Lôch bar pe rơh mih bôk yan, ăp play sầu riêng tâm mir jay Y Bliêng Hmok, ta ƀon Tara, xã Hòa Đông, nkuăl Krông Păk têh dŭt ngăch, lĕ rngôch lĕ hao têh dĭng ngan piăng da dê. Y Bliêng rĭ dôl yao ta tơm play, kât rđâng  n’ging tơm, n’gĭng play. Ta njônh mir, du tơm sầu riêng kơt lĕ mô hôm dơi rêh, geh sui vôi nglang ta ntu. Y Bliêng an gĭt, duh phang ta khay wai mhe nơh ƀư an tơm mô hôm dăng, rnoh play kanŭng geh du n’gul đah khay aơ yan ba năp, jêng rnăk vâl gâp rgum mât chăm, njrăng khuch play yor bu tuh mô lah pă rŭng yor mih sial.

“Yan aơ dŭt âk lah he kanŭng puh dak si n’hanh kât sầu riêng. Kât ăp n’gĭng prêh geh play jâk an bah rŭng ôm lah mih sial. rŭng tup bar pe play lah nsoach ngăn.

Đah ăp rnăk geh mir đê̆ n’hanh kanŭng bar pe jât tơm sầu riêng kơt Y Bliêng, lĕ geh dơi mât chăm êng mir tơm bâh nơm, yơn ăp rnăk tăm âk sầu riêng, ngăn lah sầu riêng jŏ năm, lĕ geh sŏk manh nuĭh kan âk gay ma mât njrăng lah geh mih sial hô. Kơt rnăk wa Phạm Dần, ta thôn Hòa Thành, xã Hòa Đông, bâh n’gul khay 5, rnôk play hôm nha jê̆, lĕ geh đă 6 nuĭh kan hao ta tơm kơt play, kât n’gĭng. Wa Dần an gĭt, rnôk geh mih mbro, play sầu riêng têh ngăch ngăn, du n’gĭng sầu riêng mbra geh play tât n’gul tạ, jêng rnăk hên ƀư ndăn.

“Lĕ tât ta khay mih hôm, gâp nchrăp ƀư lah mô rĭ mô năn. Yor mih way geh nkre sial. Ma rnôk nĕ, play lĕ têh hôm, mâp sial lah pă rŭng dâl”.

Đah rnăk vâl wa Nguyễn Đình Vượng, thôn Hòa An, xã Hòa Đông, nău mât chăm sầu riêng lơ ma geh âk lơn. Mir tơm 18 năm, n’gĭng mbah dŭt pŭm, geh rnôk lah đă tât 10 nuĭh mât kan. nuĭh peh pih, nuĭh nchoăn mâng loih rdâng ta tơm wa Vương nchŏng, gay ma kơl an sầu riêng bah pă chôt lah geh mih sial. Ăp nuĭh êng rĭ hao ta tơm gay ma kât n’gĭng bah pă. Tĭng nău mbơh bâh wa Vương, yan sầu riêng bâh ntơm geh play tât rnôk lêh play way jŏ klâp ma 130 nar, aƀaơ lĕ geh rlău 60 nar. 70 nar hôm e bâh yan mât tăm, ƀon lan mbra nsrôih mât ueh ăp play sầu riêng. Lĕ ma nuĭh ƀư kan n’hanh nuĭh tơm mir, geh mât ueh play kơt lah mât khlăy dak rhal săk nơm.

“Mê uănh tơm i aơ . Gâp dâk ba dâng gâp lah găp hôm hao yơn bu hôm nha hao na nao. Ta chông geh 2 mblâm play. Lah mô geh kât nâp lah rŭng lĕ. Sial du tong lah pă dâl yor 2 play nĕ klâp ma 7 kg rĭ mhâm dĭng mô pă rŭng. Yơn lah kât rse kơt aơ rĭ dơi mât 2 mblâm play nĕ. Ma rong geh 2 mblâm play nĕ rĭ rmeh ma nkhôm bu, lĕ ma ngêt sa hôm rmeh đŏng, nkre lah geh nău kan an bu dŭt rhơn đŏng”.

Tĭng nău mbơh bâh wa Đỗ Văn Thưởng, kruanh hội nông dân xã Hòa Đông, yan wai mhe nơh dŭt kro phang ngăn nău rŭng play dŭt âk ta ăp ntŭk tăm. Yơn đah nău tă gĭt blău kan ta nkuăl tăm sầu riêng dŭt âk ta Đăk Lăk n’hanh nău nsrôih tâm nđur, kơt nti bâh ăp nuĭh ƀon lan, dŭt âk ăp mir tăm ta xã hôm nha geh mât nău geh âk đŏng.

“Tât aƀaơ rĭ rnoh play geh rŭng hôm nha tâm nău nchroh lor bâh nơm, nĕ lah ta tơm hôm nha geh dĭng nĕ. Ăp mir ma mô geh mât chăm na nê̆ rĭ mbra dơi geh rŭng tay âk ngăn, yơn đah ăp nuĭh geh mât chăm ueh rĭ rnoh ta tơm kơt nĕ lah ueh đăp mpăn hôm”.

Đăk Lăk lah n’gor tăm sầu riêng dŭt âk ta lam dak đah rlău 32 rbăn ha. Hôm Krông Păk lah nkuăl tăm sầu riêng dŭt âk ta Đăk Lăk, đah bơi tât 10 rbăn ha. Tơm sầu riêng mô dơn kơl âk ƀon lan ta ntŭk jêng têh ndrŏng, ma hôm nha nsĭt tât an nkual neh aơ geh tay du lễ hội n’gâng kan aơ, lah lễ hội sầu riêng Krông Păk, geh ƀư 2 năm du tơ̆. Đah nău tât râng kan gơih nđơr, nsrôih kan, ƀon lan tăm sầu riêng ta xã Hòa Đông, nkuăl Krông Păk tâm ban kơt lam n’gor Đăk Lăk, dôl rlet rlău jêr jŏt bâh trôk nar mih sial, mpŏng tât nău rhơn ueh ta rơh lễ hội sầu riêng Krông Păk tal 2, ƀư ta bôk khay 9 tay.