Nklang nău rêh khuh n’gôr bah nkual ƀon têh Hồ Chí Minh, ăp măng kêng dŭt pơh mhe aơ, âk năch dak bah dih n’hanh nuĭh ƀon lan nkual ƀon têh hôm joi tât du ntŭk rlong uănh saơ mha êng. Mô di ntŭk rgum tăch rgâl mô lah trong hăn jâng ta nkual ƀon têh, khân păng sơch gŭ tay tâm du ntŭk njroh mprơ gay djăt ăp nău goh mprơ săk tơm êng rnoi nuĭh Việt Nam, dơi nkoch ma nău ngơi mhe aƀaơ.

Ta aơ, nău nteh đơn tranh, đơn bầu, đơn nhị, đơn T’rưng, gong lŭ mô lah tâm râp chĭng gong Tây Nguyên n’gloh lam ta nâm nău nteh 3D uĕh mhe, leo nuĭh djăt uănh lăp tâm trong joi gĭt văn hóa Việt Nam, bah Bắc lăp Nam. Rlău 30 ndơ uh goh rnoi mpôl đê̆ ndrel 12 nău rklă mhe aƀaơ hŏ mpơl rup uĕh bah âk nkual, njêng du nău rlong saơ nkre nău way ơm nkre mhe mhan.

Nê lah măng njroh mprơ "Chào Show," ƀư ta mbrô 6 Nguyễn Siêu, phường Sài Gòn, nkual ƀon têh Hồ Chí Minh. Tât ta aơ, nuĭh hăn mô dơn djăt dơi nău goh mprơ, ma hôm dơi rlong sa ăp ndơ kah ntĭt êng pe mpeh Bắc - Trung - Nam. Măng ƀư nkre đah goh nău mprơ, rup gui n’hanh ndơ sa, kơl ăp măng jêng du trong hăn joi gĭt văn hóa Việt Nam ma âk trong djăt uănh.

Tâm râp n’hŭn mbro tĭng nău goh nteh, wa Edgar, năch tât bah Canada nkoch, păng hŏ hăn âk ntŭk ta Việt Nam yơn aơ lah lor bôk năp dơi djăt n’hanh uănh saơ âk ndơ uh goh tâm rlai lăp nsum. Păng an lah nê lah du gâl tâm trong rlong uănh saơ dŭt uĕh dơm.

“Lah ma ngăn, gâp dŭt nkah uĕh. Gâp mô mĭn lah măng ƀư dŏng âk ndơ uh goh tât nê̆. Nău ƀư gâp dŭt ŭch lah geh dŭt âk ndơ uh goh ma gâp lor  bôk năp uănh saơ n’hanh rlong djăt. Nău dơi djăt uănh dŭt âk ndơ goh mprơ êng êng rlai lăp ndrel du tơ̆ lah du măng rlong uănh saơ dŭt uĕh. Măng sa nar aơ dŭt kah, geh piăng, geh bánh mì n’hanh âk ndơ sa kah Việt Nam êng.”

Tâm rnôk nê, yuh Zamanie, năch Mỹ, an gĭt măng njroh mprơ rlău nău mpŏng kâp kơl yuh nklân năl dơi nău nkoch mpeh văn hóa n’hanh kon nuĭh Việt Nam ma ndơ goh nteh nău mprơ. Nău an tay dŭt nkah uĕh đah yuh lah tơm nđơr bah ăp nghệ sĩ ta sân khấu.

“Gâp gĭt tât ta aơ lah nơm joi geh ta mạng, gâp saơ bu rnê âk n’hanh dŭt uĕh mƀak, jêng gâp n’glêh an tât rlong hăn uănh. N’hanh, nău njroh mprơ uĕh rlău gâp mpŏng kâp. Lôch rnôk uănh njroh mprơ, gâp saơ lah he dŭt ŭch ngăch. Gâp êng nkah uĕh đah ndơ goh nteh, tơm nđơr bah ăp nghệ sĩ nchreng an uănh n’hanh khuh n’gôr ma nău nteh goh mprơ nsĭt tay. Gâp nklân năl dơi lah măng njroh mprơ hŏ nkoch du nău nkoch dŭt uĕh mpeh ăp nkual n’hanh văn hóa êng êng bah Việt Nam ma ăp nău goh mprơ n’hanh sân khấu”.

Tĭng wa Trần Minh Hoàng, Giám đốc Tăch rgâl Chào Show, nău mĭn rdâk njêng măng njroh mprơ ntoh bah nău ŭch njêng luh du ntil ndơ pâl nđaih mhe an nkual ƀon têh Hồ Chí Minh. Rgâl bah hôm ma nchreng an uănh ndơ goh nău mprơ rnoi mpôl đê̆ tĭng nău way ơm, mpôl kơl kan sơch trong tât uĕh mhe lơn gay ndơ̆ văn hóa Việt Nam tât dăch đah lam mpôl, lơn lah năch dak bah dih.

“Ŭch rŏng dŭt têh bah mpôl hên lah ring lam nău goh mprơ n’hanh văn hóa Việt Nam tât đah băl mpôl dak bah dih tâm ban kơt nuĭh djăt uănh tâm dak đŏng. Dơi ƀư mbro ăp măng, mpôl hên mpŏng Chào Show mbra jêng du ntŭk tât văn hóa săk ntơr êng n’hanh đêt geh ta nkual ƀon têh Hồ Chí Minh gay rhŏ dŏng năch. Yor kơt nê̆, mpôl hên ntrŏng show ƀư kơt du đại sứ văn hóa, rgop nđơn trêng tay goh nău mprơ n’hanh săk tơm Việt Nam tât đah băl mpôl dak bah dih”.

Ntơm bah rnôk n’glăp dŏng ntơm bah rnôk bôk khay 3/2025, măng njroh mprơ hŏ geh nău rnê uĕh bah nuĭh djăt uănh. Aƀaơ, Chào Show hŏ wơt rlău 30.000 tơ̆ năch; tâm nê geh bơi du n’gul lah năch dak bah dih.