Rlău 1 khay aơ, ăp nar kêng dŭt pơh, ta Ntŭk rgum rhŏ dŏng xã Hàm Thuận, n’gor Lâm Đồng, rmôt njroh mprơ nsum mpôl n’hanh nchreng an uănh ndơ nsoh rnoi Chăm nđơr tiăr nti da dê. Nô Thông Đinh Đương, an gĭt, aơ lah lor bôk năp nô dơi râng Nar rgum văn hóa Chăm lam dak, păng dŭt n’hao êng săk n’hanh rhơn nđơr:

“Aơ mô dơn lah ăp nar rgum pâl têh ma aơ lah du ntŭk gay ăp oh nsum ti rgop du đêt suan jê̆ nê̆ nơh gay nkơnh n’hơ văn hóa, săk tơm rnoi nuĭh bah nuĭh Chăm mpôl hên đah lam mpôl. Dŭt nkah gĭt Đảng n’hanh Ngih dak hŏ nta trong dơh gay an nuĭh Chăm lĕ rngôch ăp ntŭk lam dak mbra rgum hop, ntrŭt ntrôl nuih n’hâm văn hóa bah druh ndăm let năp tay, tâm nău mât ndray, ntik n’hao săk tơm rnoi nuĭh Chăm. Gâp tâm ban kơt lĕ rngôch ăp nuĭh tâm mpôl dôl nsrôih đŏng, mpŏng nsĭt tay ăp nău njroh mprơ nchreng an uănh dŭt ntơr uĕh gay rhŏ dŏng an kônh wa.

Đah nkô̆ nsĭt tât nar rgum lah “Mât ndray, ntik n’hao săk tơm văn hóa rnoi Chăm n’gor Lâm Đồng tâm rơh hun hao mhe”, mpôl Lâm Đồng mbra râng âk nkô̆ săk ntơr êng gay nkoch mbơh tâng jru văn hóa Chăm dôl dơi ƀon lan mât ndray. Tâm nê, nău kan  văn hóa rgum tâm ăp nkô̆, kơt: nchreng an uănh, nkoch mbơh gâl lễ hội, nău way gŭ rêh văn hóa way ơm rnoi Chăm; pla n’hơ nkoch mbơh, nkơnh an văn hóa way ơm rnoi Chăm tâm n’gâng kan rdâk njêng n’hanh mât njrăng ƀon tơm. Nkre geh ăp nău nchreng an uănh, nkoch mbơh ndơ ƀư ma ti way ơm kơt cheh tanh bok brai, ƀư mon uk bah rnoi Chăm; ƀư njroh mprơ nsum mpôl n’hanh nchreng an uănh bok ao rnoi Chăm.

Nghệ nhân Ưu tú Lâm Tấn Bình ta xã Bắc Bình, an gĭt, ta nar hội, mpôl mbra nchreng an uănh, nkoch mbơh gâl lễ hội, nău way ƀư “Ntăm n’hao Kruanh mpeh rnoi Kadhar chroh Bàlamôn bah nuĭh Chăm Lâm Đồng”. Aơ lah nkô̆ ƀư dŭt rkhăch rkhe:

“Lễ hội ntăm n’hao kruanh chroh Kadhar lah rnôk wăch rgum văn hóa njroh mprơ way ơm Chăm săk ntơr âk mpưm ma ăp anwu way hôr tâm ăp nău mprơ Thánh ca han dăng bah kruanh chroh Gru kadhar, rlai lăp nsum đah nău răch dăn bah Muk Pajuw gay mprơ rnê n’hâm suan, nău nkoch bah ăp Kađăch kăl e hŏ jêng brah yang, ma ăp nău mprơ ngŭr klêu bah nău nteh đơn kanyi, njêng nău mprơ njŭng rnhôt bah nuih n’hâm n’hanh nău nsing nơm huêng khlay bah ƀon lan đah kon chroh…)

Rlău ma gâl tâm rlong mpeh văn hoá way ơm, njroh mprơ, thể thao, mpôl Lâm Đồng hôm râng ntŭk pla n’hơ nkoch mbơh, nkơnh n’hơ văn hoá way ơm ta ntŭk, ƀư ntoh lư rup gui nuĭh Chăm ta Lâm Đồng tâm n’gâng kan rdâk njêng n’hanh mât ndray ƀon tơm; ntŭk têl ơm yău, bri dak uĕh măt uănh, ăp lễ hội; nkoch mbơh mpeh rgum prăp drăp ndơ ơm yău ntlơi an tay văn hoá Hoàng tộc Chăm…

Lơn lah, mpôl mbra râng nkoch mbơh du đêt ntŭk tât ntoh lư bah Lâm Đồng, nkơnh n’hơ du đêt ndơ tuch tăm, ndơ geh ƀư OCOP ntoh lư;... Wa Nguyễn Tú Long, Groi Giám đốc Trung tâm Văn hóa n’hanh Mât uănh Công viên địa chất Dak Nông – n’gor Lâm Đồng an gĭt, mpôl geh 85 nuĭh râng Nar rgum đah nuih n’hâm tâm nđŭr, tâm kơt nti ndrel hun hao:

“Aƀaơ pah kan nchrăp bôk năp hŏ ăp tŏng. Uănh nsum bôk nău kan nsĭt tât săk tơm rnoi nuĭh Chăm. Năm aơ, mpôl ƀư tơm lah bah Hàm Thuận Bắc (ơm) lah: chưng play, ăp môn thể thao nsum mpôl, hôm rmôt nchreng an uănh njroh mprơ râng liên hoan njroh mprơ nsum mpôl n’hanh nchreng an uănh uĕh ndơ nsoh đŏng. Êng sŏk gâl lễ hội ri mpôl kan lah kruanh chroh bah Bắc Bình (ơm)

Nar rgum Văn hóa rnoi Chăm tâl VI ta n’gor Khánh Hoà mbra ƀư ntơm bah nar 26 tât nar 28/6 tât, lah ntŭk rgum săk ntơr văn hóa Chăm ta lam dak. Nar rgum wăch rlău 700 bu hăr blău, nuĭh nchreng an uănh, nuĭh tâm rlong tât bah 7 n’gor, nkual ƀon têh lah: Khánh Hòa, Gia Lai, Lâm Đồng, Tây Ninh, An Giang, Dak Lak n’hanh nkual ƀon têh Hồ Chí Minh.

Ndrel đah Khánh Hòa, Lâm Đồng lah n’gor geh dŭt âk ƀon lan Chăm lam dak. Tâm bah ri aơ nơh, pah kan mât ndray, ntik n’hao ăp rnoh khlay văn hóa way ơm uĕh lăng bah ăp rnoi nuĭh way dơi n’gor mât uănh khlay. Đah nuih n’hâm tâm nđŭr, kơt nti, n’hao nău gĭt êng, nău dơn kan bah nsum mpôl tâm pah kan mât ndray, ntik n’hao ăp rnoh khlay văn hoá way ơm tâm rơh lăp rgum n’hanh hun hao bah neh dak, ăp nuĭh nchreng an uănh mô lăng way n’hanh ăp bu hăr blău nuĭh Chăm n’gor Lâm Đồng dôl nđơr kơt nti n’hanh rhơn răm, mpŏng kâp tât Nar rgum pâl săk ntơr âk văn hóa bah ƀon lan he.