Ăp năm aơ, ƀon lan Cơ Tu ta nkual yôk yang n’gor Quảng Nam ntuh kơl tăm bri, nsĭt tay nău geh wăng sa âk, kơl kônh wa n’hao nău geh rlău jêr jŏt ƀư geh ndrŏng. Yơn lah, kônh wa lơn âk tăm tơm keo geh ma nău dak rchoh neh khuch khat bri dak. Bar pe năm aơ, n’gor Quảng Nam hŏ n’gluh an dŏng âk trong ntrŭt nsôr nuĭh tăm bri rgâl bah tăm bri si jê̆ jêng tăm bri si têh, nkre hun hao wăng sa, nkre rgop mât njrăng ntŭk gŭ rêh.

Nô A Rất Vu, ta tổ dân phố A Dinh, thị trấn Prao nkuâl Đông Giang tăm rlău 4 héc ta keo, nơm geh dŏng kỹ thuật tăm, mât chăm jêng nkual bri keo bah nô hao jêng uĕh. Nău tăch si năm aơ, nô A Rất Vu nsĭt geh bơi 100 rkeh prăk. A Rất Vu an gĭt, nơm geh tăm bri, rnăk hŏ klaih rlău ach o, đăp mpăn nău rêh. Tĭng nô Vu: Tăm keo geh dŭt đêt tơm prăk ntuh kơl n’hanh ŏ r’ah tâm năm bôk năp dơm. Nô A Rất Vu an gĭt, aƀaơ rnăk ntơm râng tăm bri si têh:

“Ntơm nơh rnăk tăm ba mir  dơn tŏng sa rlău nar dơm, tâm tăm  tơm keo nău rêh rgâl geh lơn. Ntơm bah rnôk geh ngih dak geh trong nchrăp tăm tơm si têh nuĭh ƀon lan dŭt nđơr tĭng. Mpôl hên nchrăp rgâl tăm si  têh  gay hun hao  mpeh wăng sa đăp mpăn lơn. N’gâng kan ta ntŭk dŭt uănh khlay ntop kơl  kônh wa kon si ntil tơm si têh”.

Tâm ban kơt nô A Rất Vu, yuh A Lăng Thị Trang, rnoi Cơ Tu ta xã Ka Dăng, nkuâl Đông Giang tăm rlău 6 héc ta keo. Yuh A Lăng Thị Trang an gĭt, nơm geh hun hao tăm bri, rnăk hŏ geh nsan hao  mbơm oi. Yơn lah, ŭch nsĭt geh wăng sa jŏ jong,  yuh hŏ rgâl tăm bri si têh rlău 2 héc ta:

“Rgâl tăm si têh gay hun hao mpeh wăng sa đăp mpăn lơn. Yơn lah mông nar dăp rgum jŏ lơn rđĭl đah tơm keo yơn n’gluh wăng sa đăp mpăn rlău tơm keo. Tăm keo wăng sa đăp mpăn rlău tăm mbo, tăm ba, rƀŏng tât let năp tay gay tăm tơm si têh đah rnoh têh hvi lơn gay he hun hao. Nău rêh bah he aƀaơ mbơm oi rđĭl đah ntơm  nơh”.

Tâm bah ri aơ nơh, UBND nkuâl Đông Giang, n’gor Quảng Nam uănh khlay pơk hvi rnoh neh tăm bri tăch, tât trong rƀŏng ntuh kơl n’hao săk geh bri n’hanh rgâl bah bri tơm si jê̆ jêng tăm tơm si têh. Rĭng ăp năm, nkuâl dja tâm pă prăk ntơm bah 1,5 tât 2 rmen prăk ntop kơl nuĭh ƀon lan n’hao săk geh bri, lơn âk rgum tăm bri si têh. Nkuâl Đông Giang hŏ ntop kơl nuĭh ƀon lan tăm rlău 500 ha bri si têh đah âk ntil tơm săk geh âk kơt tơm rdăp, tơm lim ư̆r, tơm n’ger, tơm ryum, huỳnh đàn…Nkuâl Đông Giang nsrôih tât năm 2025 n’hao lĕ rngôch rnoh neh tăm si têh hao tât 4.500 ha. Wa Đỗ Hữu Tùng, Groi Kruanh UBND nkuâl Đông Giang an gĭt:

“Aơ lah trong nchrăp di bah nkuâl tâm ban kơt bah n’gor đŏng gay ntrŭt nsôr an nuĭh ƀon lan mât tăm bri nar lơn ma rơ̆ jêng âk. Lam nkuâl hŏ rgŏ jă an nuĭh ƀon lan tăm du năm dŭt đêt lah 300ha tăm bri si têh ma ăp ntil tơm kơt tơm gáo êr, tơm mùng, tơm n’ger, kơp lĕ ma tơm keo mhâm ƀư mât dơi bri đăp mpăn n’hanh ntơm bah nê njrăng n’gang dơi dak rchoh pĭch rlâm neh, trôk nar lơh dak bŭk. Ntơm bah nê nuĭh ƀon lan mbra mât njrăng bri uĕh lơn, hun hao wăng sa, jut jăng ji ngot n’hŭch ach o. Let năp tay nsĭt geh bah nău  tăm bri si têh âk lơn n’hanh nsĭt an nuĭh ƀon lan nău geh wăng sa đăp mpăn jŏ  jong. Mbra tăm rơ̆ jêng hvi âk lơn lam ăp ntŭk lam nkuâl.”

Ta ăp nkuâl yôk yang n’gor Quảng Nam geh hang rhiăng rnăk ƀon lan Cơ Tu râng hun hao tăm tơm keo n’hanh an nsĭt nău geh wăng sa đăp mpăn. Quảng Nam hŏ n’gluh an dŏng âk trong ntrŭt nsôr nuĭh tăm bri rgâl bah tăm bri  si jê̆ jêng bri si têh kơl nuĭh ƀon lan nkre hun hao  wăng sa, nkre rgop mât njrăng ntŭk gŭ rêh neh ntu. Dơi gĭt, n’gor Quảng Nam geh rlău 769.000 ha bri  n’hanh neh dăp rgum hun hao bri. Ăp năm, rnoh âk si tăm rhŏ dŏng an nău kan tâm dak n’hanh tăch n’gluh bah n’gor nklăp 1,45 rkeh mét khối, rgop nta joi nău kan, kơl nuĭh ƀon lan mpeh yôk yang klaih rlău ach o jŏ jong.