27/9, ta Ntŭk rƀŭn nchră n’gor Hậu Giang, Lien minh hợp tác xã n’gor Hậu Giang n’hanh Liên minh hợp tác xã n’gor Dak lak ƀư rƀŭn nchră boăt nthoi tâm rgâl, tâm rgop nkra njêng-tăch ndơ bah hợp tác xã ta 2 n’gor. Jêh rnôk tâm nchră, kruanh Liên minh hợp tác xã 2 n’gor Hậu Giang n’hanh Dak Lak tâm ban ŭch nkô̆ nău ký ton kan ndrel lah ntrôl mbơh rblang, nkoch mbơh mpeh nu nău wăng sa nsum, hợp tác xã đah 2 n’gor, kơt nu nău ƀư nkra njêng, tăch rgâl hợp tác xã, mbơh ntŭk tăch, ntrong ƀư uĕh, trong ƀư mhe, hun hao ndơ OCOP, ƀon nău kan way ơm, mpla nsơ, nkoch mbơh ndơ n’hanh ăp ntil nău êng tâm đah trong hun hao, dơi tâm di bah ăp ding.

Lơn lah, Liên minh hợp tác xã 2 n’gor mbra bôk trong tâm rgop tăch ndoh ndơ rnôk ăp hợp tác xã ŭch râng tâm rgop, mpla nsơ nkoch mbơh ndơ, ký njuăl, tâm rgâl ndoh ndơ 2 ding đah ăp hợp tác xã mpeh tâm pă ta ntŭk. Bah meng nĕ, nta an kơl hợp tác xã 2 n’gor dơi nti nău blău ơm, tâm rgâl nău mhe, tâm nđŭr, mpla nsơ, boăt nthoi tăch ndơ; nkre mbơh mpeh mpla nsơ nkoch mbơh ndoh ndơ ta ăp rơh rgum mpa tăch ndơ, ntrŭt tăch rgâl, rƀŭn nchră, tât ăp hợp tác xã geh nău ŭch râng.