Nkhêp nkah ndray 135 năm nar deh Kruanh Hồ Chí Minh, Bộ Văn hóa, Thể thao n’hanh Pâl nđaih ƀư bôk nău kan njroh mprơ mha êng đah nkô̆: “Nklâm ndơ khay 5 n’hơr an Wa”. Njroh mprơ ƀư măng nar (14/5) ta Jay mprơ têh Hà Nội, mpơl nău nkah gĭt jru hvi n’hanh nău tâm rŏng dŭt n’hâm bah ƀon lan lam dak đah Kruanh Hồ Chí Minh – kruanh dŭt têh blău, Nuĭh dăng janh rklaih luh rnoi nuĭh, Danh nhân văn hóa rlău nău gĭt blău.

Ma ăp nău njroh mprơ săk ntơr êng, bôk nău kan lah rjăp nău khlay kăl e, têh khlay nău mĭn n’hanh drăp ndơ ơm yău ma Kruanh Hồ Chí Minh ntlơi an tay cách mạng Việt Nam n’hanh an hun hao bah rnoi nuĭh. Măng njroh mprơ dơi tâm pă ƀư 3 gâl ntơm bah rup gui ndăm jê̆ Nguyễn Sinh Cung âk nău nđơr; Ăp njuat chuat Wa hăn wăr lam ntŭr neh joi trong kơl neh dak; Rup gui Wa Hồ mbleh ngăn tâm nău rêh ngăn, măt mbleh mblôn, rum gơm yô̆ an đah ƀon lan, tahen…lĕ rngôch dơi mpơl tay rêh uĕh ma trong ƀư tâm rlai lăp nkre đah nău njroh mprơ nchreng an uănh n’hanh rup gui ơm điện ảnh, nsĭt tât măng djăt uănh gĭt âk nău yô̆ rngot, lăp tâm nuih n’hâm nuĭh.