Wa Nguyễn Quang Vinh, tâm Tổ 1, thôn 3, xã Nhân Cơ, nkuăl Dak Rlâp, n’gor Dak Nông rhơn rnôk nau kan ntuh kơl nkra trong Bắc-Nam mpeh ba dâng bah Gia Nghĩa (Dak Nông)- Chơn Thành (Bình Phước) hŏ geh Uỷ ban Rnâng kan Quốc hội tâm ban nau mbơh Quốc hội uănh, ƀư ntuh kơl tâm rơh rƀŭn tal 7, khay 5 tât. Wa Vinh ŭch nau nkra trong mra ơm geh ân ƀư, jêh lôch gay trong hăn, ro bah ƀon lan Dak Nông lah êng, Tây Nguyên lah nsum geh nơih lơn. Ăp ntil ndơ kơt cà phê, tiêu, sầu riêng...ma ƀon lan kơt lah wa Vinh lôch geh klih mra geh tăch nơih lơn, rnoh khlay lơn, pơk trong văng sa, rêh jêng hun hao:

 ‘Gâp rnơm lah Quốc hội mra ơm ân ƀư nau kan aơ. Rnôk geh trong cao tốc găn sŏng rlet aơ ri mra ueh oi tâm nau nchuăn rdeng ân ngăch lơn. Trong hăn ueh ri nau văng sa, rêh jêng hun hao dăng, công nghiệp, tuch tăm, lah nsum ăp ntil ndơ mra ueh nơih lơn. Trong cao tốc aơ mra leo tât âk nau săk geh ân ƀon lan”.

Wa Lê Văn Chiến, Uỷ viên Rnâng kan N’gor uỷ, Groi Kruanh Rnâng kan UBND n’gor Dak Nông mbơh, Dak Nông lah êng, nkuăl Tây Nguyên lah nsum lah ntŭk tăm âk ngăn ndơ gay kơl an tăch luh dak ba dih ndrel ê nkra tâm ntŭk. Aơ kŏ lah nkuăl geh âk ntil ndơ khlay ân nau kan công nghiệp, ma ntoh ngăn lah bô xít-alumin-nhôm. Yơn lah, tây Nguyên hôm lah nkuăl rđŭng mpeh nau hun hao văng sa. Nkô̆ nau ngăn lah yor gung trong hăn ê ueh. Mô geh trong dak lêng, mô geh trong loih, lam ăp nkuăl ŭch hun hao ri knŭng kâp rnơm tâm trong jâng geh kơl an, ntuh kơl.

 Wa Lê Văn Chiến lah rjăp, Cao tốc Bắc-Nam mpeh bah dâng Gia Nghĩa (Dak Nông)- Chơn Thành (Bình Phước) mra rgop nau khlay gay ma rkaih nau nkol mpeh trong hăn. Tât mpeh ba dâng, trong aơ mra nthoi ma cao tốc Chơn Thành-Nkual ƀon têh Hồ Chí Minh. Rlŏ tât mpeh ba lơ, aơ mra lah ntŭk ntơm gay ma ntuh nau njêng trong cao tốc rlet rlau Tây Nguyên, ntơm bah Dak Nông hăn Dak Lak, Gia Lai, Kon Tum, nthoi ma miền Trung ndrel nthoi ma Cao tốc Bắc-Nam. Nthoi ăp trong mra njêng ntŭk hun hao mhe, nsôih ntrŭt dăng hun hao văng sa, rêh jêng, ân Dak Nông ndrel nkuăl Tây Nguyên. Đah nau khlay kơt nê, n’gor Dak Nông mra nchrăp ueh, mra ân ăp nau dơi gay ƀư nau kan:

‘N’gor hên kŏ dôl ntrŭnh ƀư ăp nhoat khlay gay ƀư nau kan. Phung hên mra ƀư ăp nau kan pháp lý ndrel nchrăp ân tu tơm tĭng nau rđau bah Chính phủ ah n’gor Dak Nông rgop 1000 rmen ri Dak Nông mra đŏng. Êng nau kan khlay đŏng lah ân geh ntrơn leo ntŭk nkol gay ma ân geh ntŭk ân hên nchrăp nau nkra trong”.

Tĭng nau rgum, trong cao tốc Gia Nghĩa-Chơn Thành geh nau dăng hăn 6 bôk ndeh. Ntŭk ntuh kơl geh pă, đah rnoh jong 128,8km, nau dơi dăng 4 bôk deh, rklaih trong ân ueh du tŏ 6 bôk ndeh hăn. Nau geh kơp rnoh ntuh kơl bah nau kan nklăp 25.540 rmen prăk, tâm nê n’gul lah prăk ngih dak, hôm e lah yor ntŭk tơm ntuh kơl rgum êng.

   Êng tâm n’gor Dak Nông, trong cao tốc hăn rlet jong 27,8km 9ngăn lah hăn rlet trong Dak Rlâp), rnoh neh geh sŏk kân nklăp 526 ha, geh pă ân ntŭk rgum gŭ ntrơn mhe bah 252 rnăk. Wa Phan Anh Tuấn, Bí thư nkuăl uỷ Dak Rlâp, n’gor Dak Nông mbơh, ƀư tĭng nau rđau bah n’gor uỷ, Uỷ ban nhân dân n’gor, lam ntrong kan chính trị bah nkuăl hŏ lăp kan gay ma nchrăp ân nau kan.

Tâm nau ƀư tĭng ăp bôk nau kan, nkuăl hŏ kơp, ntrŭnh rgum 6 ntŭk gŭ mhe, 10 ntŭk sŏk ndơ ê nkra nkret njêng, 8 ntŭk ân ndŏk jêh dŏng. Nkuăl kŏ rđau ăp ntŭk kan, ăp xã tâm rgop kơp, mbơh nau dôl geh bah neh, tơm tăm, drăp ndơ tâm ăp ntŭk rgum ƀư trong, mra ân nau ntrơn leo ntŭk ân ntơm nkra:

 ‘Ƀư nau rđau bah n’gor ri hên hŏ ndâk Rnâng kan bonh đă, nkoch trêng ndrel ndâk du đê̆ rmôt kan. Dĭng lĕ ăp nkuăl, ăp Đảng bộ xã, phường, nkuăl têh, rmôt kan đăp mpăn, tahen, jêh ri mặt trận, rmôt kan kŏ râng lăp tâm nau kan. Aơ lah du nau kan têh, lam ntrong kan chính trị lăp kan da dê, rđau ân rjăp, mhâm ƀư ân geh nau tâm ban nuih n’hâm bah ƀon lan”.

 Dak Nông hŏ nchrăp, nsôih ƀư ăp nau dơi gay rnôk geh nau kan nkra trong cao tốc Gia Nghĩa-Chơn Thành geh ƀư mra ngăch kan ngăn. Nau kan Dak Nông nchrăp ƀư nau kan hŏ ân saơ nau ŭch hun hao văng sa, rêh jêng ân rjăp ngăn bah n’gor./.