Âk nău kan ngăn ngăn êt lhăt tay nău tâm rnglăp đah sỹ quan mom tahen n’har bri Việt Nam n’hanh sỹ quan mom Công an Lào dơi ƀư ta n’gor Kon Tum. Tâm rnôk tâm nđŭr sỹ quan mom tahen n’har bri Việt Nam n’hanh sỹ quan mom Công an Lào, ta Jay văn hóa tâm rnglăp Việt Nam- Lào- Campuchia ta thôn Tà Ka, xã n’har bri Pờ Y, nkuâl Ngọc Hồi, n’gor Kon Tum ƀư âk nău kan geh nkô̆ hôr khlay, ngăn ngăn êt lhăt tay nău tâm rnglăp đah ăp sỹ quan mom bar dak.

Ta aơ ăp sỹ quan mom Việt Nam- Lào ƀư Tâm nchră nkoch trêng, đăm gĭt pháp luật an ƀon lan nkual n’har bri bar dak. Ăp sỹ quan mom Việt Nam- Lào ndơ̆ kơl học bổng “Ndơl jâng oh tât nhih nti” an 40 kon se nti đŏng, tâm nê geh 20 kon se nti Việt Nam n’hanh 20 kon se nti Lào geh nău rêh jêr jŏt; ndrel tăm mbor  tơm si tâm rnglăp tâm jâng gung Jay văn hóa gay keh têl nar ƀư n’hanh njêng rup uĕh ntŭk gŭ rêh.