lĕ âk rơh an nău kơl gay mât ndrăy n’hanh mât na nao nău khlay drăp ndơ yău. Nghị quyết mrô 3 ma HĐND n’gor mhe an mpeh ntop kơl mât njrăng n’hanh mât na nao drăp ndơ yău văn hóa chĭng gông lvang 2026-2030 na nê̆ nău rƀŏng nĕ, đah nău uănh lah ntop kơl trong kan ntĭm nti n’hanh nta nơih an ăp nuĭh na nê̆ mât drăp ndơ yău mât nău kan. Wa Trần Hồng Tiến, Giám đốc N’gâng kan Văn hóa, Thể thao n’hanh Pâl nđaih n’gor Dak Lak an gĭt:

Mpôl hên rgum an ntop kơl, mô hôm lah mât ndrăy ma jêng mât njrăng, đah 5 nkô̆ nău khlay: bôk năp lah rgum mât njrăng trong kan ntĭm. Tal 2 lah ntop kơl prăk gay rdâk ƀư tay ntŭk ntô văn hóa chĭng gông. Tal 3 lah rgum ntop kơl na nê̆ geh tât chĭng gông, n’hanh ăp câu lạc bộ gay khân pơng ƀư uĕh lơn. Nkre rơh aơ geh du ntŭk mhe lah mpôl hên ntop kơl nkra uĕh, nkra ăp ntŭk nsum mpôl gay ƀư ăp nău kan, rgâl lĕ rngôch ăp ntŭk ntô, ăp nău ƀư văn hóa aơ gay mât bah kơi aơ mât njrăng n’hanh ƀư ueh tay.

Nău mhe bah nghị quyết lah mô knŭng ntop kơl nău ƀư mât rƀăy, ma rƀŏng tât trong mkra ăp jêr jŏt tâm trong kan jao ntĭm drăp ndơ yău. Êng tâm khay 5 n’hanh khay 6 năm aơ, Dak lak ƀư na naơ 3 jrô tiăr nti mpeh mât rƀăy drăp ndơ văn hóa, kơl nghệ nhân, nuĭh ƀư drăp ndơ yău n’hanh cán bộ văn hóa ta ntŭk dơi năp tay trong mkra ntĭm n’hanh ƀư văn hóa ntŭk gŭ rêh. Tĭng nô Y Maih Mlô, ta ƀon Wiao A, xă Krông Năng, ăp nău wât aơ dơi kơt dŏng tâm nău ngăn ta thôn, ƀon.

Jrô tiăr nti dŭt na nê̆ n’hanh ngăn ngên, rgum ăp nuĭh ranh, ăp nuĭh blău ơm tâm nchră ndrel. Gâp lah rơh mom ndăm kơt ăp trong ƀư gay mông nar mô lah trong ƀư trêng ntĭm, ntĭm gay kơt dŏng tâm nău ngăn ta ƀon lan. Lah nsum lah rơh aơ dŭt ngăn ngên.

Dak Lak aƀaơ geh 2 drăp ndơ văn hóa mô mpơl săk ntoh măt bah kon nuĭh dơi UNESCO nchih săk âk drăp ndơ văn hóa mô mpơl săk lam dak. Tĭng Tiến sĩ Nguyễn Thị Thu Trang, nai ntĭm ta Ngih samƀŭt đại học Văn hóa Nkual ƀon têh Hồ Chí Minh, ŭch drăp ndơ yău mpơl tay tâm nău rêh nsum mpôl ri lor lah an uănh tât ntop kơl ăp nuĭh dôl na nê̆ mât n’hanh ntĭm ăp nău khlay văn hóa nĕ.

Gâp mĭn lah aơ ăp trong mkra dŭt lah ngăch saơ nău uănh tât bah n’gor Dak Lak đah rmôt mât uănh, ndơn tay, trêng ntĭm, ƀư ngăn lah rmôt khlay, ƀư tơm ntrŭnh an tâm nău mât njrăng n’hanh mât na nao nău khlay drăp ndơ yău văn hóa bah rnoi mpôl đêt. Aơ lah nuih n’hâm uĕh rbân, n’hâm soan khlay gay ntrôl hun hao wăng sa rêh jêng an Dak Lak tă bah nău tâm rgop hun hao pâl nđaih n’hanh hun hap pâl nđaih nâp nâl.

Nghị quyết mrô 03 dôl ntơm ntop soan an ăp nuĭh na nê̆ mât djôt n’hanh trêng ntĭm drăp ndơ yău tâm ntŭk gŭ rêh n’gor Dak Lak, ăp nău khlay văn hóa dơi mât tă bah âk rơh mbra geh tay ndơ gay dơi trêng ntĭm, mbuh mât n’hanh rêng hvi tâm nău rêh.