Ndrel ma lam dak, kônh wa ăp rnoi tâm Tây Nguyên kŏ rhơn vơt ăp nar lễ têh ngăn bah neh dak, râng ăp nau kan Giỗ tổ Hùng Vương, nkre geh ăp nau ơm ueh, êng bah ăp rnoi mpôl. Du ntŭk tât tâm rnôk Giỗ tổ Hùng Vương lơ 10 khay 3 âm lịch năm aơ lah chùa Tháp Kỳ Quang, râm xã Đăk Mar, nkuăl Đăk Hà, n’gor Kon Tum. Kônh wa ăp rnoi Bana, Xơ đăng...tâm nkuăl mro râng ntơm bah ăp nar nchrăp. Ndrel kơl an Rnâng kan ƀư ăp nau kan gay ma vơt âk bu năch tât, phung bu ndăm hôm tâm rlong du đê̆ nau pâl kơt lah tâm ntrôl mâng, tâm têk sre, hao n’gâng mbir...Tâm nar Giỗ Tổ, ndrel đah nau leo ăp ntil ndơ kah, ueh, khlay yor nơm ƀư kơt lah: Piăng m’êt, cà phê, kao play...tât ăp Kđăch Hùng, kônh wa hôm tur chĭng, njroh mprơ gay ma ntoh nau rhơn ndrel ntoh nau nkah ueh ngăn ân ăp Kđăch Hùng ndrel âk nŭih leo lor hŏ geh n’hâm ndâk neh dak, mât neh dak. Nô A Thiếk, tâm ƀon Kon Klôk, xã Đăk Mar, nkuăl Đăk Hà, mbơh:

‘Ăp năm, lah tât Nar Giỗ Tổ Hùng Vương, thôn Kon Klôc phung hên vay rgum bu ranh ƀon, druh ndăm ƀư tur chĭng, njroh mprơ gay ma nkah nar Giỗ Tổ. Nau ƀư aơ mô knŭng gay ma geh tâm mâp ma nau khlay lơn lah n’hao nau tâm rnglăp tâm ƀon. Ăp rnôk ƀon lan geh nau nau rgum, mô lah tâm ăp nar ễ têh bah neh dak ri mô dơi mô geh chĭng, gong, njroh mprơ ôh. Nkah nar Giỗ Tổ Hùng ương, hên mô knŭng ƀư tâm ƀon ma tât ăp ƀon êng đŏng kŏ geh ƀư, tâm n’ur gay ma ntĭm nti ân rơh mom dĭt lơn mpeh nau vay “Ngêt dak nkah gĭt tu”, nkah ăp kđăch Hùng hŏ geh n’hâm ndâk dak, rnơm nê nơm mơ geh nau rêh hơm răm, đăp mpăn kơt nar aơ”./.