Kêng măng ntri (06/11), nkhêp geh râng ăp tâm nchră âk ding ta Côn Minh, Trung Quốc, Thủ tướng Chính phủ Phạm Minh Chính hŏ geh rơh mâp bar ding đah Thủ tướng Campuchia Hun Manet. Ta rơh mâp, Thủ tướng Chính phủ Phạm Minh Chính lah rjăp, nău way tâm rnglăp, krêp dêh, tâm kơl nsum đah bar dak Việt Nam- Campuchia lah drăp ndơ khlay, lah ngoăy tâm ăp ndơ khlay đah n’gâng kan rlăch ndăng rklaih luh rnoi nuĭh ntơm nơh n’hanh rơh rdâk njêng hun hao bah ăp dak aƀaơ.

Bar Thủ tướng rhơn ta năp ăp nău hun hao bah tâm boh tâm kâng n’har uĕh lăng, tâm rnglăp way ơm, tâm boh lam lĕ rngôch, jŏ jong đah bar dak tâm bah ri  aơ, rhơn rnê nău bar dak way mât mbro ăp trong tâm khâl n’hanh tâm mâp gưl têh, ăp gưl. Bar Thủ tướng lah rjăp nău khlay bah tâm boh Việt Nam - Campuchia - Lào; lah rjăp mât tay trong n’guăk tâm boh đah pe dak ta lĕ rngôch ăp trong kan, yor nău geh an ƀon lan pe dak, yor an bah tâm lơh tâm su, đăp mpăn n’hanh hun hao ta nkual n’hanh  lam ntŭr neh.

 Tâm rnôk râng tâm nchră đŏng, Thủ tướng Chính phủ Phạm Minh Chính hŏ wơt wa Lam Thiên Lập, Kruanh nkual mât êng rnoi Choang Quảng Tây, Trung Quốc, wơt Kruanh ngân hàng hun hao châu Á, mâp Thủ tướng Lào.