Ta nkual neh hvi 5 ha bah nău nchrăp ƀư Ngih samƀŭt Phổ thông nội trú 2 gưl Tiểu học n’hanh THCS Ia Púch, n’gor Gia Lai, ăp tahen ndrel rmôt kỹ sư, phung pah kan dơi tâm pă âk rmôt, rêng hvi ăp ntŭk kan gay ntop kơl ndâk ƀư ăp ntil ndơ kơt jrô nti, thư viện, jay dŏng ăp ntil, nkual kon hŏk gŭ.

Ăp mpang ty ơm bên đah djôt phao uănh nđôi, mât njrăng ƀư tơm n’har bri, aƀaơ nchoăn rdêng gạch, pot choih, ntă mpir, n’hao ngăch ndâk ƀư ngih samƀŭt mhe an oh kon se nkual n’har bri. Jŭt âk dak rhal ta muh măt, Trung úy Cao Kiến Giang, tahen Pôih tahen n’har bri Mpông n’har bri Quốc tế Lệ Thanh nkoch:

Ntơm lăp nău kan, rnôk gâp hôm e mha ndrăt yơnm dơi nău ntĭm bah ăp yô ăp kônh ta ntŭk kan, ri gâp lĕ dơi mkra jêr jŏt n’hanh lôch uĕh nău kan dơi jao. Ăp nar hăn pah kan sĭt ŏk r’ah, gâp dơi geh nău uănh kơl bah kruanh đah nău kơl ndơ sông sa, rlu rlău tŏng ăp jêng săk gâp n’hanh ăp đồng chí, băl mpôl đăp mpăn mât ăp nar.

Trung tá Phạm Tiến Sỹ, Groi Đồn trưởng Pôih tahen n’har bri Ia Pnôn-Ntĭm rđău rmôt tahen n’har bri ntop kơl ndâk ƀư an gĭt: rmôt tahen râng ntop kơl dơi hăn uănh, tâm pă nău kan tâm di đah nău way kan, săk soan n’hanh nău blău tĭng ăp nuĭh; nkre tâm rgop rjăp đah ntŭk kan ndâk ƀư gay mât uĕh săk rnglăy âk. Trong kan ntop kơl dơi đăp mpăn tŏng ăp, bah ntŭk gŭ tât ndơ gŭ âm, kơl cán bộ, tahen tĭng đah ntŭk kan.

Mpôl hên tâm rgop đah ntŭk kan ndâk ƀư, tâm pă rmôt tâm di, khoa học, đăp mpăn ăp ntŭk râng ntop kơl gay ƀư uĕh nău kan. Aơ lah nău kan chính trị dŭt n’hâm khlay, n’hanh nău rŏng bah cán bộ, tahen rmôt tahen n’har bri đah ƀon lan n’har bri. Mpôl hên ntĭm nti mro an cán bộ, tahen mpeh nkô̆ nău chính trị, rêh jêng n’hanh nău uĕh bah ntŭk kan. Bah nĕ jêng an oh nô dŭt n’hâm gay nkra nău jêr jŏt, lôch uĕh ăp nău kan dơi jao.

Gay ntop kơl ăp ƀon lan n’hanh ntŭk kan ndâk ƀư lôch nău rƀŏng n’gluh an, bah n’gul khay 5/2026 tât aƀaơ, ndrel đah rmôt tahen n’har bri, N’gâng kan Ntĭm rđău Tahen n’gor Gia Lai, Quân đoàn 34 n’hanh Công an n’gor Gia Lai lĕ rgŏ jă dĭng lĕ rlău 500 cán bộ, tahen râng ntop kơl lĕ 7 ntŭk ƀư tâm nău nchrăp ƀư. Mô knŭng na nê̆ râng ndâk ƀư, ăp ntŭk kan hôm ntĭm nti, mât uănh cán bộ, tahen wât kloh nkô̆ nău bah ndơ ƀư, tĭng rjăp kỷ luật, ryơk nău way ơm bah ƀon lan ta ntŭk. Tă bah nĕ rgop n’hao tâm rnglăp ƀon lan tahen, mât nâp rnă njrăng chính trị n’hanh đăp mpăn nău rêh jêng ta trong n’har bri. Hạ sĩ Hà Minh Hùng, tahen Pôih tahen n’har bri Ia Chía, an gĭt:

Tâm rnôk pah kan, gâp nsrôih đăp mpăn đah nuĭh n’hanh ndoh ndơ. Đah săk nơm n’hanh đồng chí, băl mpôl lĕ dơi ntĭm nti bah ntĭm rđău đah nkô̆ nău ndơ ƀư đah oh kon ta n’har bri, bah nĕ kơl oh nô nuih n’hâm uĕh lơn, mkra jêr jŏt gay lôch jêh nău kan.

Nău nchrăp ƀư ndâk nkra 7 ngih samƀŭt nội trú 2 gưl Tiểu học n’hanh THCS ta ăp xă n’har bri n’gor Gia Lai geh dĭng lĕ rnoh ntuh kơl rlău 1.500 rmen prăk. Tât aƀaơ, lĕ rngôch nău nchrăp ƀư lĕ jêh nklăp 47% rnoh ndơ ndâk nkra. Bôl ăp nuĭh ndranh lĕ n’hao măy mŏk, ndoh ndơ n’hanh nuĭh kan, ngăch ndâk ƀơ hôm e mbrơi bah 15 tât 40 nar nkôp đah trong nchrăp.

Nău ntop kơl bah rmôt tahen lĕ rgop “tâm pă ŭnh” đah ntŭk kan ndâk ƀư, nsrôih jêh ndơ ƀư di nău đă bah n’gor. Wa Nguyễn Trung Quyến, ntoh măt ntŭk kan ndâk ƀư ta Ngih samƀŭt Phổ thông nội trú 2 gưl tiểu học n’hanh THCS Ia Púch, an gĭt:

Băng: Nar lôch jêh gay ndơ̆ an dŏng mô hôm jŏ. Ta năp măt lah du yan mih, jêng nău ntrôl ngăch lah nău dŭt n’hâm ndăn, mô hôm geh trong êng. Đah ndơ ndâk ƀư ƀon lan dŏng, ri trong mkra ngoăy dơm lah n’hao nuĭh kan. Nău tahewn ntop nuĭh kơl nuĭh ndranh ri lĕ n’hŭch du gưl nău jêr an nuĭh kan an nuĭh ndranh, gay ntrôl ngăch ndơ ƀư.

Nău tât râng bah rmôt Tahen N’har bri ndrel ăp ntŭk kan tahen, công an n’gor Gia Lai mô knŭng rgop dôh rklaih jêr jŏt mpeh nuĭh kan, ntrôl ngăch ndâk ƀư, ma hôm saơ nuih n’hâm lĕ đah nău kan, nău hăn ndrel bah rmôt tahen đah nău kan ntĭm nti nkual n’har bri mpeh bah lơ bâh n’gor Gia Lai.