Phênhv thưr 5, hnuz 24/3/2016:

Huôv tsar kinh tế txix uô ntâu zav nuv

Xênhz thiêz hloz lox hâur iz ziv chuôz zis uô liêx têz, txix ciês thâuv tsênhv zâu, Vì Văn Thảo tưz uô sưv têx liêx têz. Taz sik kror uô trâu tix lâus xar tsik txơưx tas, zos tiv li chas? tas nro têx lênhx nênhs hâur chuôz zis sir jos khưr bâuv tưs lok luz nênhx cux txov nhêv li ntơư, muôx kênh ntu tsênhv trâus njiz cêr yeiz thiêz. Xar zos tsi hlôngr tsưr ziv uô nox, luz nênhx zuôr tsar ndê tsi tâuk. Shông 2002, tâu têz qơưs paz zuz nôngz kôngz, Thảo heik chuôz zis muôz xar 5 cxênhz xưv phaz ar têz chos poz cưk, chos kok ntông tsi jông, hlôngr chos 100 txir quýt. Đhâu 4-5 shông, têx ntông quýt tưz txi txir tâu sâu đê fâuv xuz thơưx, taz sik tiv tsi tâu muôx tsưr ziv tu têx ntông txi txir ntơư, sâu đê tsi tâu nju. Tâu canr bôv cxiz kôngz kriê tsưr  ziv đros trâu têx sir jos cơưv shâuv txix têx lênhx nênhs txơưx chos thiêz tu têx ntông txi txir ntơư, 2, 3 shông đhâu lok no, xav kror đruôz đraz, tix lâus chor txir ntông quýt tưz sâu đê tâu muôx 2-3 tênhr txir iz shông, grê muôs zos 15 cxênhz đeiv iz cir, iz shông tix lâus chuôz zis cux sâu tâu txix 35-40 tsov đeiv. Trơưk li Vì Văn Thảo: Ntơư zos tsưr  ziv, pênhr jos chiê tix lâus truôx siêz bo yưv pênhr krêz uô đar liêx têz chos nzir 100 tsoz txir quýt hâur ntu zuôr txos: “Thâuv ntêx chuôz zis têx liêx têz zos chos poz cưk, kok ntông viv li nhiêx tưz sâu tsi tâu pêk tsơưs, chuôz zis li muôz hlôngr chos têx txir quýt. Chos zav txir ntông no, tu thiêz nthuô đoz têx đrox cux zôngx ziv, tsi tas ntâu six hơưv, hnuz nhôngs uô. Xuz thơưx chuôz zis chos 100 tsoz, 5 shông tov kaz cux txi txir, tâu sâu đê”.

Seiz têx liêx têz cux tsênhv yuôr, uô tsi tas, Vì Văn Thảo tưz xar tsưr ziv tu zus keiz thiêz khơưz pak đêx zus njêl, xav kror đruôz đraz iz fâuv keiz, tix lâus Thảo tu zus 2, 3 puôk tuk. Iz chas co, Thảo chuôz zis tsênhv chos iz ha ntâu têz kok ntông, uô 3 cxênhz xưv phaz liêx 2 chiv kôngz hâur iz shông. Cê uô cê cơưv shâuv tsưr ziv huôv tsar cêr uô nox yiêz, xav hur si Thảo chuôz zis têx nhiêx txiêx sâu tâu đhâu yưx côngk đas jos uô, cux sâu tâu muôx nhos 150 tsov đeiv iz shông. Chiê huôv tsar kinh tế txix têx nuv uô heik sâuv, lênhx hluôk Vì Văn Thảo heik kriê tsưr ziv uô li no: “Chiê uô tâu trơưk tês, trơưk siêz xar tsuv muôx tsưr ziv uô, thiêz gruôs zok nriêr, cơưv shâuv têx lênhx txơưx huôv tsar uô nox têx tsưr ziv uô li uô tâu. Luz cheix ntux kruôr, têx ntông quýt khênhr njưk, kruôr tuôs tas, tsi txi txir viv li tsuv zuôr meir lok tsuôs, lok zưs đêx trâu”.

Seiz pov Vì Văn Thảo tsưr ziv huôv tsar uô nox tâu truôx, ntâu ziv chuôz zis tsôngv box thiêz têx hluôk nênhs hâur jok cux cơưv shâuv, uô trơưk Vì Văn Thảo têx tsưr ziv kriê. Xưk li tix lâus Vì Văn Dẫn chuôz zis, cux muôz têx têz hlôngr chos txir ntông  quýt thiêz huôv tsar uô têx nuv txơưr đuô, niêx shông muôx phênhv sâu tâu yênhx puô tsov đeiv. Iz chas tix lâus Dẫn chuôz zis, jok Lọng Tòng nhiv no tưz muôx 10 ntâu chuôz zis hluôk nênhs tsênhv taz tov hlôngr yiêz tsoz chos, tsiêx tu zus trơưk li lênhx hluôk Vì Văn Thảo tsưr ziv uô nox. Tix lâus Vì Văn Dân, Bí thư chi đoanx jok Lọng Tòng heik pâuz: “Vì Văn Thảo tsưr ziv huôv tsar uô nox, xuz thơưx tưz uô tâu trơưk tês, trơưk tsưr ziv. Chi đoanx tsi so yax kriê, vênhv tôngv têx lênhx hluôk nênhs hâur chi đoanx cơưv shâuv, uô trơưk Thảo têx tsưr ziv huôv tsar uô nox chiê sik đros uô, siz chos huôv tsar kinh tế”.

Car xar car uô, Vì Văn Thảo thiêz têx lênhx hluôk nênhs hâur jok Lọng Tòng tsênhv sir jos sik tưr huôv tsar uô nox, cxuz cêr yeiz pluôs, cxiv tsa jêx jok ziv hnuz ziv hlôngr yiêz thiêz muôx luz nênhx tsâu sor./.

( Cà Thành-Riê Lâux cxik, nhênhv)