Ntơm nar geh cán bộ đảng viên tât tâm ngih gay bonh đă rgâl neh tăm cà phê ranh, mô hôm jêng gay tăm byăp, kao ndrel dâu tây, rnăk wa Liêng Hót Ha Linh, tâm thôn Đạ Tro, xã Đạ Nhim, nkuăl Lạc Dương, n’gor Lâm Đồng hŏ ƀư tĭng ndrel geh nau văng sa âk ân rnăk vâl. Liêng Hót Ha Linh mbơh, 6 sào byăp, kao ndrel dâu tây geh rnăk păng ƀư tĭng trong tăm prêh mhe ri ma tăch geh âk, du năm geh rlau 500 rkeh:

  ‘Rnơm ăp cán bộ đảng viên, n’gâng kan tât nkoch mbơh, bonh đă rgâl tơm tăm, nkre ƀư pơk jrâu nti, jao nau kan tuch tăm, rnăk hên hŏ ntrơn neh cag phê gay tăm dâu tây, tăm kao tâm ngih bil. Ntơm bah nê, nau geh văng sa bah rnăk vâl geh âk, âk ngăn rđil bah năp nơh. Kŏ ntơm bah nê, gâp nơm ndrel kônh wa tâm ƀon gĭt nau tăm ân geh văng sa săk tam, leo văng sa rnăk vâl hun hao”.

Tĭng đảng viên Cil Pam Ka Duyên, Chi bộ Thôn Đạ Tro, gay ƀon lan rnơm ndrel rgâl nau tăm, ntrơn tơm tăm, leo ntil mhe, n’hao săk geh văng sa ri ăp đảng viên tâm chi bộ ân lah nŭih leo trong lor. Geh nŭih ngăn, kan ngăn ri nau nkoch trêng, bonh đă ƀư ăp nau ntrŭnh, ntrong kan bah Đảng ndrel pháp luật bah Ngih dak mơ leo nsĭt văng sa ueh, kônh wa mơ dơi kơt tĭng. Êng săk nơm, Cil Pam ka Duyên hŏ ndâk nau kan tăm dâu tây gay ƀon lan tâm Thôn tât kơt tĭng ƀư:

‘Rnôk jêng đảng viên, gâp geh nau dơi gay gĭt kloh lơn nau ntrŭnh, ntrong kan bah Đảng, nau ntrŭnh, pháp luật bah ngih dak. Rnơm nê, gâp mơ dơi ƀư ueh nau kan geh Đảng uỷ, n’gâng kan jao. Ndrel ntơm bah nê, gâp kơl an âk ngăn kônh wa. Ngăn lah, bonh đă kônh wa ntrơn rgâl tơm tăm, nsôih tăm tơm gleh nar gay hun hao văng sa rnăk vâl. Rnôk aơ, nau rêh kônh wa rnoi mpôl đê̆ ta aơ bah oi nau jêr ngăn rđil bah năp nê”.

Mô êng knŭng thôn Đạ Tro, âk đảng viên tâm ăp thôn, ƀon bah xã Đạ Nhim kŏ gĭt dơi nau kan bah nơm tâm nau leo trong lor tâm nau kan. Tâm nê, ân geh nkoch tât nau kan ntrơn rgâl tơm tăm, kơl an kônh wa hun hao văng sa, kơl an nar kan, kon ntil tăm, ăp nhoat tuch tăm tĭng nau geh dơi ŭch rvăt ndrel n’hao rnoh geh tơm tăm. Ntơm bah nau tăm êng knŭng cà phê, tât rnôk aơ, Đạ Nhim hŏ hun hao geh 16 ha tơm dak si Atiso, 6 ha dâu tây, 40 ha kao koh n’ging, 300 ha byăp, tuh ăp ntil ndrel rlau 330 ha tơm sa play. Tĭng đảng viên Cil Pam Ka Phương, chi bộ thôn Đa-ra-hoa, xã Đạ Nhim, ŭch dơi geh văng sa prêh tâm nau nkoch trêng, bonh đă, nau ƀư “đảng viên hăn lor, ƀon lan tĭng ba kơi” ân geh ƀư ngăn ndrel hun hao:

 ‘Phung hên nkoch trêng, bonh đă ân ăp rnăk vâl nŭih ƀon lan rnoi mpôl đê̆ tâm ƀon mât chăm hun hao văng sa, rêh jêng. Bah jŏ ma aơ tăm tơm tăm tơm bah kônh wa lah cà phê, rnôk aơ bonh đă ntrơn rgâl tơm tăm mpa rong tĭng nau dơi ŭch geh bu rvăt âk, kơt byăp, tuh, blên, bum ăp ntil gay hun hao jêng âk”.

Ndrel ma hun hao văng sa, nau kan leo trong lor bah ăp đảng viên hôm geh Đảng bộ xã Đạ Nhim uănh khlay nau ntrŭnh ƀư ân săk tam âk nau kan, tâm nê nkoch tât nau nsum ty ndâk njêng ƀon lan mhe, n’huch ach o nâp nâl, ƀư ueh nau tâm rnglăp rnoi mpôl, ndâk ntrong kan chính trị nâp nâl. Wa Kon Sơ Ha Vương, Kruanh MTTQ xã Đạ Nhim mbơh, nau aơ hŏ kơl an Đạ Nhim ngăch jut jăng nau ach o, ji ngot, hao jêng xã geh tŏng ƀon lan mhe ndrel ndâk xã ƀon lan mhe n’hao prêh:

 ‘Ƀư nau ntrŭnh bah Đảng ndrel pháp luật bah Ngih dak, rơh rlau aơ, Đảng uỷ, n’gâng kan hŏ nkoch trêng ân kônh wa ƀư ueh nau ndâk njêng ƀon lan mhe. Đah nau ŭch, ngih dak ndrel ƀon lan ndrel ƀư, âk ntrong hăn, ntung, dĭng hoch dak hŏ geh ntuh kơl ƀư nâp. Ndrel ma nau văng sa đăp mpăn, nau rêh drăp ndơ ndrel nuih n’hâm bah ƀon lan geh n’hao âk”.

 Rnơm ƀư ueh nau dơi bah đảng viên tâm nau leo trong lor, leo ƀon lan ƀư ân geh săk tam ăp nau kan yor nkuăl rgŏ jă, nau văng sa, rêh jêng bah xã Đạ Nhim, nkuăl Lạc Dương, n’gor Lâm Đồng dôl mo rlu hun hao ăp nar./.