Cưk yuôx Trần Quang Mạnh sir tas đas jos tsưr ziv chơưv kho moz trâu pêx xênhv tox siêz Yên Bái

          Bác sĩ chuyên khoa 2 Trần Quang Mạnh li iz hnuz uô hâux lưv khênhr zos qir muk yênhx qar qơư chơưv kho moz chiê nus thiêz seiz njuôs moz trâu yênhx lênhx nênhs moz. Têx lênhx nênhs moz zos tsôngv box mênhx cxưx tsơưs nênhs, tsi pâuz heik luk choz tsiz, tix lâuk thav luk mênhx cxưx. Đhâu co, pox nhuôs cê muôx cêr shir phaz, cê zôngx ziv heik cxix cxuô zuk têx moz trâu cưk yuôx pâuz. Shông 2007, thâuv cơưv tiêr Tsêr cơưv Đại học y Thái Nguyên, cưk yuôx Trần Quang Mạnh tror lok uô côngz xưv ntơưv Tsêr kho moz đa khoa Nghĩa Lộ nhoz faz Tây tỉnh Yên Bái, zos tix lâuk qơư nhoz uô nênhx hloz lox thiêz cux zos thax tsav muôx chôngz tsôngv box mênhx cxưx tsơưs nênhs li Thái, Hmôngz, Cho, Khơ Mú...nhoz uô nênhx. Ciês têx hnuz thâuv nhiv kruôr uô côngz xưv, tix lâuk tưz xav tênhv tsuv sir jos chiê phưx vưv tsôngv box. Cưk yuôx Trần Quang Mạnh heik:“Xav lok vax tsêr, chuôz zênhx cxuô zav cux tsi tâu tuôv zênhv  trơưk li zuk xar, taz sik zuk nhiêv uô hâux lưv nhoz no, viv pox nhuôs lok six txov nhêv. Cur pov shir phaz tiv zix thâuv chơưv kho tâu trâu têx lênhx nênhs trâus moz hnhar. Iz jiês li ntơưv ho tâu tsôngv box sâu ntơưr lok sik uô tsâus đhâu mạng xã hội, lok six jông siêz”.

          Xar cxuô faz tsưr ziv chơưv kho moz trâu lênhx nênhs moz, tiv zix zos nênhs moz pluôs thâuv muôx moz gênhs tsuv muk tsêr kho moz chiê kho moz, cêr muk lok phiv liv, cê pôngz ntâu nhiêx txiêx, cưk yuôx Trần Quang Mạnh tưz uô ntêx nyuôk cơưv shâuv têx tsưr ziv yiêz chơưv kho moz li: fuô moz hlôngr poz kêx cxa, fuô moz lok chax kâuv, kho moz trâuv, plaz hnhur... Ntâu nênhs moz thâuv tâu tix lâuk tsoz phưz, kho jông moztưz seiz tix lâuk jông li iz lênhx nênhs cxênhz jê hâur chuôz zis. Niêv lâuk Đinh Thị Nga, tsênhv tsoz phưz tul txir nhiv kruôr fuô moz ntơưv tsêr kho moz puz pâuz:“Cur tul txir nhoz tsêr lok six moz, tuôx no tâu têx cưk yuôx sir jos tsoz phưz. Cưk yuôx Mạnh tsar khoa tas cik tưs cux tuôx seiz nus, tôngv vênhx chuôz zis tso siêz. Cur tul txir tưz tâu fuô moz 2 hnuz no, đas jos cux tưz jông đuô lok six ntâu”.

          Nhiv no zos Phưv giám đốc cux zos Tsar khoa Ngoại tsêr kho moz, cưk yuôx Trần Quang Mạnh thâuv tưs cux heik zuk li cán bộ, nhân viên tsuv pheiz kênh, pâuz tsênhz lênhx nênhs moz li luz nênhx, li ntơưv thiêx li uô jông lênhx cưk yuôx hâux lưv mak xã hôiv choz zok. Tix lâuk thâuv tưs cux tuôr tês kriê ciês cxuô luôs hâux lưv, yênhx tưv trâu têx y bác sĩ hluôk, tiv zix zos têx tsưr ziv yiêz chơưv kho moz.Zơưv Phan Thanh Tôn, Giám đốc Tsêr kho moz đa khoa thax tsav Nghĩa Lộ puz pâuz, cưk yuôx Trần Quang Mạnh txơưv uô hâux lưv tưs cux uô tiêr jông jênhv vưv, tiv zix zos hâux lưv cxiv tsa thiêz huôv tsar têx kỹ thuật yiêz nhoz chuyên nganhx ngoại khoa. Txix co, gôngr phênhv đros cán bộ, nhân viên hâur taz viv tsoz phưz jông trâu 150 cxênhz ntâu nênhs moz tuôx seiz njuôs thiêz kho moz iz shông, hâur co muôx 20 cxênhz ntâu jiês nênhs moz tuôx nhoz ciês ntơưv tsêr yuôx chiê kho moz:“Cưk yuôx Mạnh zos lênhx cưk yuôx iz siêz viv nênhs moz, txơưv nênhs moz nhâuv li chas thâuv njiz cưk yuôx Mạnh cux puôr lênhx shir phaz tuôx. Hâur khoa cưk yuôx Mạnh têx shôngk đhâu tưz krêz uô tâu lok six ntâu kỹ thuật yiêz lok fuô moz hâur siêz, plaz hnhur, siêz, trâuv, fuô tâu moz trâu mê nhuôk tsi tâu muôx 1 shông hnuz nhôngs cux uô tâu jông. Nhiv no tsêr kho moz đa khoa thax tsav Nghĩa Lộ tưz krêz uô 73% têx kỹ thuật. Đros iz tsêr kho moz tox siêz li no mak cux tưz lok six sir jos”.

          Đros têx sir jos viv nênhs moz, cưk yuôx Trần Quang Mạnh tưz jênhv tâu ntâu ntơưr kruôk txix têx cấp, nganhx, đros tix lâuk Mạnh, phênhv huv lox tiv zix chênhr zos tâu tsôngv box têx mênhx cxưx sâuv thax tsav thiêz fôngx zưs njênhs njôngr, nziv hluz. No zos đas jos paz tix lâuk tror gôngr côngv, chox têx jix vuv y tế muôx tsơưr lươngv siêz lok kho moz trâu tsôngv box ciês nhoz y tế tiv phaz./.

                                                  Trịnh Xuân-Txâur vax cxeik nhênhv