Nênhs lâul Điện Biên sir jos đros cxaz chuôz phax tir thêir moz Covid-19

Đros thiêz tsôngv pêx xênhv nhoz uô nênhx iz ndis ciêz Mường THanh, TP Điện Biên Phủ, tỉnh Điện Biên, pos Phạm Ngọc Tuyết, Chủ tịch Hôiv Chữ thập đỏ, uô Phưv Ban por hưv tsôngv pêx xênhv sơưr đơưk ntơưv qơư no tưz lok six sưv. Shông no pos 61 shông, niêx hnuz gra luz loa nta suôz ntơưv têk đros trâu chor ntâuz bos kror ndâux, txix tas cik sơưr nzor tax txos zar tsâuk ntux, thâuv tưs krêz uô ciêz mak pos Tuyết muk li ntơư gra loa yax kriê, heik têx chuôz zis zuôr muôs huv thiêz tsôngv pêx xênhv uô jông trơưk cui tinhv lok phax tir thêir moz Covid-19 ntơưv têx qơư muôx chôngz nênhs.

Pos Phạm Ngọc Tuyết heik: Ciês luôs hâux lưv uô por hưv qơư nhoz li no pos tưz uô tâu xar muôx 17 shông. No puôr lênhx zos têx hâux lưv uô đơưz, tsi muôx iz đeiv nhiêx paz hlo, taz sik niêx hnuz pos thâuv tưs cux sir jos lês uô jông têx hâux lưv heik sâuv viv côngv thôngx, viv cxuô lênhx sơưr đơưk. Kror zov chênhr zos zuk pov jông siêz, shir phaz viv paz tâu cxuô lênhx cxuô tus cux iz zav li paz iz phênhv tưs côngz đas jos trâu hâux lưv tir thêir moz gênhk. Six hơưv no, iz chas heik tsôngv pêx xênhv iz tus nhoz kuôk cêv đêz iz tus ntơưv têx qơư chôngz nênhs, pos Tuyết cux tsênhv đros paz lês uô têx hâux lưv cxax yuôx vắc xin phax phôngz moz ntơưv chor qơư cxax yuôx hâur thax tsav phường thiêz:“Thâuv tsênhv tâu tsôngv niêv txir lax pêx xênhv sơưr đơưk njênhs, nhiêv txos, choz hâux lưv mak uô tâu đaz tsi cur cux zuôr sir jos đros uô. Cur uô hâux lưv viv zuk luz siêz, viv tsôngv niêv txir cưr tix nênhx tsa sơưr đơưk, thâuv cur uô têx hâux lưv no cur pov shir phaz thiêz jông siêz, txơưv tưz muôx kênh lênhx, têx tus lơưr tiêk cur truôv, chas tâu so tsi nhoz so tsênhv zuôr muk lês uô têx hâux lưv li ntơư, tưz tsi tâu iz cxênhz nhiêx zuôr uô đaz tsi. Taz sik cur ho xar txơưr, zuk tsênhv uô tâu đaz tsi paz pêx xênhv car tsix uô xưz, ntơư zos hâur zuk siêz xar, hâux lưv uô paz sơưr đơưk”.

          Muôx tus nhaz zos cưk yuôx txưv zênhv muk lês uô hâux lưv phax tir thêir moz gênhk, seiz njuôk shuôs đas jos, chơưv kho moz trâu chor nênhs trâul moz Covid-19 ntơưv tsêr yuôx chơưv kho têx lênhx nênhs trâul moz Covid-19 sôr 11, Thủ Đức (TP HCM), chiê tus nhaz tso siêz muk uô hâux lưv, pos Mai Thị Sáng, nhoz jok 13, phường Mường Thanh, TP Điện Biên Phủ tưz lênhk nhav tsoz phưz, tu hur si tus nhaz 3 lênhx nhuôv.

Pos Sáng heik pâuz: Hnuz pâuz tiêk, tus nhaz zuôr muk uô hâux lưv đêz, paz chor qơư muôx chôngz nênhs trâul moz Covid-19 ntơư phax tir thêir moz, pos lok six cxơưx. Taz sik xav tinhv “Tir thêir moz gênhk xưk iz zav gâuk li tir ntâuk trol châuz”, tas nro têz qơưk tsuv sik thôngx siêz, siz paz, sik đros faz Nam tir thêir moz gênhk, viv li pos tưz heik tus nhaz tiêk, muk đêz tsuv tsưx phưv jông đas jos, tso siêz muk uô hâux lưv, nhoz tsêr tưz muôx cur uô lâul cxơưx. Txơưv lâul, tsi muôx đas jos taz sik niêx hnuz pos Sáng cux xa thiêz tok chor nhuôv muk cơưv ntơưr, tu, txoz cxơưx trâu têx nhuôv cxix cxuô chiê tus nhaz tso siêz muk uô hâux lưv tir thêir moz gênhk:“Cur cux heik tus nhaz tiêk, cox car tsix tso siêz lus muk uô hâux lưv phax tir thêir moz Covid-19, hâur tsêr tưz muôx pos zơưs txoz cxơưx, tu têx mê nhuôv, tso siêz  muk uô têx hâux lưv zok muôz, tsi cxoz xar ntâu, cxơưx ntâu txos chor nhuôv hâur tsêr. Tưz muk uô hâux lưv tir thêir moz li ntơư lênhx tưs cux nyei, taz sik tso siêz, hnar têx tsôngk yo por hưv zuk tus khênhx cov jông chiê uô hâux lưv seiz njuôk shuôs, chơưv kho moz trâu tsôngv pêx xênhv nhoz thax tsav muôx moz”.

Sir jos lês uô jông têx hâux lưv muôx liv thiêz tsênhv tsênhz, chor nênhs lâul nhoz Điện Biên cux tsênhv niêx hnuz hmo sir jos uô tsov iêr chi cax, uô ntêx nyuôs hâur cxuô luôs hâux lưv, sik đros tas nro têz qơưk tir thêir têx caz moz riêz nênhs./.

(Vũ Lợi-Riê Lâux cxeik, nhênhv)