Ta ngih tâm rlong Thể dục Thể thao n’gor Dak Lak ta nkual ƀon têh Buôn Ma Thuột, UBND n’gor Dak Lak mhe tâm rgop đah N’gâng kan ntĭm nti ntơm ƀư “Hội khỏe Phù Đổng lam dak rơh tal 5, nkual 4 năm 2024. Râng Hội khỏe Phù Đổng năm aơ, geh bơi 1.500 nuĭh tâm rlong bah ăp ngih sam ƀŭt ta 11 n’gor, nkual ƀon têh geh:

Nkual ƀon têh Hồ Chí Minh, Bà Rịa-Vũng Tàu, Đồng Nai, Tây Ninh, Ninh Thuận, Bình Thuận, Bình Dương, Bình Phước, Lâm Đồng, Gia Lai, Kon Tum, Dak Nông n’hanh tơm jay Dak Lak râng. Ăp nuĭh tâm rlong ta 11 môn tâm rlong geh: Chưng play, pah play, ntrôl mâng, dô̆t rse, aerobic, bóng rổ, cầu lông, chưng cầu, re dak, điền kinh n’hanh bóng bàn. Hội khỏe Phù Đổng dơi ƀư 5 năm du tơ̆, gay mât n’hanh ntrôl dăng rgŏ jă “Lam ƀon lan tiăr nti săk soan tĭng Wa Hồ he”, ntrŭt nsôr, kon hŏk phổ thông ƀa ƀơ tiăr nti n’hanh tâm rlong ăp môn thể thao ta ngih sam ƀŭt, n’hao săk soan, hun hao săk jăn, rgop ntĭm nti lĕ rngôch an kon hŏk; saơ ăp nuĭh blău thể thao gay ntĭm nti tay an thể thao tâm dak he.