Chor bôv đôiv lâul nhoz tox siêz sir jos huôv tsar uô kinh têr

               Txix 20 shông đrav ntêx, khov trâu chuôz zis thiêz pox nhuôs ntơưv thax tsav qơư têx ar têz tox trôngz jôngr, zơưv Hà Ngọc Hợp nhoz jok Lương Thịnh, xar Tân Thịnh, thành phố Yên Bái tưz tu zus mur hâur har jôngr chiê zuôr jiz. Têx shông jê lok no, pov tâu chor nênhs zuôr ziv hnuz ziv muôx chôngz, zơưv Hợp tưz kriz đar tu zus nzir lơưr yênhx shông. Txos nhiv no, zơưv chuôz zis tưz muôx 100 ntâu xuz mur, thâuv zus ntâu tiv zix ndê txos 150 xuz, paz sâu tâu muôx yênhx puô triệu đêiv iz shông.

             Zơưv Hợp phêiz kênh, tu zus mur tsik tas ntâu pênhr nhiêx, iz thungz mur zus mak tas muôx 1 triệu đêiv, taz sik nênhs tu zus tsuv uô jông tu, sêiz shuôk thiêz pâuz tsênhz lok chor mur chiê muôx tâu tsưr ziv tu zus huv đros lơưr yênhx ntu, yênhx chêix. Đuô thiêz, nênhs tu zus mur cux tsuv pâuz txos têx chêix tơưs pax, chêix muk muk zok jiz, qơư muôx ntâu pax… chiê txar chor thungz mur co muk trâu ntơưv têx qơưk muôx ntâu pax trâu chor mur nzêik. Đros co, cux tsuv pâuz phêiz chor mur cov chor mur tsik za khiêr hâur thungz muk: “Tu zus tsơưs xar muôx 20 shông taz sik hêik txos tu zus chiê uô tâu kinh têr jông mak kuôk no muôx 7 shông cur chuôz zis thiêx tu zus ntâu. Zus mur mak zuk tsuv sêiz shuôk jông, tu xưk li jor têx mê nhuôv mok, tsuv qênhz shuôk tsik so mak thiêx tu zus tâu”.

              Tror lok txix qơư ntâuk tros châuz Tây Nguyên shông 1976, saz pênhz Nguyễn Minh Đông nhoz jok Hạnh Phúc, xar Y Can, huyện Trấn Yên, tỉnh yên Bái cux sir jos huôv tsar uô kinh têr ziv chuôz zis. Thâuv co, cê uô đôiv trưởng đôiv uô nox hâur hợp tác xã, cê chơưv kho têx kror trâus moz txix thâuv ntu ntâuk tros châuz, zơưv Đông đros pox niêv sir jos khưr uô nox chiê txoz cxơưx trâu luz nênhx thiêz tu têx mê nhuôv.

              Zơưv Đông puz pâuz, xar muôx 10 shông tror đrav ntêx, thâuv thax tsav qơư hêik sơưr đơưk hlôngr yiêz đuô tsoz chos tsiêx tu zus, zơưv chuôz zis tưz cuêz tênhv hlôngr 2 héc ta ar têz tox trôngz chos kok ntông chiê chos cuêv fix. Txos nhiv no, iz shông zơưv chuôz zis sâu tâu xar muôx 100 triệu đêiv. Zơưv Đông tsik so xar tiêk, zos lênhx tuz lênhv lâul Hôx, cêr txov tưs cux tưz muk đhâu lơưv, nhiv no tâu uô nênhx hâur ntu têz qơưk tiêx tuk, tsuv sir jos chiê hla đhâu yêiz pluôs, tsik zos nênhs uô phiv liv trâu chuôz zis thiêz xar hôiv: “Cur nhiêv tiv zix zos hloz Hôx lo luk hêik tiêk: “Zos saz pênhz trâus saz taz sik tsik zos nhoz khôngz”, zos iz lênhx tuz lênhv lok mak kror tưs cux tsuv uô tâu tiêr, car xar, car uô; tsik nyêi txov nhêv, hêik pox niêv mê nhuôv sir jos khưr uô nox”.

               Nhiv no Hôiv Bôv đôiv Lâul tỉnh Yên Bái muôx 36.500 cxênhz ntâu lênhx hôiv viên, cxaz chuôz xênhz huôx ntơưv 1.400 ntâu chi hôiv. Tas nro tỉnh muôx 24 doanh nghiệp zâu thiêz tov thơưx , 15 hợp tác xã, 250 ntâu tôv sik côngv, 1.000 ntâu qơư tu zus, uô nox thiêz zuôr xar 1.000 qơư kinh doanh dịch vụ, qơư uô nox zos hôiv viên Hôiv Bôv đôiv lâul uô tsưr.

                 Tưz tsik zos sir jos khưr uô nox, kinh doanh, chor bôv đôiv lâul tsênhv tsik so uô ntêx hlo hâur gôngr côngv nhiêx txiêx, muôz ar cxiv tsa chor côngz trinhx siêz jông, zos chor nênhs uô ntêx hlo muôx siêz nhiêv thiêz hluz lênhx nênhs… Zơưv Nguyễn Trung Thái, Chủ tịch Hôiv bôv đôiv lâul tỉnh Yên Bái puz pâuz: “Txix tsênhv tsênhz ntơưv thax tsav qơư pêz tưz cxiv tsa tâu lok six ntâu tsưr ziv uô kinh têr; yênhx shông sik côngv đros hôiv doanh nhân pêz tưz kho đuô ntâu luz tsêr đaz tuôs lav nhoz trâu chor hôiv viên pluôs, txov nhêv; cxaz chuôz chor phongz yaox paz trâu chor nênhs tâu sơưv tsênhv chêi paz, cux sir jos đros cxiv tsa paz uô hlôngr yiêz têx jêx jok yiêz”.

               Sir jos uô tâu ntâu kror lok huôv tsar uô kinh têr, chor bôv đôiv lâul Yên Bái tưz thiêz tsênhv sir jos paz tsik tsơưs trâu côngz xưv txo grêk yêiz pluôs, cxiv tsa jêx jok yiêz thiêz đô thị vav mênhx ntơưv thax tsav qơư nhoz; paz trâu Yên Bái huôv tsar sêi, truôx đrênhk lơưr tsưr ziv “Njuôz, hur, jông, muôx ntâu vênhx huôv thiêz shir phaz”./.

Đinh Tuấn-Lik Thox cxêik nhênhv