Njiz nênhs sâu tâu nhiêx tiv đêiv hêir nênhs Khmer Lý Quờn

Hâur chor hnuz kaz shông 2018, pêz muôx jiês muk sêiz yuô chuôz zis pêx xênhv Khmer uô xênhz yar kinh doanh hênhr Lý Quờn, xar thanhk Quới, huyện Mỹ Xuyên, tỉnh Sóc Trăng. Phêiz kênh zos lok oz niêv txir li têx sir jos chiê muôx tâu luz nênhx li nhiv no, zơưv puz pâuz: shông 1991, phêiz chuôz zơưv tâu niêv txir thiêz niêv têik zơưv txir phêiz iz kror liêx thiêz ar têz chiê uô nox. Đros zênhx zos nênhs gruôs, sir jos, txơưx xar tơưv hâur uô xênhz yar, zơưv cê chos blêx liêx, cê uô têz chiê cxênhz txuôs tsês jux juk. Thâuv six hơưv nhoz khôngz chêix ntux kruôr, zơưv tsênhv muôz hnhaz blêx lok chos ndêz paz muôx zir phênhv sâu. Phênhv sâu tâu yênhx shông, zơưv muôz zuôr qir zuôv, yuôx trâu chiv uô kôngz tov kaz, tsênhv yuôr mak cxênhx txuôs chiê zuôr nzir ar kriz đar uô xênhz yar. Thâuv tưz muôx tâu chor pênhr ntâu, zơưv yưv pênhr zuôr nzir mêir lêix têz, mêir luôv blêx, cxiv uô qơư kra blêx uô qơư phưx vưv trâu pox nhuôs tiv phaz. Zơưv Lý Quờn puz pâuz: “Sir jos uô thiêz cxênhx txuôs tâu li co, uô liêx têz, chos ndê mak cxênhx txuôs jux juk thiêz zuôr qir zuôv, yuôx. Thâuv co mak liêx tsênhv fênhx zis, zuk zuôr iz kro jux muk, ntâu shông chêk zuôr tâu bâuv li no. Cur oz niêv txir mak khưr uô nox tsik pâuz hnuz hmo hlo, zuôr tâu mêir lêix têz, cur muk lêix ntiêr trâu pox nhuôs, tsâuk ntux cux lêix hur si, thâuv co mak liêx tsênhv tsơưs viv li muk lêix ntiêr trâu luôs”.

Đhâu ntâu shông cxênhx tsês, nhiv no, zơưv tưz zos tsưr sêiz car muôx 30 ntâu ha ar uô kôngz nuv. Zơưv Lý Quờn hêik, zos muôx ntâu ar, taz sik uô xênhz yar lơưr cxôngx nzor mak sâu tâu liv cux tsik ntâu, muôx ntâu phiv liv. Viv li, thâuv tưs nhoz khôngz, zơưv sir jos nriêr pâuz, nhênhz chơưv, cơưv shâuv têx tsưr ziv chos blêx liêx. Thôngz đhâu pov chir, Đaix thiêz chor lớp kruôz kriê ciês lok tsaz yênhx, kỹ thuật uô xênhz yar….Zơưv Quờn puz pâuz, zos tiêk li thâuv ntêx iz kror liêx tsuv chos tas muôx 30 cir nôngz blêx mak nhiv no tưuz grêk tsơưs tsuôk chos tas muôx 10-15 cir nôngz blêx chiê uô zuz. Đros co, hâux lưv zuôv qir huv six hơưv, huv chêix, tir tâur tâu caz hmoz tưz paz trâu uô xênhz yar muôx chêx cur đuô. Đuô li, zơưv tsênhv muôz chor nôngz blêx kaz, tsơưr lươngv siêz lok tsêz chos viv li tsơưr lươngv thiêz tsiv gri kinh têr siêz đuô. “Zuk sêiz pov chir, đaix pov têx kỹ sư lơưr kriê tsưr ziv nriêr pâuz caz hmoz ruôr hiêv blêx, zuôv qir li chak, zuôv zav qir tưs chêk zuk cơưv thiêz uô trơưk, taz sik cux pâuz tsik tâu tsênhz tas thiêz. Txos thâuv tâu cơưv shâuv ciês hâur têx lớp kruôz kriê uô têx co mak blêx cux piz muôx tâu chêx cur siêz jux muk”.

Chiv ntux tsâus yiêz nzor no, zơưv Quờn uô xênhz yar muôx 10 ha nôngz blêx RVT, 10 ha nôngz blêx Hàm Châu, tsênhv yuôr zos nôngz blêx Nhật. Nhiv no thax tsav blêx tsênhv huôv tsar jông, njuôk xav iz hli thiêz zuôr jông sâu. Zơưv Quờn njuôk xav, đros gri muôs blêx li nhiv no đros zav nôngz blêx RVT tâu nênhs uô lax luôv sâu zuôr xar muôx 7.000 đêiv iz cir, Hàm Châu zos 6.000 đêiv iz cir thiêz nôngz blêx Nhật zos 5.800 đêiv iz cir, zos yưv tas nhiêx txiêx trâu uô xênhz yar, zơưv zuôr sâu tâu nhiêx liv muôx nhos 600 triệu đêiv txix chos blêx nhoz thax tsav muôx 30 ha no. zơưv Đào Phương Chí Cường, phưv chủ tịch UBND xar Thanh Quới hêik: zơưv Lý Quờn tưz tsik zos uô bluô nux trâu zuk chuôz zis, mak tsênhv phêiz kênh têx chênhz zênhv, kỹ thuật uô xênhz yar trâu sơưr đơưk hâur thax tsav iz ndis pâuz. Tiv zix, zơưv đros 17 lênhx nênhs yênhx lix Tổ Hợp tác uô xênhz yar blêx Đồng Tiến, zos zơưv uô tổ trưởng. Tổ li tsưr ziv zos sik đros phiêz kênh chênhz zênhv, đros sir jos uô xênhz yar jông, tsêx trung, muôx chêx cur, paz muôx tâu kror liv truôx đrênhk. Txix co, paz trâu sơưr đơưk txơưx tsêz chos blêx liêx đuô, ntâu ziv chuôz zis sir jos uô bluô nux thiêz zos chor nênhs txơưx uô xênhz yar hênhr ntơưv tiv phaz.

Têx sir jos hâur uô lox tôngv, sir zôngv têx kho học kỹ thuật hâur uô xênhz yar tưz paz trâu zơưv Lý Quờn muôx tâu iz kror qơư uô nox lox đar jông, oz luz mêir cê paz uô ar, cê uô dịch vụ phưx vưv trâu pox nhuôs nhiz iz ndis co. Đuô li, đros muôx 30ha ntâu ar chos blêx, iz shông chos oz chiv, paz trâu zơưv Lý Quờn chuôz zis muôx tâu phênhv 1 tiv đêiv ntâu. Zơưv Lý Quờn zos lênhx nênhs gruôs sir jos khưr uô nox txix zuk đas jos trâu sơưr đơưk cơưv shâuv đros ntâu shông sik lơưr liês zos nênhs txơưx uô xênhz yar hênhr nhoz tiv phaz./.

                                                  (Thạch Hồng-Lik Thox cxêik nhênhv)