Ta xă Tuy An Đông, rmôt công an, tahen ndrel n’gâng kan ƀon lan rgŏ jă măy mŏk, ndeh rklư ntop kơl ăp rnăk ƀon lan gehy jay gŭ tâm ntŭk nău nchrăp ƀư trong mper dak lêng trơn drăp ndơ tât ntŭk gŭ mhe. Bôl jay mhe mô hŏ jêh, âk rnăk hôm e ŭch êng trơn, jao an neh gay ndơ ƀư ơm mbơh ƀư. Wa Phạm Chí Bảo, ta xă Tuy An Đông an gĭt, rnăk wâl tâm ban ŭch jao an neh đah nău ŭch trong ơm jêh, nta nơih an ntung trong n’hanh hun hao ƀon lan.

Gâp ŭch ơm jao neh an ngih dak ƀư trong an hăn ndrĭ dơm.

Gay đăp mpăn ngăch jao neh ta dĭng lĕ jong rlău 22km dôl mbơh ƀư rdâk nkra, ăp ntŭk dôl mât na nao ƀư tơm hăn lor bah cán bộ, đảng viên. Rnăk wâl wa Nguyễn Văn Hiếu, cán bộ xă Tuy An Đông, lah ngoăy tâm âk rnăk ŭch êng trơn ơm bôl nău kơp uănh mô hŏ jêh:

Rnăk wâl mhe kơp yơn hôm e rgŏ jă ur kon tĭng jao an neh ơm gay ntŭk kan ndâk ƀư nkra jêng nău kan bah n’gor ủy n’hanh UBND n’gor.

Aƀaơ âk ndơ ƀư ntuh kơl nsum ta n’gor Dak Lak dôl mbrơi ngăch yor wăk kol sŏk neh. Êng trong mper dak lêng geh nklăp 1.500 rnăk ƀon lan geh khuch đah neh, jay gŭ. Yor nê, nău kan “30 nar măng” dơi mĭn lah nău kan khlay bah ăp xă, phường ntŭk nău nchrăp ƀư hăn rlău. Ndrel đah nkoch trêng, ăp ntŭk hôm mbơh ƀư nău kơl ntop kơl, rnê nkhôm đah ăp rnăk jao an neh ơm. Wa Trần Văn Biên, Kruanh UBND xă Tuy An Đông an gĭt:

Nkoch trêng jêng nău djăt tĭng đah nuĭh ƀon lan n’hanh nkoch trêng ăp nău kơl, nău an rnê nkhôm tĭng nău ntrŭnh 26 bah Ủy ban nhân dân n’gor, tâm nĕ geh nău ntop kơl an ăp rnăk tĭng lor lah bah 8 rkeh tât 15 rkeh prăk.

N’gor Dak Lak geh nău rƀŏng jêh lĕ rngôch trong kan sŏk neh trong mper dak lêng bah năp lơ 31/6/2026. Êng lvang bơi 1km mpeh Bah lơ ntung An Hải rlău xă Tuy An Đông jêh bah năp lơ 30/6 tât.

Gay đăp mpăn ngăch nsum bah nău nchrăp ƀư, ăp ntŭk kan ndâk ƀư mbra ƀư tĭng trong rtŭt bêl. Wa Nguyễn Khoa Anh, ntoh măt Mpôl Mât uănh ăp nău nchrăp ƀư ntuh kơl ndâk ƀư nkual mpeh bah lơ n’gor Dak lak an gĭt:

Xă jao an neh ntŭk tât, Mpôl mât uănh nău nchrăp ƀư mbra đă nuĭh ndranh rgŏ jă âk trong ndâk ƀư gay mbơh ƀư dâl, đăp mpăn ngăch ndơ ƀư.

Đah dŭt n’hâm bah n’gâng kan ƀon lan ndrel nău tâm ban ŭch bah nuĭh ƀon lan, nău kan lĕ rgâl na nê̆ ta ăp ntŭk mper dak lêng. Ăp mét neh dơi jao nar aơ mbra rgop jêng trong mper dak lêng mhe, pơk luh ntŭk hun hao mhe an wăng sa dak lêng Dak Lak tâm khay tât./.