Tĭng ƀư trong nchrăp hun hao wăng sa mpôl, trong leo ƀư hợp tác xã dôl hao âk ta ăp nkuâl bah n’gor Sơn La, ntrŭt ntrôl dăp rgum wăng sa, rgâl trong mĭn, trong kan bah nuĭh ƀon lan. Nău tâm rgop kan nsum tuch tăm mô dơn kơl hợp tác xã pơk hvi trong tuch tăm ma hôm kơl nuĭh ƀon lan kan lŏ mir râng tâm trong ntĭt leo wăng sa mhe geh nău tam n’hanh nâp dăng.

Rnăk yuh Lê Thị Thắm, ta phường Chiềng Cơi, nkual ƀon têh Sơn La aƀaơ dôl mât chăm bơi 2 ha ăp ntil biăp. Lah ntơm nơh yuh Thắm ơm ôi rŭ ŏ r’ah ndjôt biăp hăn chợ tăch, rnoh khlay rgoh n’gơ, ri ntơm bah rnôk râng hợp tác xã Tuch tăm ư̆r 26-3 ta nkual ƀon têh Sơn La, lĕ rngôch bum biăp geh ƀư dơi hợp tác xã rvăt lĕ đah rnoh khlay đăp mpăn. Ndăn dŏng neh mir lâng, rmŭ jêng gay tăm ăp ntil bum biăp, ăp năm  rnăk nsĭt geh bơi 200 rkeh prăk:

Ntơm bah rnôk râng hợp tác xã  ri rnoh âk bum biăp bah he âk đê̆ n’hanh he geh du ntŭk  tăch đăp mpăn, mô kâp hăn chợ, rnoh khlay bar ding tâm ban ŭch bah ntơm bôk năp păng đăp mpăn ri he djăt ma ndơ̆ tăch dơm, biăp ri he ƀư di rêng kan bah hợp tác xã.

Lôch 8 năm tăch dơi ndơ tuch tăm kloh uĕh, hợp tác xã Tuch tăm ư̆r 26-3 lah ntŭk nsing nơm tâm nău tuch tăm n’hanh tăch ndơ tuch tăm đăp mpăn ta Sơn La. Mô dơn ntop kơl tuch tăm, tăch ndơ tuch tăm kloh uĕh an 12 nuĭh lăp kan nsum n’hanh rnăk ƀon lan tâm rgop kan nsum, aơ lah ntŭk ndơ̆ rgâl khoa học kỹ thuật, kơl nuĭh ƀon lan rgâl trong mĭn, trong ƀư tâm nău kan tuch tăm. Nô Trần Mạnh Hùng, ta bản Nong Nái, xã Chiềng Mung, nkuâl Mai Sơn an gĭt:

Ntơm  nơh hên tăm prit ri rĭng nsĭt geh lah 5 rkeh prăk/khay, aƀaơ đah rnoh âk bum biăp kơt aơ ri rlău 2ha biăp ri gâp nsĭt geh nklăp 7 rkeh prăk/khay. Ntơm bah khay 6 năm e nơh gâp tâm rgop kan nsum đah hợp tác xã saơ nsĭt geh wăng sa hun hao âk lơn. Hợp tác xã ntop kơl he kon ntil, phân poh n’hanh kỹ thuật mât chăm.

Đah nkual tăm hvi rlău 13 ha, ăp khay hợp tác xã 26-3 tăch luh 30-  40 tấn bum biăp ăp ntil. Gay tăch lĕ rngôch rnoh âk ndơ tuch tăm geh ƀư luh, hợp tác xã hŏ n’hanh mât mbro 4 ndrơng ndơ ta chợ 7/11, chợ 308 n’hanh chợ Rặng Tếch, nkual ƀon têh Sơn La. Mât mbro nău tâm ton jŏ jong đah ăp ntŭk n’gon sa mpôl kơt nhih dak si, nhih nti; nkre pơk hvi trong tâm pă tăch ndơ tuch tăm kloh uĕh tât ăp siêu thị, chợ bôk tơm nkual mpeh bah lơ. Ăp bum biăp đăp mpăn bah hợp tác xã geh rnoh tăch  khlay lơn bah dih nklăp 20-30%, nơm geh rnoh khlay tuch tăm hao âk lơn đŏng. Yuh Hoàng Thị Thắm, Groi giám đốc hợp tác xã Tuch tăm ư̆r  26-3 Sơn La nkoch:

Tăch ndơ tuch tăm đah hợp tác xã ri mpôl hên geh dŭt âk trong, bôk năp  lah ta ăp ntŭk tăch ta mạng xã hội kơt facebook, zalo n’hanh ăp ntŭk tăch rgâl điện tử. Mpôl hên dŏng n’hanh tăch ndơ ma ăp trong nê nsĭt tay geh nău tam đŏng, năch dăn rvăt n’hanh mpôl hên ship, ăp ntil saơ dŭt dơh soih n’hanh dơh uĕh lơn. Trong tăch tâl 2 lah mpôl hên tăch offline ta ăp ntŭk pla tăch na nê̆.

Đah trong ƀư ngăch ngăr, blău njêng mhe, nău tâm rgop kan nsum tuch tăm mô dơn kơl hợp tác xã pơk  hvi trong tuch tăm, âk ntil  ndơ geh ƀư tuch tăm, bah ndơ nđĭr rêh tât ndơ geh ƀư nklâm tâl, ma hôm kơl nuĭh ƀon lan tăch ndơ tuch tăm đah rnoh khlay đăp mpăn. Du trong ntĭt leo wăng sa mhe dơi njêng, nsĭt tay nău geh an lĕ rngôch ăp ding râng, ntơm bah nê ntrŭt ntrôl hun hao wăng sa tuch tăm. Nô Nguyễn Đình Đại, bản Thống Nhất, xã Chiềng Mung, nkuâl Mai Sơn, n’gor Sơn La lah:

Aƀaơ he geh thanh long, si klôn, blân dôl tâm rgop  kan nsum hợp tác xã. Rnôk he tâm rgop kan nsum tuch tăm dơi ri trong tăch luh ndơ geh ƀư tuch tăm bah he dơh lơn, nsĭt geh nău đăp mpăn lơn, jŏ jong lơn.

  Ta ăp nkual ƀon lan bah  n’gor Sơn La, nău tâm rgop kan nsum tuch tăm dơi uănh lah trong ƀư tâm di, nsĭt geh nău tam tâm nău dăp rgum wăng sa, jêng rêng  tâm rgop kan nsum tuch tăm, n’hao săk geh kah uĕh ndơ tuch tăm, tŏng đah nău ŭch geh bah ntŭk tăch rgâl.