Dơn nău jă bah wa Naly Sisoullith, I ur bah Tổng Bí thư, Kruanh dak Lào Thonglloun Sisoulith, wa Ngô Phương Ly, I ur bah Tổng Bí thư Tô Lâm hŏ tât khâl Lào n’hanh râng Tâm nchră choh bok ao way ơm ASEAN tâl 9  đah nkô̆ “Êt lhăt tâm boh nsum mpôl ASEAN ma drăp ndơ ơm  yău ntlơi an tay văn hóa n’hanh choh bok ao” ntơm bah nar 03/11 tât nar 06/11/2024.

Tâm ôp đah ăp nuĭh râng tâm nchră, wa Ngô Phương Ly rnê âk nău khlay bah tâm nchră choh bok ao way ơm  ASEAN tâl 9 tâm ban kơt rup uĕh êng bah ăp ndơ geh ƀư dơi pla n’hơ ta tâm nchră dja đŏng. Wa mbah rhơn Lào kalơ nău kan ƀư Kruanh ASEAN hŏ ƀư geh nău dơi ăp nău kan, lơn lah ăp tâm nchră gưl têh bah ASEAN, lah rjăp ƀư geh nău dơi tâm nchră choh bok ao way ơm mbra rgop tâm nău dơi bah năm ƀư Kruanh ASEAN, nta trong dơh n’hao âk rơh tâm  nđŭr, tâm boh đah ƀon lan ăp dak  ASEAN, nkre ntik n’hao n’hanh mât ndray n’gâng kan choh bok ao way ơm bah ăp dak.