Ndăn rnôk rlu dĭng nar, uănh mir tăm byăp ndrel ndâk tơm blên âk play gay ma ueh play tăch ân nŭih bu hăn rvăt tâm đê̆ nar tât, wa Ya Dũng, Kruanh thôn Labouye A, xã Lạc Xuân, nkuăl Đơn Dương, n’gor Lâm Đồng mbơh, ndơn saơ nau kan tuch tăm tĭng trong ơm mô leo nsĭt nau geh, nau geh mô tâm ban ri ma rnăk khân păng ntrơn nau tuch tăm tĭng trong prêh mhe. Đah 4 sào neh tuch tăm byăp play ăp ntil, ăp yan kơl an rnăk nơm geh rlau 100 rkeh. Tĭng Ya Dũng, ntơm bah nau geh tuch tăm aơ kơl an nkoch trêng, bonh đă ndrel nau mbơh bah du hê đảng viên kơt nơm mra geh kônh wa rnơm:

            ‘Săk gâp nsôih kơt tĭng âk lơn, mô knŭng tâm aơ ma hôm tâm âk nkuăl êng. Nơm kơt tĭng bu tăm tơm aơ, ntil ri đŏng. Đah nau dơi lah du hê bu mom yơn geh kônh wa rnơm, uănh lah bu rnơm ngăn, lah ntoh măt Hội đồng ri nơm ân nsôih, ân kơt tĭng nti ăp nau kan mhe gay ma tăm, ntil kơt rnôk aơ nơm dôl ƀư lah tăm tĭng nau kan mhe. Ndri ma kônh wa ndrel nsum ndâk njêng nkuăl nơm hun hao jêng đŏng”.

            Tâm ban ma nê, đảng viên K’Hiệu, tâm thôn 2, xã Đinh Trang Thượng, nkuăl Di Linh n’gor Lâm Đồng jă kônh wa tâm ƀon nsôih ntrơn rgâl tơm tăm mpa rong ntơm bah nau kan ngăn. K’Hiệu mbơh, tâm năm 2014, jêh rnôk râng jrâu kan ntĭm nti mpeh nau tăm cà phê yor ntŭk kan tuch tăm bah nkuăl ƀư, wa hŏ ŭch ntrơn rgâl ntơm bah mir cà phê ranh mô geh âk bah rnăk nơm gay ma rgâl đah ntil tăm mhe. Bah 3 năm ƀhư nau kan, mir cag phê bah rnăk K’Hiệu hŏ ntơm geh nau săk geh văng sa, leo nsĭt nau geh dơi an rnăk nơm. Saơ dơi kơt nê, rnôk aơ kônh wa mơ tĭng nau kan nê. Đảng viên K’Hiệu ân lah, ŭch kônh wa rnơm ndrel kơt tĭng ri săk nơm ân geh leo trong lor, nau ngơi ân geh hăn nsum ma nau kan:

            ‘Đah nau kan lah đảng viên, lah cán bộ bah thôn, gâp nsôih ƀư ueh nau kan bah nơm tâm nkuăl. Gâp bonh đă kônh wa rnơm tâm ntrong kan bah Đảng, nau ntrŭnh pháp luật bah Ngih dak, bonh đă kon sau băl mpôl hăn nti tât dŭt tât lôch ri mơ geh nau gĭt, geh nau blau gay pah kan jan sa hun hao văng sa, kơt lah mât chăm tơm cà phê, blau kơt tĭng tâm nau kan tuch tăm mhe, n’hao nau prêh tâm nau tuch tăm bah ăp ntil tơm tăm, ndrel bonh đă ƀon lan tâm thôn ƀư ueh ăp nau kan tâm rlong pah kan jan sa bah nkuăl rgŏ jă”.

            Hôm tĭng đảng viên K’Lèn, Bí thư Chi bộ ƀon K’Long, xã Hiệp An, nkuăl Đức Trọng, n’gor Lâm Đồng bah năp nơh, nau rêh bah ƀon lan tâm ƀon mâp nau jêr, nau geh ri nsing tâm ba dak bar pe sào du yan, ri ma nau ji ngot, ach o mro mrăng. Rnơm geh Đảng ndrel Ngih dak kơl an ntuh kơl mpeh ăp ding, ntrŭnh âk nau kan ntuh kơl, kơl an rnoh tăch tơm tăm ndrel jao nau kan tuch tăm mhe, ndrel ma nau nkoch trêng bonh đă bah rmôt kan, mặt trận ndrel n’gâng kan ăp gưl, ƀư ueh nau kan “đảng viên hăn lor, ƀon lan tĭng ba kơi’, kônh wa ta aơ mơ geh nau rgâl mhe tâm nau mĭn, ăp nhoat kơt tĭng nti, dŏng nau kan prêh tâm tuch tăm tĭng rnoh geh ndoh ndơ tăch. Wa K’Lèn, ngơi:

            ‘Ê lor nơm ân geh nchrăp nau gĭt ân săk nơm, ân geh dĭt tŏng ăp nau ntrŭnh, ntrong kan bah Đảng ndrel pháp luật bah ngih dak ri mơ nơih nkoch trêng, bonh đă ân ăp nŭih kônh wa. Êp nê, rnôk ƀư moh nau kan ri nơm ân geh leo trong lor, kơt lah nơm bư ngih bil ngih mong tâm nau kan tuch tăm prêh mhe gay ma ƀon lan kơt tĭng. Lah knŭng nkoch ma mbung ri ƀon lan mô dơi kơt năn ôh, nơm ân geh ƀư ndrel oh kon nơm ƀư đŏng, rnôk bu saơ nau săk geh văng sa ngăn ri mơ kônh wa bu kơt tĭng”.

            Đah ăp nau kan ngăn, n’hêl bah ăp đảng viên tâm nau ƀư tĭng nau kan leo trong lor tâm nau ƀư nau kan nkoch trêng, bonh đă ndrel ntĭm leo nŭih ƀon lan ƀư tĭng nau hun hao văng sa ndrel nau rêh, âk nau kan tuch tăm săk tam hŏ nar lơn ma geh pơk hvi tâm lam nkuăl rnoi mpôl đê̆. Ntơm bah nê, rgop nau khlay leo rnoh rnăk ach o bah n’gor Lâm Đồng. Ntơm bah nê, rgop nau khlay tâm nau leo rnăk ach o âk ding bah n’gor huch jur hôm tâm dâng 2% tâm nê rnăk ach o lah rnăk rnoi mpôl đê̆ hôm 5,6%./.