Lah du rnăk ach o ta ƀon Cư Kanh, xã Ea Sin, nkuăl Krông Búk, n’gor Đăk Lăk, bôk năm 2023, wa H Yam Mlô, geh kơl an 1 mblâm ndrôk me deh kon gay ma hun hao bah ach o. Bâh bơi tât 2 năm, đah nău mât kơl bâh lĕ ntŭk kan, ngăn lah nău ntĭm nti na nê̆ bâh cán bộ thú y ta nău mât chăm ndrôk me, aƀaơ, rnăk vâl wa H Yam lĕ geh tay 1 mblâm ndrôk kon  bâh ndrôk me mhe deh. Wa H Yam rhơn nkoch.

“ Bâh geh nău kơl an, nău kơl bâh n’gâng kan ta ntŭk, rnăk vâl gâp lĕ geh ndrôk mât rong, nsrôih mât chăm gay ma ndrôk geh deh tay âk kon lôch nĕ rong têh tăch sŏk prăk rvăt phe, ndơ sa, săm ƀŭt săm tra an oh kon hăn nti”.

Uănh năl na nê̆ nău dơi bâh ta ntŭk n’hanh nău knơm ăp nghị quyết bâh Ban chấp hành đảng bộ ăp gâl mpeh n’huch ach o nâp nâl, Đảng bộ xã Ea Sin, nkuăl Krông Buk, n’gor Đăk Lăk lĕ geh rdâk njêng nghị quyết leo kan hun hao wăng sa năm kan 2020-2025. Tâm nĕ, ngluh mbơh nău kan, trong kan, ntrong kan na nê̆, tâm di đah nău ngăn ta ntŭk. Rgâl nău mĭn trong kan ƀư tĭng na nê̆ lơn, săk rnglăy lơn. Ndrel đah nĕ, ntrôl dăng mbơh tơih, rgŏ jă ƀon lan dŏng nău mhe mpeh khoa học kĩ thuật ta nău rgâl mhe tơm tăm, kon rong, ndơ̆ tơm, kon ntil mhe an nău geh, nău ueh âk lăp tâm nău pah kan. wa Vũ Văn Tuấn, Bí thư Đảng ủy xã an gĭt.

 “Xã Ea Sin lĕ ƀư na nê̆ nău nchrăp kan gay ma mbơh tơih ƀư tĭng tâm ăp năm. Bâh trong kan ƀư sŏk nuĭh ƀon lan ƀư tơm, n’hao nău tât râng bâh lĕ trong kan chính trị. Bâh ăp năm rĭ nău geh n’huch ach o lĕ dơi geh ăp nău dơi ntoh lư. Ngăn lah nău gĭt vât bâh nuĭh ƀon lan tâm nău pah kan n’huch ach o lĕ geh n’hao na nê̆, nuĭh ƀon lan lĕ geh gĭt dŏng ăp nău kan, trong kan na nê̆, kơt nti ndrel gay ma ƀư hun hao bah ach o. Lĕ geh âk rnăk vâl hun hao sâm geh”.

Ta meng nĕ, đah ăp rnoh kơl an bâh ăp bôk nău kan n’huch ach o, dak kloh mât kloh ueh ntŭk gŭ rêh, kơl manh prăk tín dụng bâh ăp ngân hàng lĕ nta nău dơh nơih an nuĭh ƀon lan ntuh kơl hun hao wăng sa. Tât aƀaơ, rnoh rnăk ach o bâh xã Ea Sin lĕ huch bâh rlău 57% năm 2021 jur hôm 39,8% năm 2023, nău geh du hê nuĭh lĕ lĕ ntơm hao âk tâm ăp năm đŏng.

Bâh săk rnglăy nău kan “N’huch ach o nâp nâl” ta xã Ea Sin, BCH Đảng bộ nkuăl Krông Buk, n’gor Đăk Lak lĕ mbơh tơih, pơk hvi nău kan ta ăp ntŭk tâm nkuăl. Gay ma dăch bên đah ta ntŭk, BCH Đảng bộ nkuăl hôm nha pă ăp đồng chí tâm cấp ủy ăp khay sĭt râng tâm mâp rƀŭn rgum ndrel đah chi bộ thôn, ƀon gay ma gĭt nău mĭn, nău ŭch rŏng bâh cán bộ, đảng viên n’hanh ƀon lan, ngăch doh rklaih ăp nău jêr, kŏ văk ta trong hun hao wăng sa ta ntŭk kan ba dâng. Wa Nguyễn Hải Đông, Bí thư nkuăl Krông Buk, n’gor Đăk Lăk an gĭt.

 “Nkuăl lĕ ntĭm đă ăp cán bộ mât kan tĭng uănh ta ntŭk tâm ban kơt cán bộ 7 xã way geh râng nău rƀŭn rgum chi bộ ta ntŭk. Ƀa ƀơ uănh nđôi n’hanh uănh năl nău geh ƀư tĭng  ăp nău mpođng nkô̆ nău kan gay ma ƀư tĭng bôk nău kan nghị quyết jut n’huch ach o gay ma ăp nar lơ ma ueh lơn”.

Nkuăl Krông Buk, n’gor Đăk Lăk aƀaơ geh rlău 30 ntŭk kan đảng đah rlău 180 chi bộ bâh ăp đảng bộ mât uănh. Bâh geh n’hao ueh nău leo kan, ntĭm đă, ntrŏng kan tâm nău hun hao wăng sa rêh jêng ta ntŭk, jêng 16 rmôt nău mpŏng mpeh hun hao wăng sa, rêh jêng bâh nkuăl năm 2023 lĕ n’hanh rlău nău nchrăp. Tâm rnôk nĕ rnoh rnăk ach o huch 1% geh 100% nău nchrăp kan, rnoh rnăk ach o xã dŭt jêr jŏt huch 6,97% geh 116% nău nchrăp. Nkuăl lĕ geh rdâk njêng geh 74 nău kan dŏng khoa học công nghệ, máy mok, ntil tơm tăm, ntil kon rong mhe nsĭt tay nău wăng sa âk. Nău rêh bâh ƀon lan ăp nar lơ ma đăp mpăn. Bâh nĕ, ntop ƀư dơi Nghị quyết Đại hội Đảng bộ nkuăl Krông Buk, năm kan 2020-2025 ngluh mbơh, rdâk njêng ta ntŭk ăp nar lơ ma hun hao.