Ntrŏng pâl nđaih bri dak, văn hóa lah suan dăng, n’gor Dak Lak hŏ n’hanh dôl geh âk trong nkra gay ntrŭt ntrôl hun hao pâl nđaih ta ntŭk. Bah nê, mât rnoh ngăch hun hao rlău 15%/ăp năm. Ƀư kloh nkô̆ dja, Phóng viên H Xíu, way gŭ Tây Nguyên ôp wa bu ur Nguyễn Thụy Phương Hiếu, Groi Giám đốc Sở Văn hóa, Thể thao n’hanh Pâl nđaih Dak Lak

 - Ơ hơi wa Nguyễn Thụy Phương Hiếu, pâl nđaih ta n’gor Dak Lak ndjôt săk tơm văn hóa ăp rnoi nuĭh, uănh khlay bri dak, rƀŏng tât hun hao jŏ jong. Nău dja dơi geh bah ăp trong rƀŏng hun hao bah n’gor mhâm êh?

Wa Nguyễn Thụy Phương Hiếu: Dak Lak hŏ năl dơi suan dăng bah he lah hun hao pâl nđaih bri dak n’hanh văn hóa. Đah 49 rnoi nuĭh ndrel gŭ rêh lah ngoăy tâm ăp jâng nsan dăng gay njêng luh nău dơi tâm rđĭl Dak Lak đah ăp n’gor êng ƀa ƀă, njêng luh âk ndơ geh ƀư lơn gay wăch rgum năch tât đah n’gor.

 Tỉnh ủy hŏ n’gluh an dŏng đề án mpeh hun hao pâl  nđaih, aơ lah ntŭk nsing gay ăp n’gâng kan, ăp nkuâl rgum an ƀư hun hao 3 n’gâng tơm mpeh pâl nđaih, lah geh nkual ƀon têh Buôn Ma Thuột, Lắk n’hanh Buôn Đôn. Ăp nkuâl, thị xã wăr kiău ma nău kan ntop kơl, rdâk njêng ăp bôk nău kan, ăp tour hăn.

  Dak Lak gŭ tâm ntŭk rêh văn hóa chĭng gong Tây Nguyên, ri ton đah UNESCO mpeh mât ndray chĭng gong. Tâm lvang năm 2021 - 2025, n’gor hŏ n’gluh an dŏng âk nghị quyết mpeh chĭng gong, nghị quyết ntop kơl ƀon lan ăp thôn, buôn hun hao pâl nđaih nsum mpôl. Rgum ăp tơm ndơ, ăp trong nchrăp kan, ăp trong kơl hun hao wăng sa nkual rnoi mpôl đê̆, ntik n’hao geh rgum tơm mpeh pâl nđaih gay nkre mât ndray văn hóa, nkre hun hao ntŭk pâl nđaih.  

- Mhe aơ nơh nău hun hao pâl nđaih tĭng trong rƀŏng dja mhâm geh nău dơi ƀư êh wa?

 Wa Nguyễn Thụy Phương Hiếu: Ăp năm ri rnoh ngăch mpeh hun hao pâl nđaih, lĕ ma nsĭt geh bah pâl nđaih n’hanh năch pâl nđaih geh rlău ntơm bah 10 – 15% da dê, kơp lĕ ma  năch tâm dak n’hanh dak bah dih. Bol rlău 2 năm nuh srê Covid-19, yơn rnoh ngăch hun hao lvang năm 2021 -2025 rlău đah trong nchrăp ndơ̆ luh.

- Hun hao pâl nđaih bri dak n’hanh văn hóa nsing tâm nău ơm geh, tâm rnôk âk n’gor nkual ƀon têh êng ƀa ƀă dôl ƀư tĭng trong rƀŏng dja đŏng, ndrĭ n’gor Dak Lak mhâm ƀư gay nkơnh n’hơ dơi ăp săk tơm êng bah ntŭk he tât đah năch pâl nđaih, êh wa?

Wa Nguyễn Thụy Phương Hiếu:  Tâm trong rƀŏng hun hao pâl nđaih bah n’gor n’gluh nkô̆ nău tâm buăt nthoi, tâm boh đah ăp n’gor êng,  ri n’gor rgum sơch ăp n’gor săk geh âk mpeh pâl nđaih n’hanh geh trong mpăr tât Dak Lak. Aƀaơ n’gor  hŏ tâm boh đah 14 n’gor, nkual ƀon têh n’hanh du hiệp hội ta nkual công nghiệp ta Nkual ƀon têh Hồ Chí Minh. Yor geh tâm boh, tâm rgop kan nsum jêng tâm ăp bôk nău kan ntrŭt ntrôl ngăch nkơnh n’hơ ndrel rdâk njêng ăp bôk nău kan rgum ntik n’hao suan dăng bah dak lêng đah bri. Đah năch dak bah dih ri ma ăp bôk nthoi kơt Khhánh Hòa, Hà Nội, Nkual ƀon têh Hồ Chí Minh gay wăch rgum năch pâl nđaih tât đah n’gor. Lor nchrăp buăt nthoi, râng ăp nar kan tâm boh dak bah dih gay nkơnh n’hơ rup gui, săk geh mpeh văn hóa, kon nuĭh Dak  Lak tât đah ăp n’gor.

-Ơ kơt ay mhe nkoch nê ri ntik n’hao săk geh bah ăp n’gor, buăt nthoi bri – dak lêng gay tâm ntop nsum lah trong ma Dak Lak tâm rgop kan nsum ntrŭt ntrôl hun hao pâl nđaih. Ndrĭ êng ta n’gor Dak Lak nơm mbra n’hao pah kan pâl nđaih mhâm ƀư gay wăch rgum n’hanh kân jâng năch êh, hơi wa?

Wa Nguyễn Thụy Phương Hiếu:  Sở rƀŏng trong an ăp doanh nghiệp lor nchrăp rdâk njêng ntŭk mhe nsing ta jâng tơm văn hóa đŏng gay njêng uĕh mhe, mha êng. N’hao săk tam mpeh mât dŏng ngih dak, leo ƀư ntĭm nti, kơi năp nti an tơm nuĭh kan ta ntŭk, tŏng đah nău ŭch geh nar lơn ma âk bah năch pâl nđaih. Ntrôl dăng nău kan bah hiệp hội pâl nđaih, njêng ăp chi hội n’gâng kan mpeh hiệp hội, ntik n’hao suan dăng bah ăp trong kan êng ƀa ƀă, ma ăp nar kan văn hóa, pâl nđaih mô lah ăp nar tâm rlong thể thao ma Dak Lak đăng cai gay wăch rgum năch tât đah n’gor.

Tâm khay 10 dja, Sở mbra nsŏng kơl an UBND n’gor đăng cai tâm nchră uănh năl rnôk tâm buăt nthoi, tâm boh nsing ta nê mbra rdâk njêng trong nchrăp tâm boh tâm rơh mhe geh nău dơi tam lơn. Nkre, Hiệp hội pâl nđaih Dak Lak mbra njêng tay 2 chi hội đŏng, lah chi hội Khách sạn – ndơ ngêt sa n’hanh chi hội Hăn leo pâl jong nar, ntik n’hao suan dăng hun hao pâl nđaih ta n’gor.

-Ơ, dăn lah uĕh wa Nguyễn Thụy Phương Hiếu, Groi giám đốc Sở Văn hóa, Thể thao n’hanh pâl nđaih Dak Lak.