Rnăk vâl wa Y Thêm ta  xã Ea Kpam, nkuăl Cư M’gar, n’gor Đăk Lăk, dôl geh rong 16 mblâm ndrôk. Tĭng nău way ntơm nơh, mpôl ndrôk geh m’ơk lêng hăn joi pih sa êng. Yơn tâm rnôk dăch aơ, yor dâng pih mô hôm geh jêng nuĭh ƀon lan ăp ôi kơt wa Y Thêm mbra hăn leo njŭn ndrôk tât ăp ntŭk dâng pih hvi lơn gay ma m’ơk, tât kêng măng ntru sĭt ta ndrung. Lah rnôk ta dâng mô hôm geh âk pih ta dâng, rnăk vâl wa koh pih geh tăm n’hanh rvăt tay bah dih an ndrôk sa. Wa Y Thêm an gĭt, bâh ntơm ƀư ndrung, ndrôk geh rong ueh tĭng nău ntrŭnh, mât kloh ueh ndrung n’gar, mô geh ƀô djơh.

  “Ndrôk, rpu ndơ̆ tât ta aơ saơ jay kloh ueh mô geh ƀô. Ntơm nơh năch hăn tâm nđăp nsông saơ ăch ndrôk, ăch rpu mô ueh ngăn. Aƀaơ hăn ta aơ lĕ ueh hôm mô geh nău ƀô”.

Wa Phạm Doãn Thắng, cán bộ thú y xã Ea Kpam, nkuăl Cư M’gar, n’gor Đăk Lak an gĭt, ntơm nơh, ta ntŭk dŭt âk nuĭh ƀon lan geh bên rong ndrôk sŭr tĭng trong m’ơk lêng, măng sĭt kât ta jâng jay. Nău aơ ƀư ƀô, mô ueh ntŭk ntô, khuch tât săk soan Yor nĕ, n’gâng kan ta ntŭk, ăp ntŭk kan lĕ mbơh tơih, rgŏ jă gay ma ƀon lan ƀư ueh ndrung n’gar, mât đăp mpăn nău mât rong.

 “Gâl kan ăp ntŭk kan lĕ mbơh tơih n’hanh ăp gâl kan n’gâng kan ta ntŭk lĕ kơl an du đê̆ ntuk ƀư ndrung n’gar. Bar pe năm aơ mpôl druh ndăm kơl an ƀư ndrung n’gar. Aƀaơ mpôl ndrôk m’ơk lêng mô hôm geh âk, aƀaơ lah ôi m’ơk măng leo ta ndrung. Khân păng mât rnă lor ndơ sa ta khay mih”.

Tĭng wa Nguyễn Quang Đức, kruanh Trạm mât rong n’hanh thú y nkuăl Cư M’gar, n’gor Đăk Lak, lam nkuăl aƀaơ geh rlău 14 rbăn mblâm ndrôk. tâm nĕ, kanŭng geh du ntŭk mât rong ndrôk rgum du ntŭk đah rnoh rlău 100 mblâm, hôm e lah mât rong nchrai tâm ăp rnăk vâl. Lôch âk năm nsrôih mbơh tơih rgŏ jă, aƀaơ ƀon lan lĕ geh gĭt trong kan mât rong an khoa học lơn, nsĭt tay nău geh săk rnglăy tâm âk nău.

 “Bâh nău mât rong đah ndrung kơt aƀaơ rĭ nău njrăng nuh srê, nuĭh mât rong lĕ geh mât njrăng ueh hôm. Ta meng n’gâng kan thú y mbra geh mât njrăng tay chuh n’gang dak si an geh ueh lơn n’hanh ngih dak mât uănh lĕ rngôch ndrôk rpu mpeh nău mât rong ueh lơn”

Đắk Lắk aƀaơ geh lĕ dĭng lĕ klâp ma 280 rbăn mblâm ndrôk rpu. Lôch âk năm mbơh tơih, rgŏ jă, ƀon lan lĕ rgâl nău way mât rong, tâm kơt gay ma rgâl bâh m’ơklêng jêng mât krŭng ta ndrung. Yor nĕ, ndrel đah nău kan mât njrăng rnă lor ndơ sa, ntŭk gŭ rêh, njrăng nuh srê rĭ nău ueh mât rong ăp nar lơ ma geh rgâl, nsĭt tay nău khlăy mpeh wăng sa âk lơn an nuĭh mât rong.