Bơi tât 800 nghệ nhân tât râng nar tâm mâp lĕ mpơl tay ăp nău njroh mprơ ueh, ryơk rnê nău ơm mpeh văn hóa, an tay tâm nuih n’hâm ƀon lan n’hanh ăp năch tât râng ăp nău kahgĭt ueh.

Ăp nkô̆ njroh mprơ lĕ geh njêng du nău way lễ hội ueh êng, bâh nău ndâk nsơm tay kơt kăl e ăp nău way n’hanh nău rêh kơt lah: nklơi môch, kuăl brah ba mhe, kuăl brah truh dak, lăp ngih rông. Tâm nar tâm nđur văn hóa ăp mpôl rnoi n’gor Gia Lai năm aơ, ta meng ăp nău ueh êng bâh 2 mpôl rnoi Bahnar n’hanh Jarai, hôm nha geh nău ueh mpeh văn hóa bâh rnoi Tày bâh mpeh Bắc lăp gŭ rêh pah kan rdâk njêng ƀon lan mhe. Năch tât râng n’hanh ăp nghệ nhân lĕ lăp ndrel đah nău nteh đàn Tính n’hanh tât râng njroh sạp, nthoi dăch lơn nău tâm rŏng bâh ăp ntŭk rêh jêng ơm tâm ƀah dŭt ngai rbăn km.