Ndrĭch lŏ Neh Chăng ta xă Cuôr Knia, nkuăl Buôn Đôn têh rlău 250ha, tă bah ăp nkual ƀon lan gŭ tât rlău 8 km. Aơ lah nkual tuch tăm cà phê, tiêu, ba lŏ bah rlău 40 rnăk tâm xă. Gay lăp nkual tuch tăm, nuĭh ƀon lan knŭng geh 2 trong săch lah rwăch rlău trong xă Ea Bar mô lah rlău ntung dak diăng Nước Trong. Trong rwăch rlău xă Ea Bar ngai rlău 2 tơ̆, hôm rlău ntung ri mô đăp mpăn. Aơ lah ntung bê tông dơi nuĭh ƀon lan rgop êng ndâk ƀư bah năm 2005. Măt ntung hvi 2 mét, mô geh n’gar, lĕ geh âk ntŭk chah đang; ăp n’gâng ntung ri rluh. Gay hăn nsong, nuĭh ƀon lan dŏng ntung si têh jong ndăl rui ntung. Wa Nông Ngọc Quyết, du rnăk gŭ thôn Ea Kning xă Ea Bar, nkuăl Buôn Đôn geh 1,5 ha neh tuch tăm ta aơ, nkoch:

Tâm aơ neh tuch tăm dŭt âk, yơn trong hăn nsong lŏ dŭt jêr jŏt, ngăn lah hăn rgăn ntung. Ntung aơ rdêng aƀaơ mô đăp mpăn.

Buôn Đôn lah ngoăy tâm 2 nkuăl n’har bri bah n’gor Dak Lak. Nău rêh bah nuĭh ƀon lan knơm tâm tuch tăm lŏ mir. Âk nkual tuch tăm trong hăn lŏ jêr jŏt. Tĭng wa Bùi Văn Vinh-Kruanh jrô kan wăng sa ntung trong nkuăl Buôn Đôn, jêh hăn uănh lam nkuăl geh 12 ntung ƀon lan dŏng ŭch dơi ndâk ƀư rhŏ an nău ŭch hăn nsong bah nuĭh ƀon lan. 4 năm bah năp, bah tơm prăk ntop kơl bah Cục đường bộ Việt Nam, nkuăl lĕ ndâk ƀư geh 2 mlâm ntung yung nâp nâl ta ăp xă Ea Huar n’hanh Ea Wer, dĭng lĕ prăk 24 rmen. 10 mlâm ntung ƀa ƀă ŭch nklăp 35 rmen prăk ndâk ƀư ri mô hŏ dơi pă prăk. Wa Bùi Văn Vinh, an gĭt:

Nkuăl lĕ dăn đă trung ương, n’gor ntop kơl du ntung nklăp 300 tât 400 rkeh prăk gay ndâk ƀư nâp nâl, rhŏ an kônh wa hăn nsong pah kan jan sa, rdêng ndơ lŏ mir dơh lơn, kon hŏk hăn nti đăp mpăn tâm yan mih dak lip.

Đah nău geh êng lah n’gor nkual yôk, neh ntu têh hvi n’hanh âk dak diăng, n’gor Dak Lak dŭt ŭch ndâk ƀư tay âk ntung ƀon lan dŏng. Tâm lvang 2016-2022, bah tơm prăk ntop kơl bâh Cục đường bộ Việt Nam n’hanh Ủy ban Dân tộc, n’gor lĕ ndâk ƀư geh 97 ntung ƀon lan dŏng, khlay 200 rmen prăk, ta ăp xă nkual 1, 2 n’hanh 3 ta ăp nkuăl nkual jru ngai. Wa Lê Công Du-Groi Giám đốc N’gâng kan ntung trong n’gor Dak Lak an gĭt, lam n’gor aƀaơ hôm 210 ntung ƀon lan dŏng lĕ jŭr djơh, an ƀư mhe rgâl tay, dĭng lĕ prăk nklăp 400 rmen prăk.

Nău ŭch prăk ndâk ƀư âk, tâm rnôk prăk ntuh kơl bah n’gor đêt, mpôl hên lĕ dăn đă dăn prăk ntop kơl bah Trung ương ntuh kơl an n’gor Dak Lak ơm ntuh kơl ndâk ƀư ăp ntung jŭr djơh ƀa ƀă. Tă bah nĕ ntop kơl nău ŭch hăn nsong, rdêng ndoh ndơ an kônh wa.

Hăn nsong ta ăp ntung jŭr djơh, ntung manh geh âk nău mâp rmanh, yơn yor nău rêh kônh wa ta nkual jru ngai Dak Lak hôm e hăn nsong ăp nar./.